آگ کے درمیان سے نکلا

آگ کے درمیان سے نکلا

میں بھی کس امتحان سے نکلا

پھر ہوا سے سلگ اٹھے پتے

پھر دھواں گلستان سے نکلا

جب بھی نکلا ستارۂ امید

کہر کے درمیان سے نکلا

چاندنی جھانکتی ہے گلیوں میں

کوئی سایہ مکان سے نکلا

ایک شعلہ پھر اک دھویں کی لکیر

اور کیا خاکدان سے نکلا

چاند جس آسمان میں ڈوبا

کب اسی آسمان سے نکلا

یہ گہر جس کو آفتاب کہیں

کس اندھیرے کی کان سے نکلا

شکر ہے اس نے بے وفائی کی

میں کڑے امتحان سے نکلا

لوگ دشمن ہوئے اسی کے شکیبؔ

کام جس مہربان سے نکلا

ag ke darmiyan se nikla

main bhi kis imtihan se nikla

phir hawa se sulag uthe patte

phir dhuan gulistan se nikla

jab bhi nikla sitara-e-ummid

kohr ke darmiyan se nikla

chandni jhankti hai galiyon mein

koi saya makan se nikla

ek shola phir ik dhuen ki lakir

aur kiya khakdan se nikla

chand jis asman mein duba

kab isi asman se nikla

ye guhar jis ko aftab kahin

kis andhere ki kan se nikla

shukr hai us ne be wafai ki

main kare imtihan se nikla

log dushman hue usi ke shakeb

kam jis mehrban se nikla