عمر آخر ہے جنوں کر لوں بہاراں پھر کہاں
انعام اللہ خاں یقینعمر آخر ہے جنوں کر لوں بہاراں پھر کہاں
ہاتھ مت پکڑو مرا یارو گریباں پھر کہاں
چشم تر پر گر نہیں کرتا ہوا پر رحم کر
دے لے ساقی ہم کو مے یہ ابر باراں پھر کہاں
یار جب پہنے جواہر کر دے اے دل جی نثار
جل چک اے پروانے یہ رنگیں چراغاں پھر کہاں
اس طرح صیاد کب آزاد چھوڑے گا تمہیں
بلبلو دھومیں مچا لو یہ گلستاں پھر کہاں
ہے بہشتوں میں یقیںؔ سب کچھ ولیکن درد نئیں
بھر کے دل رو لیجئے یہ چشم گریاں پھر کہاں
umr akhir hai junun kar lun baharan phir kahan
hath mat pakro mira yaro gareban phir kahan
chashm-e-tar par gar nahin karta hawa par rahm kar
de le saqi ham ko mai ye abr-e-baran phir kahan
yar jab pahne jawahir kar de ai dil ji nisar
jal chuk ai parwane ye rangin charaghan phir kahan
is tarah sayyad kab azad chhorega tumhen
bulbulo dhumen macha lo ye gulistan phir kahan
hai bahishton mein yaqin sab kuchh walekin dard nain
bhar ke dil ro lijiye ye chashm-e-giryan phir kahan