عشوہ ہے ناز ہے غمزہ ہے ادا ہے کیا ہے — بیاں احسن اللہ خان

Arooz is now on the App Store, for iPhone and iPad. Download →

بیاں احسن اللہ خان

عشوہ ہے ناز ہے غمزہ ہے ادا ہے کیا ہے

قہر ہے سحر ہے جادو ہے بلا ہے کیا ہے

یار سے میری جو کرتے ہیں سفارش اغیار

مکر ہے عذر ہے قابو ہے دغا ہے کیا ہے

تجھ کو کس نام سے اے فخر مرے یاد کروں

باپ ہے پیر ہے مرشد ہے خدا ہے کیا ہے

تم جو بے وجہ سناتے ہو مری جان مجھے

خوب ہے نیک ہے بہتر ہے بھلا ہے کیا ہے

روبرو اس کے کبھو بات نہ سدھری ہم سے

حلم ہے چین ہے دہشت ہے حیا ہے کیا ہے

نظم کو سن کے مری ہنس کے یہ بولا وہ شوخ

مدح ہے شکر ہے شکوہ ہے گلہ ہے کیا ہے

یہ جو اس شوخ پہ کرتا ہے بیاںؔ جان نثار

خبط ہے عشق ہے سودا ہے وفا ہے کیا ہے