عمر بھر ہم رہے شرابی سے

عمر بھر ہم رہے شرابی سے

دل پر خوں کی اک گلابی سے

جی ڈھا جائے ہے سحر سے آہ

رات گزرے گی کس خرابی سے

کھلنا کم کم کلی نے سیکھا ہے

اس کی آنکھوں کی نیم خوابی سے

برقعہ اٹھتے ہی چاند سا نکلا

داغ ہوں اس کی بے حجابی سے

کام تھے عشق میں بہت پر میرؔ

ہم ہی فارغ ہوئے شتابی سے

umr bhar ham rahe sharabi se

dil pur khun ki ik gulabi se

ji dha jae hai sahar se ah

rat guzregi kis kharabi se

khulna kam kam kali ne sikha hai

us ki ankhon ki nim khwabi se

barqaaa uthte hi chand sa nikla

dagh hun us ki be hijabi se

kam the ishq mein bahut par mir

ham hi farigh hue shitabi se