آئی ہے شب قتل حسین ابن علی کی

آئی ہے شب قتل حسین ابن علی کی

رخصت ہے سحر عترت والاے نبی کی

کٹ جائے گی سب آل رسول عربی کی

برہم ہی ہوئی جان لو صحبت یہ کبھی کی

جب اس شہ مظلوم سے تلوار چلے گی

گرد اٹھ کے سوے چرخ ستمگار چلے گی

پاؤں کے تلے سے زمیں یک بار چلے گی

اٹھ جائے گی تہ انس و ملک جن و پری کی

لیکن جو مقدر ہے شہ دین کا ہونا

آزار دلی کھینچنا اس جان کو کھونا

احباب جو ہیں ان کو قیامت تئیں رونا

کس طرح ظفر ہووے نہ اس قوم دنی کی

بے ڈول نظر آتی ہیں اعدا کی نگاہیں

ہے جاے تعجب جو مروت کو نباہیں

غالب ہے کہ یہ خوبی شبیر نہ چاہیں

سن لیجو کہ ان لوگوں نے سادات کشی کی

ہووے گا نمودار سحر کا جو ستارہ

ہوگا تبھی سے شام کے لوگوں کا گذارا

میداں میں نکل صاف یہ شہ جائے گا مارا

ساتھ اس کے اجل آئے گی یک بار سبھی کی

ہرگز نہ ملے گا کسو کو ایک دم آب

کیا خرد و کلاں پیاس سے ہوجائیں گے بے تاب

تڑپیں گے پڑے خاک میں کیا کیا گہر ناب

دریا پہ یہ آفت پڑے گی تشنہ لبی کی

اکبر کے تڑپنے کے تئیں دیکھے گا مظلوم

مرنا کرے گا گود میں اصغر کا بھی معلوم

سن لیوے گا قاسم کی ہلاکی کی پڑی دھوم

لے جائے گا سب مرتے ہوئے جی ہی میں جی کی

گذرے گی جو کچھ سر کے اپر سب وہ سہے گا

بیٹوں میں بھتیجوں میں کوئی کم ہی رہے گا

جو وارثی کر باپ کی اک بات کہے گا

اوقات نے دیکھوگے بہت اس سے کمی کی

برپا کریں گے حشر عجب خیموں میں جاکر

لے جائیں گے پھر سر کے تئیں نیزہ چڑھا کر

لاویں گے بلا اک حرم شاہ میں آکر

دلجوئی نہ عابد کی تسلی نہ کسی کی

چھینیں گے ردائیں سر سکان حرم سے

کچھ کہہ نہ سکے گا کوئی واں فرط الم سے

درگوش سکینہ کا اتاریں گے ستم سے

دلداری کرے گا نہ کوئی باپ موئی کی

محجوب نہ ہوگا کوئی شبیر کے رو سے

ہوگا وہ پڑا خاک میں آلودہ لہو سے

کیا زین عبا آنکھ ملاوے گا کسو سے

کچھ چشم کسو سے نہ جسے دادرسی کی

جس جا کہ پڑا خاک میں ہوگا وہ تن پاک

ہووے گی کھڑی مویہ کناں زینب غمناک

کلثوم اڑاوے گی کھڑی ہوکے بہت خاک

پرسش نہ کرے گا کوئی اس خاک ملی کی

اصغر کے لیے بانو المناک پھرے گی

آنکھوں سے لہو روتی جگرچاک پھرے گی

فریادکناں منھ پہ ملے خاک پھرے گی

سننے کے نہیں بات کو اس جان جلی کی

پاس احمد مختار کا کرنے کے نہیں کچھ

رو حیدر کرار کا کرنے کے نہیں کچھ

غم عابد بیمار کا کرنے کے نہیں کچھ

کیا دیکھیو اس قوم نے دنیاطلبی کی

بے صرفہ چلے آویں گے غارت کے بہانے

لے جائیں گے لوگوں کے تئیں پاؤں چلانے

دیکھوگے کہ اس جمع سراپاے جفا نے

وارث کے موئے پر بھی جفا میں نہ کمی کی

خوش ہوویں گے دیکھیں گے اسیروں کو جو مغموم

دم لینے نہ دیویں گے جو ہو ماتم مظلوم

انصاف کروگے تو تمھیں ہووے گا معلوم

ان بدگہروں نے کوئی بھی بات بھلی کی

القصہ وے سب شام کی جانب کو چلیں گے

دل اور جگر آتش کربت سے جلیں گے

کم فرصتی وقت سے ٹک دم بھی نہ لیں گے

سن لیجو کہ عابد نے بلا رنج کشی کی

یک چند جدا جا کے وہ رنجور رہے گا

بے گور و کفن یہ تن پرنور رہے گا

ہر جاے بہم میرؔ یہ مذکور رہے گا

کیا سمجھے تھے وے لوگ جو یہ بے ادبی کی

ai hai shab-e-qatl-e-hasin ibn-e-ali ki

rukhsat hai sahar itrat wala-e-nabi ki

kat jaegi sab al-e-rasul-e-arabi ki

barham hi hui jan lo sohbat ye kabhi ki

jab is shah-e-mazlum se talwar chalegi

gard uth ke siwe charkh-e-sitamgar chalegi

paon ke tale se zamin yak bar chalegi

uth jaegi tah uns-o-malak jin-o-pari ki

lekin jo muqaddar hai shah-e-din ka hona

azar dili khinchna us jan ko khona

ahbab jo hain un ko qayamat tain rona

kis tarah zafar howe na is qaum dini ki

be dol nazar ati hain aada ki nigahen

hai jae taajjub jo murawwat ko nibahen

ghalib hai ke ye khubi shabbir na chahen

sun lijo ke un logon ne sadat kashi ki

howe ga numudar sahar ka jo sitara

hoga tabhi se sham ke logon ka gazara

maidan mein nikal saf ye shah jaega mara

sath us ke ajal aegi yak bar sabhi ki

hargiz na milega kisu ko ek dam-e-ab

kya khirad-o-kalan pyas se hojaen ge be tab

tarpenge pare khak mein kya kya guhar nab

dariya pe ye afat paregi tishna labi ki

akbar ke tarapne ke tain dekhega mazlum

marna karega god mein asghar ka bhi maalum

sun lewega qasim ki halaki ki pari dhum

le jaega sab marte hue ji hi mein ji ki

gazre gi jo kuchh sar ke upar sab wo sahega

beton mein bhatijon mein koi kam hi rahega

jo warisi kar bap ki ik bat kahega

auqat ne dekhoge bahut us se kami ki

barpa karenge hashr ajab khemon mein jakar

le jaenge phir sar ke tain neza charha kar

lawenge bala ik haram-e-shah mein akar

diljui na abid ki tasalli na kisi ki

chhinenge ridaen sar sukin-e-haram se

kuchh kah na sakega koi wan fart-e-alam se

dargosh sakina ka utarenge sitam se

dildari karega na koi bap maui ki

mahjub na hoga koi shabbir ke ro se

hoga wo para khak mein aluda lahu se

kya zain aba ankh milawega kisu se

kuchh chashm kisu se na jise dadrassi ki

jis ja ke para khak mein hoga wo tan-e-pak

howe gi khari muya kunan zinib ghamnak

kulsum urawegi khari hoke bahut khak

pursish na karega koi is khak mili ki

asghar ke liye bano alamnak phiregi

ankhon se lahu roti jigarchak phiregi

fariyadkunan munh pe mile khak phiregi

sunne ke nahin bat ko us jan jali ki

pas ahmad-e-mukhtar ka karne ke nahin kuchh

ro haidar-e-karrar ka karne ke nahin kuchh

gham abid-e-bimar ka karne ke nahin kuchh

kya dekhiyo is qaum ne duniyatalbi ki

be sarfa chale awenge gharat ke bahane

le jaenge logon ke tain paon chillane

dekhoge ke is jama sarapa-e-jafa ne

waris ke maue par bhi jafa mein na kami ki

khush howen ge dekhenge asiron ko jo maghmum

dam lene na dewenge jo ho matam mazlum

insaf karoge to tumhen howe ga maalum

in badgahron ne koi bhi bat bhali ki

alqissa we sab sham ki janib ko chalenge

dil aur jigar atish karbut se jalenge

kam fursati waqt se tuk dam bhi na lenge

sun lijo ke abid ne bala ranj kashi ki

yak chand juda ja ke wo ranjur rahega

be gor-o-kafan ye tan purnur rahega

har jae baham mir ye mazkur rahega

kya samjhe the we log jo ye be adabi ki