عدو کے تاکنے کو تم ادھر دیکھو ادھر دیکھو

عدو کے تاکنے کو تم ادھر دیکھو ادھر دیکھو

مگر ہم تم کو دیکھے جائیں تم چاہو جدھر دیکھو

لڑائی سے یوں ہی تو روکتے رہتے ہیں ہم تم کو

کہ دل کا بھید کہہ دیتی ہے تم چاہو جدھر دیکھو

ادائیں دیکھنے بیٹھے ہو کیا آئینہ میں اپنی

دیا ہے جس نے تم جیسے کو دل اس کا جگر دیکھو

سوال وصل پر کچھ سوچ کر اس نے کہا مجھ سے

ابھی وعدہ تو کر سکتے نہیں ہیں ہم مگر دیکھو

نہ کرنا ترک بیخودؔ محتسب کے ڈر سے مے خواری

کہیں دھبا لگا لینا نہ اپنے نام پر دیکھو

adu ke takne ko tum idhar dekho idhar dekho

magar ham tum ko dekhe jaen tum chaho jidhar dekho

larai se yun hi to rokte rahte hain ham tum ko

ke dil ka bhed kah deti hai tum chaho jidhar dekho

adaen dekhne baithe ho kya aina main apni

diya hai jis ne tum jaise ko dil us ka jigar dekho

sawal-e-wasl par kuchh soch kar us ne kaha mujh se

abhi waada to kar sakte nahin hain ham magar dekho

na karna tark bekhud mohtasib ke dar se mai khwari

kahin dhabba laga lena na apne nam par dekho