عدو غیر نے تجھ کو دلبر بنایا

عدو غیر نے تجھ کو دلبر بنایا

کوئی جوڑ مجھ پر مقرر بنایا

کوئی سرو رکھتا نہ تھا راست یہ ہے

ترے قد کو میں نے صنوبر بنایا

کیا میں نے جلاد اسے اپنے حق میں

ستم سہتے سہتے ستم گر بنایا

نہ گنتا تھا کوئی حسینوں میں او بت

تجھے دے کے دل میں نے دلبر بنایا

شکر لب کہا میں نے کڑوے ہوئے تم

عبث منہ کو مجھ سے ستم گر بنایا

عناصر سے خالق نے خلقت بنائی

تجھے نور سے حور پیکر بنایا

ترا عاشق زار روز ازل سے

بنایا مجھے او ستم گر بنایا

بھلا کیا جواب اس کا دے گا تو قاتل

اگر خون کا میں نے محضر بنایا

مری عقل حیراں ہے بار الہا

طلسمات دنیا کو کیوں کر بنایا

پڑی جان اڑنے لگا میرے عیسیٰ

روئی کا جو تو نے کبوتر بنایا

ہمہ وقت ممکن نہیں وصل دلبر

ہنسی کھیل کیا جان مضطر بنایا

وہ ہوں صاحب ظرف ہرگز نہ چھلکا

اگر خاک کا میری ساغر بنایا

خیال دہن نے کیا تنگ مجھ کو

کمر کے تصور نے لاغر بنایا

گھلے سوز فرقت میں اس شمع رو کے

یہ حال اپنا کیوں رندؔ جل کر بنایا

adu ghair ne tujh ko dilbar banaya

koi jor mujh par muqarrar banaya

koi sarw rakhta na tha rast ye hai

tire qad ko main ne sanobar banaya

kiya main ne jallad use apne haq mein

sitam sahte sahte sitam gar banaya

na ginta tha koi hasinon mein o but

tujhe de ke dil main ne dilbar banaya

shakar lab kaha main ne karwe hue tum

abas munh ko mujh se sitam gar banaya

anasir se khaliq ne khilqat banai

tujhe nur se hur paikar banaya

tira ashiq-e-zar roz-e-azal se

banaya mujhe o sitam gar banaya

bhala kya jawab us ka dega to qatil

agar khun ka main ne mahzar banaya

miri aql hairan hai bar alha

tilismat duniya ko kyun kar banaya

pari jan urne laga mere isa

roi ka jo tu ne kabutar banaya

hama waqt mumkin nahin wasl dilbar

hansi khel kya jan-e-muztar banaya

wo hun sahab-e-zarf hargiz na chhalka

agar khak ka meri saghar banaya

khayal-e-dahan ne kiya tang mujh ko

kamar ke tasawwur ne laghar banaya

ghule soz-e-furqat mein is shama ro ke

ye hal apna kyun rind jal kar banaya