عدوئے جاں بت بے باک نکلا
وزیر علی صبا لکھنؤیعدوئے جاں بت بے باک نکلا
بڑا قاتل بڑا سفاک نکلا
صنوبر قد کشی میں خاک نکلا
وہ سرو قد چمن کی ناک نکلا
فرشتوں کو کیا مات آدمی نے
قیامت کا یہ مشت خاک نکلا
اڑا دی قید مذہب دل سے ہم نے
قفس سے طائر ادراک نکلا
محبت سے کھلا حال زمانہ
یہ دل لوح طلسم خاک نکلا
نکل آئی فلک کی دور سے روح
بھنور سے خوب یہ تیراک نکلا
وہ پژمردہ تھا فصل گل جو آئی
چمن سے صورت خاشاک نکلا
شکار افگن میں دل کو جانتا تھا
غزال بستۂ فتراک نکلا
مرے ہم آرزو ان کی بر آئے
ہمارا حوصلہ کیا خاک نکلا
جنوں میں باغ عالم کو جو دیکھا
عجب صحرائے وحشت ناک نکلا
نکلتی ہے بدن سے جس طرح روح
ترے گھر سے میں یوں غم ناک نکلا
تمہارے قد سے کچھ کم سرو ٹھہرا
صنوبر تو بہت کاواک نکلا
ہماری سادہ لوحی کام آئی
حساب روز محشر پاک نکلا
ترارہ پھرتے ہی پہنچا عدم میں
سمند عمر کیا چالاک نکلا
بھرے لڑکوں نے دامن پتھروں سے
جہاں تیرا گریباں چاک نکلا
مٹایا دور ساقی محتسب نے
عدو جمشید کا ضحاک نکلا
صباؔ ہم حشر کو مجرم جو نکلے
شفاعت کو شہ لولاک نکلا
adu-e-jan but-e-be bak nikla
bara qatil bara saffak nikla
sanobar qad kashi mein khak nikla
wo sarw qad-e-chaman ki nak nikla
farishton ko kiya mat admi ne
qayamat ka ye musht-e-khak nikla
ura di qaid-e-mazhab dil se ham ne
qafas se tair-e-idrak nikla
mohabbat se khula hal-e-zamana
ye dil lauh-e-tilism-e-khak nikla
nikal ai falak ki dur se ruh
bhanwar se khub ye tairak nikla
wo pazhmurda tha fasl-e-gul jo ai
chaman se surat-e-khashak nikla
shikar afgan mein dil ko janta tha
ghazal-e-basta-e-fitrak nikla
mire ham arzu un ki bar ae
hamara hausla kya khak nikla
junun mein bagh-e-alam ko jo dekha
ajab sahra-e-wahshat nak nikla
nikalti hai badan se jis tarah ruh
tire ghar se main yun gham nak nikla
tumhare qad se kuchh kam sarw thahra
sanobar to bahut kawak nikla
hamari sada lauhi kam ai
hisab-e-roz-e-mahshar pak nikla
tirarah phirte hi pahuncha adam mein
samand-e-umr kya chalak nikla
bhare larkon ne daman pattharon se
jahan tera gareban chak nikla
mitaya dur saqi mohtasib ne
adu jamshed ka zahhak nikla
saba ham hashr ko mujrim jo nikle
shafaat ko shah-e-laulak nikla