Arooz is now on the App Store, for iPhone and iPad. Download →

All poetry

عجیب حسن ہے ان سرخ سرخ گالوں میں

Jaleel Manikpuri (1866–1946)

عجیب حسن ہے ان سرخ سرخ گالوں میں

مئے دوآتشہ بھر دی ہے دو پیالوں میں

سنیں جو آپ تو سونا حرام ہو جائے

تمام رات گزرتی ہے جن خیالوں میں

امید و یاس نے جھگڑے میں ڈال رکھا ہے

نہ جینے والوں میں ہم ہیں نہ مرنے والوں میں

چمن میں گل بھی حنا بھی مگر نصیب کی بات

کوئی تو سر چڑھے کوئی ہو پائمالوں میں

نسیم شمع لحد کو ذرا بچائے ہوئے

یہی ہے ایک غریبوں کے رونے والوں میں

یہاں خزاں کا نہ کھٹکا نہ خوف گلچیں کا

بہار گل میں رہے یا تمہارے گالوں میں

نہیں ہے لطف کہ خلوت میں غیر شامل ہو

اٹھا دو شمع کو یہ بھی ہے جلنے والوں میں

چبھے گا کیا دل پر خوں کا راز آنکھوں سے

جو ہوگا شیشے میں آئے گا وہ پیالوں میں

ہزار شکر کہ ہم نقص میں ہوئے کامل

جلیلؔ رہ گئی بات اپنی ذی کمالوں میں