آہ بیمار کارگر نہ ہوئی

آہ بیمار کارگر نہ ہوئی

چرخ کانپا مگر سحر نہ ہوئی

صبح محشر ہوئی شب تاریک

صورت یار جلوہ گر نہ ہوئی

شب امید کٹ گئی لیکن

زندگی اپنی مختصر نہ ہوئی

دور سے آج ان کو دیکھ لیا

دل کو تسکیں ہوئی مگر نہ ہوئی

آنکھوں آنکھوں میں لے لیا وعدہ

کانوں کان ایک کو خبر نہ ہوئی

اف ری چشم عتاب اف رے جلال

برق سوزاں ہوئی نظر نہ ہوئی

فکر انجام و حسرت آغاز

دو گھڑی چین سے بسر نہ ہوئی

کھلنے والا نہیں در توبہ

فکر انجام وقت پر نہ ہوئی

ایسا رونا بھی کوئی رونا ہے

آستین آنسوؤں سے تر نہ ہوئی

ہٹ کے بالیں سے لوگ روتے ہیں

جیسے بیمار کو خبر نہ ہوئی

لٹ گیا سارا کارواں عدم

ایک کو ایک کی خبر نہ ہوئی

نیم جاں چھوڑ کر چلا قاتل

نگہ یاسؔ کارگر نہ ہوئی

ah bimar kargar na hui

charkh kanpa magar sahar na hui

subh-e-mahshar hui shab-e-tarik

surat-e-yar jalwa gar na hui

shab-e-ummid kat gai lekin

zindagi apni mukhtasar na hui

dur se aj un ko dekh liya

dil ko taskin hui magar na hui

ankhon ankhon mein le liya waada

kanon kan ek ko khabar na hui

uf ri chashm-e-itab uf re jalal

barq-e-sozan hui nazar na hui

fikr-e-anjam-o-hasrat-e-aghaz

do ghari chain se basar na hui

khulne wala nahin dar-e-tauba

fikr-e-anjam waqt par na hui

aisa rona bhi koi rona hai

astin ansuon se tar na hui

hat ke balin se log rote hain

jaise bimar ko khabar na hui

lut gaya sara karwan adam

ek ko ek ki khabar na hui

nim jan chhor kar chala qatil

nigah-e-yas kargar na hui