عاشق ہیں مگر عشق نمایاں نہیں رکھتے

عاشق ہیں مگر عشق نمایاں نہیں رکھتے

ہم دل کی طرح چاک گریباں نہیں رکھتے

سر رکھتے ہیں سر میں نہیں سودائے محبت

دل رکھتے ہیں دل میں کوئی ارماں نہیں رکھتے

نفرت ہے کچھ ایسی انہیں آشفتہ سروں سے

اپنی بھی وہ زلفوں کو پریشاں نہیں رکھتے

رکھنے کو تو رکھتے ہیں خبر سارے جہاں کی

اک میرے ہی دل کی وہ خبر ہاں نہیں رکھتے

گھر کر گئیں دل میں وہ محبت کی نگاہیں

ان تیروں کا زخمی ہوں جو پیکاں نہیں رکھتے

دل دے کوئی تم کو تو کس امید پر اب دے

تم دل تو کسی کا بھی مری جاں نہیں رکھتے

رہتا ہے نگہبان مرا ان کا تصور

وہ مجھ کو اکیلا شب ہجراں نہیں رکھتے

دشمن تو بہت حضرت ناصح ہیں ہمارے

ہاں دوست کوئی آپ سا ناداں نہیں رکھتے

دل ہو جو پریشان تو دم بھر بھی نہ ٹھہرے

کچھ باندھ کے تو گیسوئے پیچاں نہیں رکھتے

گو اور بھی عاشق ہیں زمانے میں بہت سے

بیخودؔ کی طرح عشق کو پنہاں نہیں رکھتے

ashiq hain magar ishq numayan nahin rakhte

ham dil ki tarah chak-e-gareban nahin rakhte

sar rakhte hain sar mein nahin sauda-e-mohabbat

dil rakhte hain dil mein koi arman nahin rakhte

nafrat hai kuchh aisi unhen ashufta saron se

apni bhi wo zulfon ko pareshan nahin rakhte

rakhne ko to rakhte hain khabar sare jahan ki

ik mere hi dil ki wo khabar han nahin rakhte

ghar kar gain dil mein wo mohabbat ki nigahen

in tiron ka zakhmi hun jo paikan nahin rakhte

dil de koi tum ko to kis ummid par ab de

tum dil to kisi ka bhi miri jan nahin rakhte

rahta hai nigahban mira un ka tasawwur

wo mujh ko akela shab-e-hijran nahin rakhte

dushman to bahut hazrat-e-naseh hain hamare

han dost koi ap sa nadan nahin rakhte

dil ho jo pareshan to dam bhar bhi na thahre

kuchh bandh ke to gesu-e-pechan nahin rakhte

go aur bhi ashiq hain zamane mein bahut se

bekhud ki tarah ishq ko pinhan nahin rakhte