عالم میں کوئی دل کا طلب گار نہ پایا

عالم میں کوئی دل کا طلب گار نہ پایا

اس جنس کا یاں ہم نے خریدار نہ پایا

حق ڈھونڈنے کا آپ کو آتا نہیں ورنہ

عالم ہے سبھی یار کہاں یار نہ پایا

غیروں ہی کے ہاتھوں میں رہے دست نگاریں

کب ہم نے ترے ہاتھ سے آزار نہ پایا

جاتی ہے نظر خس پہ گہہ چشم پریدن

یاں ہم نے پر کاہ بھی بے کار نہ پایا

تصویر کے مانند لگے در ہی سے گزری

مجلس میں تری ہم نے کبھو بار نہ پایا

سوراخ ہے سینے میں ہر اک شخص کے تجھ سے

کس دل کے طرح تیر نگہ پار نہ پایا

مربوط ہیں تجھ سے بھی یہی ناکس و نااہل

اس باغ میں ہم نے گل بے خار نہ پایا

دم بعد جنوں مجھ میں نہ محسوس تھا یعنی

جامے میں مرے یاروں نے اک تار نہ پایا

آئینہ بھی حیرت سے محبت کی ہوئے ہم

پر سیر ہو اس شخص کا دیدار نہ پایا

وہ کھینچ کے شمشیر ستم رہ گیا جو میرؔ

خوں ریزی کا یاں کوئی سزاوار نہ پایا

alam mein koi dil ka talab gar na paya

is jins ka yan ham ne kharidar na paya

haq dhundne ka ap ko ata nahin warna

alam hai sabhi yar kahan yar na paya

ghairon hi ke hathon mein rahe dast-e-nigaren

kab ham ne tire hath se azar na paya

jati hai nazar khas pe gah chashm-e-paridin

yan ham ne par kah bhi be kar na paya

taswir ke manind lage dar hi se guzri

majlis mein tiri ham ne kabhu bar na paya

surakh hai sine mein har ik shakhs ke tujh se

kis dil ke tarah tir-e-nigah par na paya

marbut hain tujh se bhi yahi nakas-o-naahl

is bagh mein ham ne gul-e-be khar na paya

dam baad junun mujh mein na mahsus tha yaani

jame mein mire yaron ne ik tar na paya

aina bhi hairat se mohabbat ki hue ham

par sair ho us shakhs ka didar na paya

wo khinch ke shamshir sitam rah gaya jo mir

khun rezi ka yan koi sazawar na paya