عبث ہیں ناصحا ہم سے ز خود رفتوں کی تدبیریں

عبث ہیں ناصحا ہم سے ز خود رفتوں کی تدبیریں

رکے ہے بحر کب گو موج سے ہوں لاکھ زنجیریں

ہماری آہ سے آگے تو پتھر آب ہوتے تھے

پہ کیا جانے وہ اب کیدھر گئیں نالے کی تاثیریں

یہ اک صورت ہے گر کھینچے وہ میرے یار کا نقشہ

میں کب معنوں ہوں یوں مانی لکھے گر لاکھ تصویریں

لگائی آگ پانی میں یہ کس کے عکس نے پیارے

کہ ہم دیگر چلی ہیں موج سے دریا میں شمشیریں

سنا ہی میں نہ گوش لطف سے احوال کو میرے

چھپی تھیں ورنہ خاموشی میں اپنی لاکھ تقریریں

رکھے ہے ہوش اگر تو قصر کر طول عمارت کا

کہ اس بنیاد پر کب تک کرے گا تو یہ تعمیریں

گریباں کی تو قائمؔ مدتوں دھجئیں اڑائی ہیں

پہ خاطر جمع اس دن ہووے جب سینے کو ہم چیریں

abas hain nasha ham se ze khud rafton ki tadbiren

ruke hai bahr kab go mauj se hun lakh zanjiren

hamari ah se age to patthar ab hote the

pe kya jane wo ab kidhar gain nale ki tasiren

ye ik surat hai gar khinche wo mere yar ka naqsha

main kab maanon hun yun mani likhe gar lakh taswiren

lagai ag pani mein ye kis ke aks ne pyare

ke ham digar chali hain mauj se dariya mein shamshiren

suna hi mein na gosh-e-lutf se ahwal ko mere

chhupi thin warna khamoshi main apni lakh taqriren

rakhe hai hosh agar to qasr kar tul-e-imarat ka

ke is buniyad par kab tak karega to ye taamiren

gareban ki to qaim muddaton dhajiyen urai hain

pe khatir jama us din howe jab sine ko ham chiren