عالم میں ہرے ہوں گے اشجار جو میں رویا

عالم میں ہرے ہوں گے اشجار جو میں رویا

گلچیں نہیں سینچیں گے گل زار جو میں رویا

برسے گا جو ابر آ کر کھل جائے گا دم بھر میں

آنسو نہیں تھمنے کے اے یار جو میں رویا

روؤگے جھروکے میں تم ہچکیاں لے لے کر

اے یار کبھی زیر دیوار جو میں رویا

زخمی ہوں تو ہونے دو کیوں یار بسوروں میں

کیا بات رہی کھا کر تلوار جو میں رویا

ہوں مستعد رقت فرہاد مجھے بہلا

لے ڈوبیں گے تجھ کو بھی کہسار جو میں رویا

مجنوں نے کہا جاؤ وحشت انہیں دکھلاؤ

بیٹھا ہوا صحرا میں بیکار جو میں رویا

رحم آ ہی گیا ان کو کٹوا دے مری بیڑی

زندان میں چلا کر اک بار جو میں رویا

کی غصے کے مارے پھر اس نے نہ نگہ سیدھی

ان انکھڑیوں کا ہو کر بیمار جو میں رویا

بیتابی و زاری پر میری انہیں رحم آیا

دکھلا ہی دیا مجھ کو دیدار جو میں رویا

آرام وہ کرتے ہیں رلوا نہ مجھے اے دل

ٹھہریں گے نہ وہ ہو کر بیدار جو میں رویا

آئے تھے بمشکل وہ لائے تھے شرفؔ ان کو

پھر اٹھ گئے وہ ہو کر بیدار جو میں رویا

alam mein hare honge ashjar jo main roya

gulchin nahin sinchenge gul zar jo main roya

barsega jo abr a kar khul jaega dam bhar mein

ansu nahin thamne ke ai yar jo main roya

rooge jharoke mein tum hichkiyan le le kar

ai yar kabhi zer-e-diwar jo main roya

zakhmi hun to hone do kyun yar bisurun mein

kya bat rahi kha kar talwar jo main roya

hun mustaid riqqat farhad mujhe bahla

le dubenge tujh ko bhi kohsar jo main roya

majnun ne kaha jao wahshat unhen dikhlao

baitha hua sahra mein bekar jo main roya

rahm a hi gaya un ko katwa de miri beri

zindan mein chala kar ik bar jo main roya

ki ghusse ke mare phir us ne na nigah sidhi

in ankhriyon ka ho kar bimar jo main roya

betabi-o-zari par meri unhen rahm aya

dikhla hi diya mujh ko didar jo main roya

aram wo karte hain rulwa na mujhe ai dil

thahrenge na wo ho kar bedar jo main roya

ae the bamushkil wo lae the sharaf un ko

phir uth gae wo ho kar bedar jo main roya