عالم حیرت کا دیکھو یہ تماشا ایک اور

عالم حیرت کا دیکھو یہ تماشا ایک اور

یار نے آئینے میں اپنا سا دیکھا ایک اور

مرنے والوں میں رہا جاتا ہے جیتا ایک اور

نیم بسمل ہوں میں قاتل ہاتھ پورا ایک اور

رفتہ رفتہ دل کو دل سے راہ ہو جائے کہیں

ان سے ملنے کا رہے پوشیدہ رستہ ایک اور

ایک تو مسی کا نقشہ جم رہا ہے شام سے

پان کی لالی نے رنگ اپنا جمایا ایک اور

میں نے مانا آپ نے بوسے دیئے میں نے لیے

وہ کہاں نکلی جو ہے میری تمنا ایک اور

یاد میں اک شوخ پنجابی کے روتے ہیں جو ہم

آج کل پنجاب میں بہتا ہے دریا ایک اور

ان کا جھومر دیکھ کر کہنے لگے اہل زمیں

دیکھ لے اے آسماں عقد ثریا ایک اور

جیتے جی تو دامن صحرا کا خلعت مل گیا

بعد مرنے کے ملے ان کا دوپٹہ ایک اور

بزم سے ساقی کے ہم سے رند نکلے پاک صاف

اپنا اب کعبہ میں پہنچے گا مصلیٰ اک اور

شاعران‌ عصر کی تجھ کو تو ہے پیغمبری

بو سیلمی بھی ہوئے اے مہرؔ پیدا ایک اور

alam-e-hairat ka dekho ye tamasha ek aur

yar ne aine mein apna sa dekha ek aur

marne walon mein raha jata hai jita ek aur

nim bismil hun main qatil hath pura ek aur

rafta rafta dil ko dil se rah ho jae kahin

un se milne ka rahe poshida rasta ek aur

ek to missi ka naqsha jam raha hai sham se

pan ki lali ne rang apna jamaya ek aur

main ne mana ap ne bose diye main ne liye

wo kahan nikli jo hai meri tamanna ek aur

yad mein ik shokh panjabi ke rote hain jo ham

aj kal panjab mein bahta hai dariya ek aur

un ka jhumar dekh kar kahne lage ahl-e-zamin

dekh le ai asman aqd-e-surayya ek aur

jite ji to daman-e-sahra ka khilat mil gaya

baad marne ke mile un ka dupatta ek aur

bazm se saqi ke ham se rind nikle pak saf

apna ab kaaba mein pahunchega musalli ik aur

shayaran asr ki tujh ko to hai paighambari

bu silami bhi hue ai mehr paida ek aur