آگاہ اپنی موت سے کوئی بشر نہیں

آگاہ اپنی موت سے کوئی بشر نہیں

سامان سو برس کا ہے پل کی خبر نہیں

آ جائیں رعب غیر میں ہم وہ بشر نہیں

کچھ آپ کی طرح ہمیں لوگوں کا ڈر نہیں

اک تو شب فراق کے صدمے ہیں جاں گداز

اندھیر اس پہ یہ ہے کہ ہوتی سحر نہیں

کیا کہئے اس طرح کے تلون مزاج کو

وعدے کا ہے یہ حال ادھر ہاں ادھر نہیں

رکھتے قدم جو وادئ الفت میں بے دھڑک

حیرتؔ سوا تمہارے کسی کا جگر نہیں

agah apni maut se koi bashar nahin

saman sau baras ka hai pal ki khabar nahin

a jaen rob-e-ghair mein ham wo bashar nahin

kuchh ap ki tarah hamen logon ka dar nahin

ik to shab-e-firaq ke sadme hain jan gudaz

andher us pe ye hai ke hoti sahar nahin

kya kahiye is tarah ke talawwun mizaj ko

waade ka hai ye hal idhar han idhar nahin

rakhte qadam jo wadi-e-ulfat mein be dharak

hairat siwa tumhare kisi ka jigar nahin