عشق صادق نے دکھایا یہ اثر آپ سے آپ

عشق صادق نے دکھایا یہ اثر آپ سے آپ

ہو گئی ان کو مرے دل کی خبر آپ سے آپ

چشم جاناں کی اگر یاد نہیں آئی ہے

آ گئے جوش پہ کیوں دیدۂ تر آپ سے آپ

کچھ مزہ پڑ گیا ہے ان کو کہ بے وجہ و سبب

وصل کی شب وہ کیا کرتے ہیں شر آپ سے آپ

خفتہ بختی مری دکھلاتی ہے تاثیر اپنی

بجنے لگتا ہے شب وصل گجر آپ سے آپ

نہ موذن نے اذاں دی نہ ابھی توپ چلی

دفعتاً بول اٹھا مرغ سحر آپ سے آپ

بخدا ان کی طرف سے نہیں کچھ خواہش تھی

جان کا اپنی کیا ہم نے ضرر آپ سے آپ

غیر کو تم نے بٹھایا تو نہیں پہلو میں

آج اٹھتا ہے یہ کیوں درد جگر آپ سے آپ

جذب الفت تری تاثیر کا تب قائل ہوں

دیں تو وہ بوسۂ لب مجھ کو مگر آپ سے آپ

للہ الحمد کیا آہ نے اتنا تو اثر

بے طلب وہ چلے آئے مرے گھر آپ سے آپ

ہوگی تاثیر جو نالوں میں تمہارے وہبیؔ

تو چلا آئے گا وہ رشک قمر آپ سے آپ

ishq-e-sadiq ne dikhaya ye asar ap se ap

ho gai un ko mire dil ki khabar ap se ap

chashm janan ki agar yad nahin ai hai

a gae josh pe kyun dida-e-tar ap se ap

kuchh maza par gaya hai un ko ke be wajh-o-sabab

wasl ki shab wo kya karte hain shar ap se ap

khufta bakhti miri dikhlati hai tasir apni

bajne lagta hai shab-e-wasl gajar ap se ap

na muazzin ne azan di na abhi top chali

dafatan bol utha murgh-e-sahar ap se ap

bakhuda un ki taraf se nahin kuchh khwahish thi

jan ka apni kiya ham ne zarar ap se ap

ghair ko tum ne bithaya to nahin pahlu mein

aj uthta hai ye kyun dard-e-jigar ap se ap

jazb-e-ulfat tiri tasir ka tab qail hun

den to wo bosa-e-lab mujh ko magar ap se ap

lillah alhamd kya ah ne itna to asar

be talab wo chale ae mire ghar ap se ap

hogi tasir jo nalon mein tumhare wobi

tu chala aega wo rashk-e-qamar ap se ap