عرش و کرسی کی خبر لائے ہیں لانے والے

عرش و کرسی کی خبر لائے ہیں لانے والے

ایک موسیٰ ہی نہ تھے طور کے جانے والے

طور کو تم نے جلایا تو بڑی بات نہ کی

آگ پانی میں لگاتے ہیں لگانے والے

میرے مرقد کو بھی آ کر کبھی ٹھکرا جانا

ارے او فتنۂ محشر کے جگانے والے

ایک عالم ترے عاشق نے کیا خال سیاہ

دو ہی نالے کیے تھے طور جلانے والے

کب تلک اپنے کرشمے ہمیں دکھلاؤ گے

اے میاں روز نئے طرز دکھانے والے

میری تقدیر جو پلٹے تو تعجب کیا ہے

سنتے ہیں بگڑی بناتے ہیں بنانے والے

تم جو آنکھوں میں مری آئے تو احسان کیا

آنکھیں کیا دل میں سماتے ہیں سمانے والے

لاکھ ہو مانع فریاد مگر کیا ہوگا

عرش کو سر پہ اٹھا لیں گے اٹھانے والے

اپنی قسمت نہیں ایسی کہ ہو دیدار انجمؔ

منتظر جن کے ہیں کب آئیں وہ آنے والے

arsh-o-kursi ki khabar lae hain lane wale

ek musa hi na the tur ke jane wale

tur ko tum ne jalaya to bari bat na ki

ag pani mein lagate hain lagane wale

mere marqad ko bhi a kar kabhi thukra jana

are o fitna-e-mahshar ke jagane wale

ek alam tire ashiq ne kiya khal-e-siyah

do hi nale kiye the tur jalane wale

kab talak apne karishme hamen dikhlaoge

ai miyan roz nae tarz dikhane wale

meri taqdir jo palte to taajjub kya hai

sunte hain bigri banate hain banane wale

tum jo ankhon mein miri ae to ehsan kiya

ankhen kya dil mein samite hain samane wale

lakh ho mane-e-fariyad magar kya hoga

arsh ko sar pe utha lenge uthane wale

apni qismat nahin aisi ke ho didar anjum

muntazir jin ke hain kab aen wo ane wale