عشق بتاں کا جب سے مجھے ڈھنگ آ گیا

عشق بتاں کا جب سے مجھے ڈھنگ آ گیا

ہاتھوں سے میرے دست جنوں تنگ آ گیا

کس شوق سے یہ بزم میں کہتا ہے دل مرا

مطرب کے ساتھ بن کے یہاں چنگ آ گیا

ڈرنا عبث ہے خار مغیلاں سے اب مجھے

منزل میں عشق کے کئی فرسنگ آ گیا

جی چاہتا ہے پھینک دوں پہلو سے میں اسے

بیتابیوں سے دل کی تو میں تنگ آ گیا

منظور شیشۂ دل عاشق ہے توڑنا

جو ہاتھ میں لیے ہوئے وہ سنگ آ گیا

پامال تم نے گر دل عاشق نہیں کیا

تلووں میں کیوں نہ خون کا پھر رنگ آ گیا

کس طرح لوگ کوئے بتاں تک چلے گئے

میرے تو ہر قدم پہ وہاں سنگ آ گیا

سن کر غزل کو میری جمیلہؔ نے یہ کہا

اس میں تو صوفیانہ بھی کچھ رنگ آ گیا

ishq-e-butan ka jab se mujhe dhang a gaya

hathon se mere dast-e-junun tang a gaya

kis shauq se ye bazm mein kahta hai dil mira

mutrib ke sath ban ke yahan chang a gaya

darna abas hai khar-e-mughilan se ab mujhe

manzil mein ishq ke kai farsang a gaya

ji chahta hai phenk dun pahlu se main use

betabiyon se dil ki to main tang a gaya

manzur shisha-e-dil-e-ashiq hai torna

jo hath mein liye hue wo sang a gaya

pamal tum ne gar dil-e-ashiq nahin kiya

talwon mein kyun na khun ka phir rang a gaya

kis tarah log ku-e-butan tak chale gae

mere to har qadam pe wahan sang a gaya

sun kar ghazal ko meri jamilahu ne ye kaha

is mein to sufiyana bhi kuchh rang a gaya