عشق دہن میں گزری ہے کیا کچھ نہ پوچھئے — آغا حجو شرف

Arooz is now on the App Store, for iPhone and iPad. Download →

آغا حجو شرف

عشق دہن میں گزری ہے کیا کچھ نہ پوچھئے

نا گفتنی ہے حال مرا کچھ نہ پوچھئے

کیا درد عشق کا ہے مزا کچھ نہ پوچھئے

کہتا ہے دل کسی سے دوا کچھ نہ پوچھئے

محشر کے دغدغے کا میں احوال کیا کہوں

ہنگامہ جو ہوا سو ہوا کچھ نہ پوچھئے

جب پوچھئے تو پوچھئے کیا گزری عشق میں

ہم سے تو اور اس کے سوا کچھ نہ پوچھئے

کیا کیا یہ سبز باغ دکھاتی ہے نزع میں

دم دے رہی ہے جو جو قضا کچھ نہ پوچھئے

پوچھا جو ہم نے گور غریباں کا جا کے حال

آئی یہ تربتوں سے صدا کچھ نہ پوچھئے

قسمت سے پائیے جو کبھی اس کو خوش مزاج

کیا کچھ نہ کہئے یار سے کیا کچھ نہ پوچھئے

رگڑی ہیں ایڑیاں تو ہوئی ہے یہ مستجاب

کس عاجزی سے کی ہے دعا کچھ نہ پوچھئے

چھوڑا جو مردہ جان کے صیاد نے مجھے

کیوں کر اڑا میں ہو کے رہا کچھ نہ پوچھئے

ترسا کیا میں دولت دیدار کے لیے

قسمت نے جو سلوک کیا کچھ نہ پوچھئے

الفت کا نام لے کے نظر بند ہو گئے

پائی جو پیار کر کے سزا کچھ نہ پوچھئے

کیا سرگزشت گور غریباں کی میں کہوں

احوال بندگان خدا کچھ نہ پوچھئے

خوشبو نے آپ کی جو سرافراز اسے کیا

کس ناز سے چلی ہے صبا کچھ نہ پوچھئے

پوچھا شرفؔ کے مرنے کا ان سے جو واقعہ

آنکھوں میں اشک بھر کے کہا کچھ نہ پوچھئے