آہ دیکھی تھی میں جس گھر میں پری کی صورت

آہ دیکھی تھی میں جس گھر میں پری کی صورت

اب نظر آئے ہے واں نوحہ گری کی صورت

نہ وہ انداز نہ آواز نہ عشوہ نہ ادا

یک بہ یک مٹ گئی یوں جلوہ گری کی صورت

اب خیال اس کا وہاں آنکھوں میں پھرتا ہے مری

کوئی پھرتا تھا جہاں کبک دری کی صورت

اس کے جانے سے مرا دل ہے مرے سینے میں

دم کا مہمان چراغ سحری کی صورت

نے خبر اس کو مری پہنچے ہے نے اس کی مجھے

بندھ گئی ہے عجب اک بے خبری کی صورت

نام لوں کس کا کہ اک گل کے لیے جاتے ہیں

اشک آنکھوں سے عقیق جگری کی صورت

مصحفیؔ ہے یہی اب سوچ کہ دیکھیں تو فلک

پھر بھی دکھلائے گا یار سفری کی صورت

ah dekhi thi main jis ghar mein pari ki surat

ab nazar ae hai wan nauha giri ki surat

na wo andaz na awaz na ishwa na ada

yak ba yak mit gai yun jalwa giri ki surat

ab khayal us ka wahan ankhon mein phirta hai miri

koi phirta tha jahan kabk-e-dari ki surat

us ke jane se mira dil hai mire sine mein

dam ka mehman charagh-e-sahari ki surat

ne khabar us ko miri pahunche hai ne us ki mujhe

bandh gai hai ajab ik be khabari ki surat

nam lun kis ka ke ik gul ke liye jate hain

ashk ankhon se aqiq-e-jigri ki surat

mushafi hai yahi ab soch ke dekhen to falak

phir bhi dikhlaega yar safari ki surat