ضائع نہیں ہوتی کبھی تدبیر کسی کی

ضائع نہیں ہوتی کبھی تدبیر کسی کی

میری سی خدایا نہ ہو تقدیر کسی کی

ناحق میں بگڑ جانے کی عادت یہ غضب ہے

ثابت تو کیا کیجیے تقصیر کسی کی

قاصد یہ زبانی تری باتیں تو سنی ہیں

تب جانوں کہ لا دے مجھے تحریر کسی کی

بے ساختہ پہروں ہی کہا کرتے ہیں کیا کیا

ہم ہوتے ہیں اور ہوتی ہے تصویر کسی کی

ایسی تو نظامؔ ان کی نہ عادت تھی وفا کی

وہ جانے نہ جانے یہ ہے تاثیر کسی کی

zae nahin hoti kabhi tadbir kisi ki

meri si khudaya na ho taqdir kisi ki

nahaq mein bigar jane ki adat ye ghazab hai

sabit to kiya kijiye taqsir kisi ki

qasid ye zabani tiri baten to suni hain

tab janun ke la de mujhe tahrir kisi ki

be sakhta pahron hi kaha karte hain kya kya

ham hote hain aur hoti hai taswir kisi ki

aisi to nizam un ki na adat thi wafa ki

wo jane na jane ye hai tasir kisi ki