طرح اولے کی جو خلقت میں ہم آبی ہوتے

طرح اولے کی جو خلقت میں ہم آبی ہوتے

اپنے ہی واسطے بنیاد خرابی ہوتے

وہ جو سوتے ہیں فراغت سے انہوں کے سینے

کاش یک شب ہدف تیر شہابی ہوتے

مے نہ پیتے کبھی گل زار میں ہم یار بغیر

پھول شبو کے جو یک دست گلابی ہوتے

دل سے گرد غم کونین تو دھوئی جاتی

کاش ہم کشتۂ شمشیر دو نابی ہوتے

گر سمجھتے وہ کبھی معنیٔ متن قرآں

چہرے شراح کے ہرگز نہ کتابی ہوتے

عمر کے فوت کا ہم مرثیہ پڑھتے جو کبھو

آن کر خضر و مسیح اپنے جوابی ہوتے

اپنی قسمت میں تو محرومیٔ جاوید تھی آہ

ورنہ ہم شیفتۂ روئے نقابی ہوتے

روکشی کرنے کو ہم بحر سے جاتے مجنوں

آبلے پائے جنوں کے جو حبابی ہوتے

آتش دل ہی فروزاں نہ ہوئی ورنہ ہمیں

الف تیغ بتاں سیخ کبابی ہوتے

ہم کو دشوار تھا پھر روئے زمیں پر رہنا

کوکب بخت ہمارے جو شہابی ہوتے

کوئے عشاق سے گزرا نہ وہ کافر ورنہ

لوگ رستے کے بہ تقلید شرابی ہوتے

ماہ ہی بس ہے ہمیں گو کہ نہ ہووے خورشید

مردہ کیوں ڈھونڈتے فرنی کی رکابی ہوتے

نیم رنگ اس کی حنا دیکھ نہ مرتے گر ہم

پھول تربت کے ہمارے نہ گلابی ہوتے

مصحفیؔ نالہ خموشی سے کیا میں نے بدل

تا کجا تار نفس تار ربابی ہوتے

tarah ole ki jo khilqat mein ham abi hote

apne hi waste buniyad kharabi hote

wo jo sote hain faraghat se unhon ke sine

kash yak shab-e-hadaf tir shahabi hote

mai na pite kabhi gul zar mein ham yar baghair

phul shabu ke jo yak dast-e-gulabi hote

dil se gard-e-gham-e-kaunain to dhoi jati

kash ham kushta-e-shamshir-e-do nabi hote

gar samajhte wo kabhi maani-e-matn-e-quran

chehre sharah ke hargiz na kitabi hote

umr ke faut ka ham marsiya parhte jo kabhu

an kar khizr-o-masih apne jawabi hote

apni qismat mein to mahrumi-e-jawed thi ah

warna ham shefta-e-roe naqabi hote

rukashi karne ko ham bahr se jate majnun

able pae junun ke jo hababi hote

atish-e-dil hi farozan na hui warna hamen

alif-e-tegh-e-butan sikh kababi hote

ham ko dushwar tha phir ru-e-zamin par rahna

kaukab-e-bakht hamare jo shahabi hote

ku-e-ushshaq se guzra na wo kafir warna

log raste ke ba taqlid-e-sharabi hote

mah hi bas hai hamen go ke na howe khurshid

murda kyun dhundte firni ki rikabi hote

nim rang us ki hina dekh na marte gar ham

phul turbat ke hamare na gulabi hote

mushafi nala khamoshi se kiya main ne badal

ta kuja tar-e-nafas tar-e-rababi hote