ضبط سے نا آشنا ہم صبر سے بیگانہ ہم

ضبط سے نا آشنا ہم صبر سے بیگانہ ہم

کیوں کسی سے مانگتے جائیں چراغ خانہ ہم

خود ہی ساز بے خودی کو چھیڑ دیتے ہیں کبھی

خود ہی سنتے ہیں حدیث ساغر و پیمانہ ہم

دفعتاً ساز دو عالم بے صدا ہو جائے گا

کہتے کہتے رک گئے جس دن ترا افسانہ ہم

شمع ایوان حرم ہو یا چراغ طاق دیر

ہم کو دونوں سے تعلق ہے کہ ہیں پروانہ ہم

دل جلا پھر خود جلے پھر ساری دنیا جل اٹھی

سوز لائے تھے بمقدار پر پروانہ ہم

جب ہمیں دیوانہ بننا ہے تو کیسی مصلحت

مصلحت کو بھی بنا لیں گے ترا دیوانہ ہم

بسکہ ہے سیمابؔ بے مہری یگانوں کا شعار

ہیں رہین التفات خاطر بیگانہ ہم

zabt se na ashna ham sabr se begana ham

kyun kisi se mangte jaen charagh-e-khana ham

khud hi saz-e-be khudi ko chher dete hain kabhi

khud hi sunte hain hadis-e-saghar-o-paimana ham

dafatan saz-e-do alam-e-be sada ho jaega

kahte kahte ruk gae jis din tira afsana ham

shama aiwan-e-haram ho ya charagh-e-taq-e-dair

ham ko donon se taalluq hai ke hain parwana ham

dil jala phir khud jale phir sari duniya jal uthi

soz lae the bamqadar par parwana ham

jab hamen diwana banna hai to kaisi maslahat

maslahat ko bhi bana lenge tira diwana ham

baske hai simab be mehri yaganon ka shiar

hain rahin-e-iltifat-e-khatir-e-begana ham