ضبط نالہ سے آج کام لیا

ضبط نالہ سے آج کام لیا

گرتی بجلی کو میں نے تھام لیا

پائے ساقی پہ توبہ لوٹ گئی

ہاتھ میں اس ادا سے جام لیا

پھول کا جام جب گرا کوئی

ہم نے پلکوں سے بڑھ کے تھام لیا

آفریں تجھ کو حسرت دیدار

چشم تر سے زباں کا کام لیا

دل جگر نذر کر دیے مے کے

دے کے دو شیشے ایک جام لیا

الٹی اک ہاتھ سے نقاب ان کی

ایک سے اپنے دل کو تھام لیا

ترک مے کی ہوئی تلافی یوں

نام ساقی کا صبح و شام لیا

آ گئی کیا کسی کی یاد جلیلؔ

چلتے چلتے جگر کو تھام لیا

zabt nala se aj kam liya

girti bijli ko main ne tham liya

pae saqi pe tauba laut gai

hath mein is ada se jam liya

phul ka jam jab gira koi

ham ne palkon se barh ke tham liya

afrin tujh ko hasrat-e-didar

chashm-e-tar se zaban ka kam liya

dil jigar nazr kar diye mai ke

de ke do shishe ek jam liya

ulti ik hath se naqab un ki

ek se apne dil ko tham liya

tark-e-mai ki hui talafi yun

nam saqi ka subh-o-sham liya

a gai kya kisi ki yad jalil

chalte chalte jigar ko tham liya