طرہ اسے جو حسن دل آزار نے کیا

طرہ اسے جو حسن دل آزار نے کیا

اندھیر گیسوئے سیہ یار نے کیا

گل سے جو سامنا ترے رخسار نے کیا

مژگاں نے وہ کیا کہ جو کچھ خار نے کیا

ناز و ادا کو ترک مرے یار نے کیا

غمزہ نیا یہ ترک ستم گار نے کیا

افشاں سے کشتہ ابروئے خم دار نے کیا

جوہر سے کام یار کی تلوار نے کیا

قامت تری دلیل قیامت کی ہو گئی

کام آفتاب حشر کا رخسار نے کیا

میری نگہ کے رشک سے روزن کو چاندی

رخنہ یہ قصر یار کی دیوار نے کیا

سودائے زلف میں مجھے آیا خیال رخ

مشتاق روشنی کا شب تار نے کیا

حسرت ہی بوسۂ لب شیریں کی رہ گئی

میٹھا نہ منہ کو تیرے نمک خوار نے کیا

فرصت ملی نہ گریہ سے اک لحظہ عشق میں

پانی مرے لہو کو اس آزار نے کیا

سیماب کی طرح سے شگفتہ ہوا مزاج

اکسیر مجھ کو میرے خریدار نے کیا

قد میں تو کر چکا تھا وہ احمق برابری

مجبور سرو کو تری رفتار نے کیا

حیرت سے پا بہ گل ہوے روزن کو دیکھ کر

دیوار ہم کو یار کی دیوار نے کیا

پتھر کے آگے سجدہ کیا تو نے برہمن

کافر تجھے ترے بت پندار نے کیا

کاوش مژہ نے کی رخ دلبر کی دید میں

پائے نگاہ سے بھی خلش خار نے کیا

عاشق کی طرح میں جو لگا کرنے بندگی

آزاد داغ دے کے خریدار نے کیا

اعجاز کا عجب لب جاں بخش سے نہیں

پیغمبر اس کو مصحف رخسار نے کیا

طرہ کی طرح سے دل عاشق کو پیچ میں

کس کس لپیٹ سے تری دستار نے کیا

آنکھوں کو بند کر کے تصور میں باغ کے

گلشن قفس کو مرغ گرفتار نے کیا

نالاں ہوا میں اس رخ رنگیں کو دیکھ کر

بلبل مجھے نظارۂ گل زار نے کیا

ہکلا کے مجھ سے بات جو اس دل ربا نے کی

کس حسن سے ادا اسے تکرار نے کیا

الٹا ادھر نقاب تو پردے پڑے ادھر

آنکھوں کو بند جلوۂ دیدار نے کیا

لذت کو ترک کر تو ہو دنیا کا رنج دور

پرہیز بھی دوا ہے جو بیمار نے کیا

ناصاف آئینہ ہو تو بد تر ہے سنگ سے

روشن یہ حال ہم کو جلاکار نے کیا

حلقہ کی ناف یار کے تعریف کیا کروں

گول ایسا دائرہ نہیں پرکار نے کیا

turra use jo husn-e-dil azar ne kiya

andher gesu-e-siyah yar ne kiya

gul se jo samna tire rukhsar ne kiya

mizhgan ne wo kiya ke jo kuchh khar ne kiya

naz-o-ada ko tark mire yar ne kiya

ghamza naya ye tark-e-sitam gar ne kiya

afshan se kushta-e-abru-e-kham dar ne kiya

jauhar se kam yar ki talwar ne kiya

qamat tiri dalil qayamat ki ho gai

kam aftab-e-hashr ka rukhsar ne kiya

meri nigah ke rashk se rauzan ko chandi

rakhna ye qasr-e-yar ki diwar ne kiya

sauda-e-zulf mein mujhe aya khayal-e-rukh

mushtaq raushni ka shab-e-tar ne kiya

hasrat hi bosa-e-lab-e-shirin ki rah gai

mitha na munh ko tere namak khwar ne kiya

fursat mili na girya se ik lahza ishq mein

pani mire lahu ko is azar ne kiya

simab ki tarah se shagufta hua mizaj

iksir mujh ko mere kharidar ne kiya

qad mein to kar chuka tha wo ahmaq barabari

majbur-e-sarw ko tiri raftar ne kiya

hairat se pa ba gul hue rauzan ko dekh kar

diwar ham ko yar ki diwar ne kiya

patthar ke age sajda kiya tu ne barahman

kafir tujhe tire but-e-pindar ne kiya

kawish-e-mizha ne ki rukh dilbar ki did mein

pae nigah se bhi khalish khar ne kiya

ashiq ki tarah main jo laga karne bandagi

azad dagh de ke kharidar ne kiya

ejaz ka ajab lab-e-jan bakhsh se nahin

paighambar us ko mushaf-e-rukhsar ne kiya

turra ki tarah se dil-e-ashiq ko pech mein

kis kis lapet se tiri dastar ne kiya

ankhon ko band kar ke tasawwur mein bagh ke

gulshan qafas ko murgh-e-giraftar ne kiya

nalan hawa mein us rukh-e-rangin ko dekh kar

bulbul mujhe nazara-e-gul zar ne kiya

hakla ke mujh se bat jo is dil ruba ne ki

kis husn se ada use takrar ne kiya

ulta idhar naqab to parde pare idhar

ankhon ko band-e-jalwa-e-didar ne kiya

lazzat ko tark kar to ho duniya ka ranj dur

parhez bhi dawa hai jo bimar ne kiya

nasaf aina ho to bad tar hai sang se

raushan ye hal ham ko jalakar ne kiya

halqa ki naf yar ke taarif kya karun

gol aisa daira nahin parkar ne kiya