شکل جب بس گئی آنکھوں میں تو چھپنا کیسا
شاہ اکبر داناپوریشکل جب بس گئی آنکھوں میں تو چھپنا کیسا
دل میں گھر کر کے مری جان یہ پردا کیسا
با ادب ہیں ترے سب کشتۂ ناز اے قاتل
سانس لیں گے نہ دم ذبح تڑپنا کیسا
آپ موجود ہیں حاضر ہے یہ سامان نشاط
عذر سب طے ہیں بس اب وعدۂ فردا کیسا
تیری آنکھوں کی جو تعریف سنی ہے مجھ سے
گھورتی ہے مجھے یہ نرگس شہلا کیسا
ہاتھ بڑھتے ہیں گریباں کی طرف پاؤں نکال
المدد جوش جنوں سبز ہے صحرا کیسا
اے مسیحا یوں ہی کرتے ہیں مریضوں کا علاج
کچھ نہ پوچھا کہ ہے بیمار ہمارا کیسا
گرم بازاریٔ خورشید قیامت ہوئی سرد
حشر میں داغ محبت مرا چمکا کیسا
کیا کہا تم نے کہ ہم جاتے ہیں دل اپنا سنبھال
یہ تڑپ کر نکل آئے گا سنبھلنا کیسا
منہ دکھائے نہ خدا ہجر کی شب کا اکبرؔ
خوف اس کا ہے ہمیں حشر کا دھڑکا کیسا
shakl jab bas gai ankhon mein to chhupna kaisa
dil mein ghar kar ke miri jan ye parda kaisa
ba adab hain tire sab kushta-e-naz ai qatil
sans lenge na dam-e-zabh tarapna kaisa
ap maujud hain hazir hai ye saman-e-nishat
uzr sab tai hain bas ab waada-e-farda kaisa
teri ankhon ki jo taarif suni hai mujh se
ghoratti hai mujhe ye nargis-e-shahla kaisa
hath barhte hain gareban ki taraf paon nikal
almadad josh-e-junun sabz hai sahra kaisa
ai masiha yun hi karte hain marizon ka ilaj
kuchh na puchha ke hai bimar hamara kaisa
garm-e-bazari-e-khurshid-e-qayamat hui sard
hashr mein dagh-e-mohabbat mira chamka kaisa
kya kaha tum ne ke ham jate hain dil apna sambhal
ye tarap kar nikal aega sambhalna kaisa
munh dikhae na khuda hijr ki shab ka akbar
khauf us ka hai hamen hashr ka dharka kaisa