شوق نے عشرت کا ساماں کر دیا

شوق نے عشرت کا ساماں کر دیا

دل کو محو روئے جاناں کر دیا

تو نے اے جمعیت دل کی ہوس

اور بھی مجھ کو پریشاں کر دیا

واہ رے زخم محبت کی خلش

جس کو دل نے راحت جاں کر دیا

خود نمائی خود فروشی ہو گئی

آپ نے اپنے کو ارزاں کر دیا

ان کے دامن تک نہ پہنچا دست شوق

اس کو مصروف گریباں کر دیا

بزم میں جب غیر پر ڈالی نظر

آپ نے مجھ پر بھی احساں کر دیا

کچھ بڑھا کر میں نے بہر شرح غم

چاک کو عنوان داماں کر دیا

جھک گئی آخر حیا سے ان کی آنکھ

شوق نے مجھ کو پشیماں کر دیا

پائے بت پر میں نے دو سجدے کئے

کفر کو بھی جزو ایماں کر دیا

اسے خیال لیلیٰ مجنوں نواز

تو نے صحرا کو گلستاں کر دیا

ہو کے زائل قوت احساس نے

مشکلوں کو میری آساں کر دیا

دل نہیں جاتا تھا سوئے راہ دیر

کیسے کافر کو مسلماں کر دیا

تو نے وحشتؔ کیوں خلاف رسم عشق

درد کو رسوائے درماں کر دیا

shauq ne ishrat ka saman kar diya

dil ko mahw-e-roe janan kar diya

tu ne ai jamiyyat-e-dil ki hawas

aur bhi mujh ko pareshan kar diya

wah re zakhm-e-mohabbat ki khalish

jis ko dil ne rahat-e-jan kar diya

khud numai khud faroshi ho gai

ap ne apne ko arzan kar diya

un ke daman tak na pahuncha dast-e-shauq

us ko masruf-e-gareban kar diya

bazm mein jab ghair par dali nazar

ap ne mujh par bhi ehsan kar diya

kuchh barha kar main ne bahr-e-sharh-e-gham

chak ko unwan-e-daman kar diya

jhuk gai akhir haya se un ki ankh

shauq ne mujh ko pasheman kar diya

pae but par main ne do sajde kiye

kufr ko bhi juzw-e-iman kar diya

use khayal laila-e-majnun nawaz

tu ne sahra ko gulistan kar diya

ho ke zail quwwat-e-ehsas ne

mushkilon ko meri asan kar diya

dil nahin jata tha su-e-rah-e-dair

kaise kafir ko musalman kar diya

tu ne wahshat kyun khilaf-e-rasm-e-ishq

dard ko ruswa-e-darman kar diya