شکوۂ درد جگر اے مہرباں کیوں کر کریں

شکوۂ درد جگر اے مہرباں کیوں کر کریں

آپ سن کیوں کر سکیں اور ہم بیاں کیوں کر کریں

اپنی بیتی پھر سنائیں گے کبھی اے مہرباں

شب کی شب میں ختم ساری داستاں کیوں کر کریں

سیکڑوں ہی فتنۂ خوابیدہ جاگ اٹھیں گے پھر

نیند سے چونکا کے ان کو سرگراں کیوں کر کریں

پھر گیا تلوار کا منہ تھم گئے بازوئے دوست

کیوں اجل اس کی تلافی سخت جاں کیوں کر کریں

آتی ہے پچھلے پہر بس دل دھڑکنے کی صدا

راز داران وفا آہ و فغاں کیوں کر کریں

پھاندنا دیوار جنت کا تو آساں ہے مگر

آپ کے دل میں جگہ اے مہرباں کیوں کر کریں

انقلاب دہر نے آنکھوں کو اندھا کر دیا

آخر اب نظارۂ فصل خزاں کیوں کر کریں

ناتوانی کا برا ہو آہ کر سکتے نہیں

کیوں فلک اب جذب دل کا امتحاں کیوں کر کریں

اس طلسم دہر میں سر بھی اٹھا سکتے نہیں

کشمکش میں سیر نیرنگ جہاں کیوں کر کریں

سر پٹکتے ہیں عبث نقش قدم پر دیر سے

آبلہ پا جستجوئے کارواں کیوں کر کریں

ہوش میں پھر کون تھا جب درد کا ساغر چلا

آخر شب کی وہ کیفیت بیاں کیوں کر کریں

ہاتھ پھیلایا نہ جائے گا بھری محفل میں آج

صبر کی دولت کو ساقی رائیگاں کیوں کر کریں

جھوم کر اٹھتے ہیں لیکن پھر سنبھل جاتے ہیں مست

سامنا ساقی کا ہے گستاخیاں کیوں کر کریں

پھاڑے کھاتی ہے ہمیں یہ ملگجی پوشاک میں

جامۂ تن کی بتاؤ دھجیاں کیوں کر کریں

shikwa-e-dard-e-jigar ai mehrban kyun kar karen

ap sun kyun kar saken aur ham bayan kyun kar karen

apni biti phir sunaenge kabhi ai mehrban

shab ki shab mein khatm sari dastan kyun kar karen

saikron hi fitna-e-khwabida jag uthenge phir

nind se chaunka ke un ko sargiran kyun kar karen

phir gaya talwar ka munh tham gae bazu-e-dost

kyun ajal us ki talafi sakht jan kyun kar karen

ati hai pichhle pahar bas dil dharakne ki sada

raz daran wafa ah-o-fughan kyun kar karen

phandna diwar jannat ka to asan hai magar

ap ke dil mein jagah ai mehrban kyun kar karen

inqilab-e-dahr ne ankhon ko andha kar diya

akhir ab nazara-e-fasl-e-khizan kyun kar karen

natawani ka bura ho ah kar sakte nahin

kyun falak ab jazb-e-dil ka imtihan kyun kar karen

is tilism-e-dahr mein sar bhi utha sakte nahin

kashmakash mein sair-e-nairang-e-jahan kyun kar karen

sar patakte hain abas naqsh-e-qadam par der se

abla pa justuju-e-karwan kyun kar karen

hosh mein phir kaun tha jab dard ka saghar chala

akhir-e-shab ki wo kaifiyat bayan kyun kar karen

hath phailaya na jaega bhari mahfil mein aj

sabr ki daulat ko saqi raigan kyun kar karen

jhum kar uthte hain lekin phir sambhal jate hain mast

samna saqi ka hai gustakhiyan kyun kar karen

phare khati hai hamen ye malgaji poshak mein

jama-e-tan ki batao dhajjiyan kyun kar karen