شکار نامۂ دوم

مکرر ہے نواب کو قصد صید

بیابان پہناور اب ہوں گے قید

رواں بحر لشکر ہوا موج موج

گئی چشم خورشید تک گرد فوج

بحار و صحاری پہ ہے عرصہ تنگ

مگر یاں سراسیمہ ہیں واں پلنگ

پہن بیٹھے ہیں شیر ببری لباس

کریں لوگ شاید فقیری کا پاس

چکارے ہرن دونوں اندیشہ مند

دلوں میں ہراس کمان و کمند

کہیں گرگ وادی کو فکر گریز

نظر ایدھر اودھر کرے شیر تیز

بنوں میں ہے آشوب کوہوں میں ڈر

بیاباں وطن سارے گرم سفر

کہیں امن ہو تو کہوں واں گئے

نکل آکھروں سے پریشاں گئے

اسد کی نہ شیرانہ ہنکار ہے

نہ کفتار کو تاب رفتار ہے

جہاں کے تہاں فکر میں ہیں کھڑے

کہ دنگل سے جنگل میں کیا بن پڑے

ہوا دود باروت سے تیرہ رنگ

صداے تفنگ و صداے تفنگ

وحوش و ستوراں کو وحشت غضب

ہوا ہیں کھڑکتے ہی پتے کے سب

ہزاروں ہی بندوق ہر دم چلے

ہوا ہی میں پنچھی پکھیرو جلے

گئے بادخور آسماں میں پلٹ

کلنگوں کی صف باز نے دی الٹ

اڑے ہاتھ دوچار جرے کہاں

رہے مرغ آبی جہاں کے تہاں

پر تیر جس دم کشادہ ہوئے

بزے صید حد سے زیادہ ہوئے

بنوں میں مچی دھوم سی آکے دھوم

جہاں دیکھیے ہے قیامت ہجوم

کہیں ارنے مارے غضنفر کہیں

کہیں ہاتھی نکلا ہے اژدر کہیں

پڑے مست ہاتھی جو تھے من چلے

سن اس شور کو چھوڑ کر بن چلے

نہ تیرہ ہے روز گوزنان و گور

کہ شیروں کو بھی قشعریرہ ہے زور

لب آب جاکر جو کھیلے شکار

اسد واں کے تھے کودک نے سوار

ہوئے قرقرے صید ہو ہو کے ڈھیر

ہوا میں سے بھاگا عقاب دلیر

زغن ان بنوں میں نہ پائی گئی

نہ تغدار کی لاش اٹھائی گئی

ہوا ہے یہی تو یہ ہونی نہیں

کہ ہو خاد آکر سیہ یاں کہیں

جگر کیا کہ پرزن ہو اس بن میں زاغ

یہ زہرہ نہیں رکھتے کوہی کلاغ

شترمرغ سیمرغ ازبس ہراس

نہیں آتے کوہ شمالی کے پاس

بیاباں خوش آئندہ و خوش فضا

سبزہ ہے آبجو ہے فصل بہار بھی ہے

سرگرم جلوہ دیکھو پہلو میں یار بھی ہے

یہ تو نہیں کہ ہم پر ہر دم ہے بے دماغی

آنکھیں دکھاتے ہیں تو چتون میں پیار بھی ہے

گل ہم کنار ہوگا ہنس کر کبھو چمن میں

پر کم بغل ہے بلبل اس کو قرار بھی ہے

ہوں وعدہ گاہ میں تو پر میں ہی جانتا ہوں

کچھ اضطراب بھی ہے کچھ انتظار بھی ہے

جوں موج ہم بغل ہوں نایاب اس گہر سے

دریا کی سیر بھی ہے بوس و کنار بھی ہے

ہم جبریوں سے کیا ہو بے دست و پا و عاجز

کہنے کو کہتے ہیں تو کچھ اختیار بھی ہے

کون اس بھبھوکے سا ہے دیکھو نہ ٹک بھی تو وہ

شمع و چراغ و شعلہ برق و شرار بھی ہے

جانا مسلم آیا اس خاکداں سے گو پھر

مشکل گذر ہے رستہ گرد و غبار بھی ہے

دل تنگ میرؔ کیوں ہے ہمرہ وزیر کے تو

دریا فضا ہوا ہے سیر و شکار بھی ہے

اٹھا فوج میں سے یہ گرد و غبار

کہ منھ پر تھا خورشید آئینہ وار

فلک کہرے سے تھا دھواں سا نمود

سماں شب کا رکھتا تھا ملک شہود

زمیں تھی سو تھی فرش بالاے آب

تحلحل سے مطلق نہ رکھتی تھی تاب

نہ پوچھو کہ لوگوں کا کیا حال تھا

جو رکھے قدم واں تو بھونچال تھا

روندے لگے چلنے تیزی سے چال

ہوا مذہب شیعیاں اعتزال

کسی ڈھب سے جوں توں کے چلنا ہوا

عجب مہلکے سے نکلنا ہوا

اتر لوگ دریا سے آگے گئے

ہزبران خونخوار بھاگے گئے

پلنگان مردم در ایسے ڈرے

کہ جاتے ہیں کوہوں کے چھوڑے درے

بیاباں میں مرنا کہاں سر دھریں

نہ لیں راہ بر عرب کیا کریں

رکے دل ہمارے بھی ہوں باغ باغ

تھی باد بھی آنے کی چمن میں نہ روادار

پر کیجیے کیا گل کی صبا بھی ہے ہوادار

شائستۂ دیدن ہے مرے یار کی صحبت

وہ صاحب ناخواہ ہے بندہ ہے وفادار

کیا خوب ہو کیا زشت ہو رو دیوے ہے سب کو

اس عرصہ میں آئینہ کو دیکھا ہے ہوادار

کس طور سے یک رنگ ہوں یے عاشق و معشوق

ہے گل کنے زر بلبل بے برگ ہے نادار

کیا بیکسی سے میرؔ نے رحلت کی جہاں سے

رویا نہ کوئی اس پہ نہ کوئی ہے عزادار

بنوں میں پھرا کرتے ہیں ہم تو دیر

نہیں بولتے ڈر سے غرندہ شیر

رہے تھے جو فیلان مست آن کر

گئے کجلی بن یاں سے ڈر مان کر

جو ان میں سے آکر لڑا پھر دیا

سو کٹھ بندھنوں سے ہوا فیل پا

گریوے کہیں تھے بلند اور پست

پھر اڑتے تھے واں جیسے پیلان مست

بہی تیغ نواب اس طور سے

بہے جدول تیز جس طور سے

بہت رہ گئے زیر شمشیر و تیر

بہت آئے لشکر میں ہو کر اسیر

لدے ہاتھیوں پر جو ہوکر شکار

ہوئیں بوجھ سے پشت فیلاں فگار

کیے گم جو گینڈے نے اپنے حواس

کھڑا ہو رہا آکے بھینسوں کے پاس

کہ بھینس اس کو بھی جان کر لشکری

چلے جائیں صرصر نمط سرسری

نہ چھوڑا ہے طیر ایک عصفور تک

نہ وحشی کپی اور لنگور تک

لگے جاکے شاہین دستور یوں

پڑے بکریوں میں کہن گرگ جیوں

کلنگ ایسے بازوں سے آئے ستوہ

کہ کابل سے آگے گئے صد کروہ

نہیں قوچ سرزن نہ ایل نہ رنگ

ہوئے قید یا صید کیا بے درنگ

غضب کرگئے جرے نواب کے

اڑا کھا گئے خیل سرخاب کے

نہ لگ لگ نہ تیتر رہا دشت میں

نہ غم خوارک آیا نظر گشت میں

سبھوں میں جو تھے قاز و سارس سرس

ہوئے صید یوں جن پہ آیا ترس

حواصل کو ہوتا اگر حوصلہ

تو گرتا نہ کھیتوں میں ہو دہ دلہ

کہیں سارے طاؤس مرتے گئے

ادھر لوگ افسوس کرتے گئے

کہیں جی اٹھی تھی زمیں بعد مرگ

نہال اس کے خوش قد بسیار برگ

نہ بستی سے صحرا تلک سبز تھے

نظر جائے جس جا تلک سبز تھے

ہوا دلکش و ہر طرف سبزہ زار

کہ سرسوں نے کی تھی قیامت بہار

کھڑے لوگ محو تماشا تھے واں

کہ کہنے لگی بلبل خوش زباں

کہ خاطر جنوں سے نہ رکھتے نچنت

خبر بھی ہے تم کو کہ آئی بسنت

یہ عہد جنوں ہے جنوں کیجیے

جگر کو غزل کہتے خوں کیجیے

بلبل کے بولنے سے آزار دل نے پایا

کیا کہہ گئی کہ ہم کو سنتے ہی غش سا آیا

نخچیرگہ میں اس کے جاتا نہیں ہے کوئی

ہم کو تو شوق مفرط واں کا لگا کے لایا

انواع رنج ہم نے کھینچے تھے عاشقی میں

پر ہجر کے الم نے چنگا بہت بنایا

صوفی صاف مشرب بے ہوش و بے خرد ہیں

مستی نے اس نگہ کی مجلس کے تیں چھکایا

مہر و وفا و الفت کرتے تھے لوگ باہم

رحمت خدا کی تم نے اس رسم کو اٹھایا

سر مارے تو پری کو ایسی روش نہ آئے

کس ناز سے زمیں پر پڑتا ہے اس کا سایا

یہ جانتا تو ہرگز بازار میں نہ جاتا

یوسفؑ کے طور میں بھی سستا بہت بکایا

غیرت سے عاشقی کے جاتا نہیں ہوں میں تو

وہ خود بہ خود ہی آوے کاش اس طرف خدایا

معشوق تو ہے پر وہ اوباش کج روش ہے

کیا کہیے میرؔ جی سے دل کو کہاں لگایا

کسو ایسے جنگل میں جانا ہوا

کہ مشکل قدم کا اٹھانا ہوا

نظر گرد لشکر پہ تھی دم بہ دم

نہ تھا واں کے ضیغم کو کچھ اور غم

کوئی ارسلاں بھیجتا گر رسول

تو شاید کہ الحاح ہوتی قبول

سو وے خوں گرفتہ تو بھولے ہوئے

بہت اپنے زوروں پہ پھولے ہوئے

چلے ہر طرف اب جو آکر تفنگ

نہ اوقات صلح و نہ ہنگام جنگ

لگی آگ جنگل میں چارہ گیا

بن آئی نہ کچھ مفت مارا گیا

ہوا چہرہ کوئی تو جوں شیر سنگ

نہ شیری دلیری نہ چہرے پہ رنگ

لگی گولی پڑنے نہ پھر چل سکا

نہ جاگہ سے اکسا نہ ٹک ہل سکا

چلے ہم جو بہڑاچ سے پیشتر

ہوئے صید دریا کے واں بیشتر

بھرے فرط ہی سے تو دیہات شہر

کہے تو کہ سوتے رہے رود و نہر

گھٹے گولیوں سے مگر بے شمار

رہے سونس گھڑیال چندیں ہزار

جو کچھ زخم پانی میں لے کر گئے

وہیں ہو کے ناسور مر مر گئے

لگا کہنے باخہ سر اپنا جھکا

کہ پانی تو جالوں سے سارا رکا

اگر جایئے تہ کو دھنس جایئے

وگر گاڑیے سر تو پھنس جایئے

عجب مخمصہ ہے بچے کیونکے جان

یہی موت ہے سوجھتی ہے ندان

جواب اس کا گھڑیال نے یوں دیا

گھڑی ایک دو کا ہے قصہ رہا

پڑی سر پہ بجتی ہے فرصت نہیں

پہر اس کو کھنچتے ہیں اب کیا کہیں

تحمل ہو کچھ بھی تو تدبیر ہو

کریں کیا اگر یوں ہی تقدیر ہو

کوئی دشت یک دست نے زار تھا

رکھے واں قدم پاؤں افگار تھا

یہی سینک یا کانس پانی کی گھاس

زمین و ہوا آب و آتش اداس

کہیں دوں لگی ہے تمامی ہے دود

کہیں دو شجر ہیں سو کیا بدنمود

نہ پتہ نہ شاخیں نہ کچھ ان کو بار

سراپا ہے خشک و زبوں زرد و زار

نہ سائے سے ان کے کوئی بہرہ مند

نہ دیکھا چرندہ نہ آیا پرند

سیاہی نہ ہرنوں کی ڈاروں نے کی

نہ چشمک کہیں سے چکاروں نے کی

کہیں لپٹے آپس میں دو چار نے

کہیں ہاتھی آیا کہیں شیر نے

کہیں سرپتا سر پہ تھا جیسے تیغ

روندوں کے پاؤں پہ آیا دریغ

نہ بلبل غزل خواں نہ طیروں کا شور

سبھی دیکھتے میرؔ کے منھ کی اور

سو ان نے غزل سست سی یہ کہی

ولے دل کو لوگوں کے لگتی رہی

ذوق شکار اس کو ہے اتنا کہ حد نہیں

کس اس کے تیغ کش پہ ملک کو حسد نہیں

خالی پڑے ہیں صید سے وادی و کوہسار

رہنے دو وحش و طیر کو اب دام و دد نہیں

بے جد و کد جو اس سے ملاقات ہو تو ہو

تم کد سے دیکھو ہو کہ ہمیں اس کی کد نہیں

کچھ اور شے ہے خوب جو دیکھو رخ نگار

ہرچند گل بھی تازہ کھلا اتنا بد نہیں

اس بیکسی سے کون جہاں میں موا کہ میں

جز داغ سینہ آج چراغ لحد نہیں

کیا سرو و گل سے ہووے تسلی کہ اہل شوق

گل منھ نہیں ہے یار کا سرو اس کا قد نہیں

بے سوز دل کنھوں نے کہا ریختہ تو کیا

گفتار خام پیش عزیزاں سند نہیں

سو بار مست کعبے میں پکڑے گئے ہیں ہم

رسوائی کے طریق کے کچھ نابلد نہیں

لطف سخن بھی پیری میں رہتا نہیں ہے میرؔ

اب شعر ہم پڑھیں ہیں تو وہ شد و مد نہیں

کسو ایسے بن سے نکلنا ہوا

کہ کوسوں تلک اس میں چلنا ہوا

کشیدہ قد اس بن کے سارے درخت

چمن کے سے نوباوگاں سبز بخت

برابر برابر کھڑے سر بہ سر

پھرے دیر اودھر کو جاکر نظر

پرے چل کے آیا تراکم بہت

حواس اس میں جاکر ہوئے گم بہت

کہیں راہ نکلی تو چلتے پڑے

رہے پال و پرتل بہت واں کھڑے

کہ شاخوں نے جھک جھک ملائے تھے سر

بہت آگے جا جا کے آئے تھے پھر

وہی راہ درپیش و کثرت ہوئی

قیامت کے اوپر قیامت ہوئی

سروں پر ادھر توپ آئی چلی

پڑی تھی ادھر لوگوں میں کھلبلی

کہیں اسپ و اشتر کہیں فیل مست

زمیں ہر سر گام بالا و پست

گذر جس طرح اس طرح سے کیا

روندوں نے خون جگر ہی پیا

وہیں بیچ آیا میانہ مرا

کوئی دیکھتا رنج اٹھانا مرا

سواری سے مجھ کو ندامت ہوئی

کہ چاروں طرف سے ملامت ہوئی

لگے کہنے آیا فرنگی کہاں

کہ چوپالے کی رسم چھوڑے ہے یاں

جسے دیکھو چار ان نے رکھ کر کہار

لگا ہونے ہر صبح اس پر سوار

چلو ہی چلو ہے کہ بچ جائیو

کہ چوپالے کے پاس تم آئیو

روندے ادھر کے ادھر ہیں خراب

یہ جاتے ہیں مجرے کو بھاگے شتاب

چڑھے چار کے کاندھے جیتے ہی جی

لیا اٹکل اس سودے میں نفع بھی

کہ گھوڑے دیے چھوڑ یک بارگی

میانوں میں کرتے ہیں آوارگی

نہ اس حال سے اہل دفتر خبر

توجہ نہ عمدوں کی کچھ ہے ادھر

وگرنہ ہو قدغن کہ اب اہل کار

نہ رہنے دیں لشکر میں ڈولی سوار

نہ مانیں تو چوپالے دیویں الٹ

ابھی گھوڑے لیں ڈپٹیں ایک ہی ڈپٹ

کرو میرؔ بحر اور اب اختیار

مگر اس سے نکلیں در آبدار

جوجو ظلم کیے ہیں تم نے سو سو ہم نے اٹھائے ہیں

داغ جگر پہ جلائے ہیں چھاتی پہ جراحت کھائے ہیں

تیغ دریغ نہیں ہے اس کی بسمل گہ میں کسو سے بھی

ہیں تو شکار لاغر ہم پر ایک امید پر آئے ہیں

ٹل کر سامنے یوں بھی اب جو تیر ترازو ہو اس کا

کیا کیا لوہو پی کر دل کو اس پلے پر لائے ہیں

خم سے لگی میخانہ کے دیوار بھی اپنے گھر کی ہے

لطف پیر مغاں سے عجب کیا ہم آخر ہمسائے ہیں

شوق غم میں بے صبری ہے آہ کسو کو کیا کہیے

اچھے اپنے جی کو ہم نے آپ ہی روگ لگائے ہیں

محو سخن ہم فکر سخن میں رفتہ ہی بیٹھے رہتے ہیں

آپ کو جب کھویا ہے ہم نے تب یہ گوہر پائے ہیں

دیکھیں طرف ہے کون سی جس سے تیغ ناز بلند کرے

ہم نے بھی تو اس ہی جہت سے فرق نیاز جھکائے ہیں

تب تھے سپاہی اب ہیں جوگی آہ جوانی یوں کاٹی

ایسی تھوڑی رات میں ہم نے کیا کیا سوانگ بنائے ہیں

کس کو ایسی بے خبری تھی جس کے بولے تو چونکا

سو ٹھوکر نے ان پلکوں کی کتنے فتنے جگائے ہیں

کون وہ ایسا ظالم تھا استاد فن عیاری کا

اتنے سن میں جن نے تجھ کو ایسے فریب سکھائے ہیں

میرؔ مقدس آدمی ہیں تھے سبحہ بہ کف میخانے میں

صبح جو ہم بھی جا نکلے تو دیکھ کے کیا شرمائے ہیں

کیا ایک نالے سے ہم نے گذر

ہوئی قائم اس جا پہ حشر دگر

گرے گاڑی چھکڑے پیادے سوار

کہ مقصد تھا سب کا عبور ایک بار

گذارا جو فیلوں کا پہلا ہوا

ملا خاک میں آب چہلا ہوا

کمر تک لگے پھنسنے دلدل کے بیچ

کہ نالے کا پانی تھا یک دست کیچ

پھنسے گاؤ اشتر گرے بارخر

ہوئے اسپ و اشتر بھی زیر و زبر

اگرچند باندھے تھے وہ جسر خام

ہوئے ایک ریلے میں دونوں تمام

نہ دیکھے تھے آگے کبھو یہ سمیں

ولیکن خدا نے اتارا ہمیں

سلامت رہا اپنا اسباب سب

رہے لوگ لشکر کے کرتے عجب

چلے واں سے آگے بنڈیلا ملا

کیا ان نے ایک ایک کو دہ دلہ

عجب راہ پرخوف مشکل گزار

نہ ہوتے تھے معلوم ہاتھی سوار

خطر شیر کا شور بنگاہ کا

تعب واں کے جانے کا غم راہ کا

کہ جا و زمیں کچھ ہویدا نہ تھی

کہیں اس میں پگڈنڈی پیدا نہ تھی

گڑھے غار پاؤں کی لغزش بلا

چلی باؤ تو نے کی لرزش بلا

صدا برگ نے کی نہایت مہیب

طریق عجیب و مسافر غریب

جنوں پیشہ وہ دشت وحشت شعار

کہ فیل اس کے طفلان بازی مدار

کہیں پانی آیا سو حالت خراب

کہ تھا زیر کاہ اس میں ہر جاے آب

نہ ہاتھی نہ اسباب اپنے کنے

یہی اک میانہ بنے سو بنے

چنانچہ گئے راوتی کے کنار

نہ ربط آشنائی کسو سے نہ پیار

کھڑے ہم رہے ہاتھ پر رکھ کے ہاتھ

کریں پار جانے کی کس منھ سے بات

کہار اک میانے میں اپنے دیے

پھر اس کے جو تھے چاروں ہم نے لیے

چڑھ ان کے سر آں روے دریا ہوئے

ہوئے پانی پانی کہ رسوا ہوئے

نہ جانا کہ آتا ہے کس کا قدم

کہ صید بیاباں گئے کرکے رم

گوزن ایک دو مار لائے کبھو

اڑے باز جرے کہیں ایک سو

نہ صید ایک دیکھا بھرے لاکھ رنگ

اک درج موتیوں کے عوض ہاتھ آگیا

یوسفؑ ہزار حیف کہ سستا بکا گیا

جانا نہ تھا سرہانے سے مجھ مختصر کے ہائے

کیا وقت رہ گیا تھا کہ وہ منھ چھپا گیا

آشفتہ سر ہیں سرو و گریباں دریدہ گل

بیٹھا کہاں چمن میں کہ فتنہ اٹھا گیا

گل برگ سے بھرے تھے کہے تو کنار و جیب

کیا کیا سمیں نہ گریۂ خونیں دکھا گیا

خط بھیج کے بھی شوق کی باتیں چلی گئیں

قاصد کے پیچھے دور تلک میں لگا گیا

روتا ہوں یوں کہ برسے ہے شدت سے جیسے مینھ

جوں ابر میرے دل پہ غم عشق چھا گیا

جو نقش روزگار کے صفحے سے محو ہو

صورت پذیر پھر نہیں ہوتا مٹا گیا

ہستی مری کہ ہیچ تھی میں منفعل رہا

اس شرم سے ندان زمیں میں سما گیا

داغ دل خراب شبوں کو جلے ہے میرؔ

عشق اس خرابے میں بھی چراغ اک جلا گیا

چلے صبح گہ دامن کوہ کو

تماشاکناں فوج و انبوہ کو

درختوں میں چلنا تو دشوار تھا

ولے راستہ بھی قدم وار تھا

گزارا ہوا یوں ہی اک آدھ کوس

پٹیلے پہ ہنگامہ آرا تھی اوس

نیستاں میں چھپتا تھا گھوڑے سوار

اگر ہو تو واں شیر کا ہو شکار

نہ رہتے تھے سو شیر شرزہ بھی واں

نہ ہاتھی کے پاؤں کا پایا نشاں

عجب کشمکش درمیاں آگئی

بہیر اک بلا تھی جہاں آگئی

نہ ہلنے کی جاگہ نہ چلنے کو راہ

سروں پر کھڑے اسپ و فیل سپاہ

خطر فیل دشتی کا ہر ہر قدم

گئے شیر کے ہر قدم پر قدم

کنار آب کے لوگ اترے تمام

ہوئے دامن کوہ میں کچھ مقام

سر کوہ کیونکر نہ ہو چرخ ساے

کہ نواب واں سیر کرنے کو جائے

رہے آب پر فرش چوکی و تخت

خہے رود کوہ و زہے ان کے بخت

ہمارا تو جانے کو چاہا نہ جی

کہ تھے پیر ہم واں ہوا خوب تھی

رہی منعقد بزم تھا ناچ راگ

نہ ہو کچھ تو کیونکر ہو یہ دل کی لاگ

کہی اور ہی بحر میں یہ غزل

مگر میرؔ کو ہے دماغی خلل

کر لطف عارض مت چھپا عاشق سے اے یار اس قدر

یک جان کو یہ عارضے یک دل کو افکار اس قدر

جو کچھ ہے سو دل کے سبب غم غصہ و رنج و تعب

تھے چاہنے سے پیشتر کاہے کو بیمار اس قدر

ہر دم جو اس کے ابرواں جنبش میں ہیں کانپے ہے جاں

یعنی ہیں آنکھیں جھپتیاں چلتی ہے تلوار اس قدر

شب نالہ و زاری رہے دن خستگی خواری رہے

وہ دل نہیں باقی رہا کھینچے جو آزار اس قدر

وے دل زدے ہیں خستہ جاں مر جاتے ہیں جو ناگہاں

ورنہ قضا کس شخص کی پہنچی ہے یک بار اس قدر

طرے سے طراری کرے مستی میں ہشیاری کرے

آیا نظر اب تک نہیں طرار و عیار اس قدر

الفت کہاں کلفت ہے یاں یہ بھی عجب صحبت ہے میاں

بیزار وہ اس مرتبہ جس سے ہمیں پیار اس قدر

تم آگے کب تھے بدگماں سب حجت و یکسر زباں

اب اک سخن پر مہرباں کرتے ہو تکرار اس قدر

آنکھیں کھلی ہیں میرؔ کی جب دیکھو تب آئینہ ساں

آدم نہیں ہوتے کہیں مشتاق دیدار اس قدر

بہا سنگ ریزوں پہ اس رنگ آب

کہ قدر ان کی جوں قدر یاقوت ناب

لیے عمدے ہاتھوں میں دیکھیں بہار

کہ ہر شے کا ہے وقت لیل و نہار

اسی آب کا رابتی یاں ہے نام

ہمیں ساتھ اس کے ہے ربط تمام

کنارے کنارے اسی کے ہے راہ

چلے جاتے ہیں جو نہ ہووے پناہ

جہاں تک ہے آب و خور اب جائیں گے

سمیں دیکھیں گے جو نظر آئیں گے

جبل سے ہوئے ظاہر آثار آب

برسنے لگا قطرہ قطرہ سحاب

ہمیں پر نہیں کچھ ہوا کا ستم

کہیں گرگ وادی کو بھی ہے یہ غم

کہیں ایسے سکڑے ہیں حیوان دشت

کہ ٹکڑے کرو تو نہ ہوں گرم گشت

نہ نکلے ہے ہاتھی نہ بولے ہے شیر

کوئی یوز پکڑا ہے سو بعد دیر

اسد یک طرف یوز یک سو رہے

عجب یہ ہے باندھے گئے اژدہے

نہ پوچھو کھنچا دور کار شکار

نہ اب دشت و در میں نمر ہے نہ مار

شکارافگناں راہ کرتے تھے طے

ملے جاتے تھے خاک میں دشت نے

نہ ببروں کو جنگل میں طاقت رہی

نہ مگروں کو پانی میں فرصت رہی

اسد مارے جاتے تھے سگ کی مثال

بندھے آتے تھے یوز و گرگ و غزال

ملا ایک چقر اگر یا گڑھا

تو کثرت سے نو نیزہ پانی چڑھا

بہت مشکلوں سے کیا ہے عبور

کہ یک گام راہ اور سو سو فتور

کہ اڑ جائے میرؔ اس بحیرے کی تہ

نہ دماغ ہے کہ کسو سے ہم کریں گفتگو غم یار میں

نہ فراغ ہے کہ فقیروں سے ملیں جا کے دلی دیار میں

نہ چمن میں جاتے رہا ہے دل نہ بنوں میں پھرنے لگا ہے دل

وہی بے کلی رہی جان کو رہے سیر میں نہ شکار میں

کہے کون صید رمیدہ سے کہ ادھر بھی پھر کے نظر کرے

کہ نقاب الٹے سوار ہے ترے پیچھے کوئی غبار میں

ترے شام خط کے قریب کی جو صفا میں دیکھی میں خوبیاں

نہ سمیں پہ گل میں نظر پڑے نہ یہ رنگ صبح بہار میں

کوئی شعلہ ہے کہ شرارہ ہے کہ ہوا ہے یہ کہ ستارہ ہے

یہی دل جو لے کے گڑیں گے ہم تو لگے گی آگ مزار میں

جھکی کچھ کہ جی میں چبھی سبھی ہلی ٹک کہ دل میں کھبی سبھی

یہ جو لاگ پلکوں میں اس کے ہے نہ چھری میں ہے نہ کٹار میں

مرے ایک دل میں جو غم یہ ہے سو فزوں ہے میرے شمار سے

نہ تو دس میں یہ نہ پچاس میں نہ تو سو میں یہ نہ ہزار میں

بڑے جانور خوار کیا کیا ہوئے

بندھے پاے فیلاں سے رسوا ہوئے

بہت نالے کھولے پکھالے گئے

بحیروں سے روہو نکالے گئے

مگر کی پس از مرگ عزت ہوئی

کہ ہاتھی پہ چڑھنے کی رخصت ہوئی

کشف کا ہوا ہے یہ اوصاف اب

کہ جھینگوں نے کی شرح کشاف اب

نہ تیتر بٹیر اور کبوتر ملا

دیے باز جروں کو سارے کھلا

کہیں بحری پانی میں یوں جا لگے

کہ پنجوں میں بے صید ادھر آ لگے

ہوا میں سے یوں کر اتارے کلنگ

کہ بازوں نے چڑیا سے مارے کلنگ

کسو اور ارنوں کو دیکھا کھڑے

کہے تو بیاباں میں ہاتھی پڑے

جگر کرکے جاتے تھے مردان کار

تو وہ ایک دو کر ہی لاتے شکار

وگرنہ بشر کا نہ مقدور تھا

قریب اس کے جانا بہت دور تھا

نہ ان چارشانوں کا روکش ہے شیر

نہ سو فیل دوچار رکھتے ہیں گھیر

مددگار تھے حضرت زندہ پیل

پکڑ لاتے تھے لوگ تب ژندہ پیل

بحیرہ نہ دریاے اعظم سے کم

اٹھا کرتے تھے لجے لطمے بہم

ہر اک موج اس کی سمندر کی لہر

کنارے پہ گرداب غرقاب قہر

یہی جنگل اس جھیل کے آس پاس

درختوں کا انبوہ نے کا اگاس

اسی بن میں شیر اور یوز و پلنگ

اسی بن میں گور و گوزن اور رنگ

اسی بن میں ہاتھی وہیں کرگدن

وہیں قوچ سرزن اسی میں ہرن

اسی بن میں لنگور بندر بھی تھے

وہیں ایک دو ہم قلندر بھی تھے

اسی بن میں پاڑھا وہیں نیل گاؤ

اسی بن میں یہ صیدبندی کا چاؤ

اسی بن میں تھے حضرت بوحمید

اسی بن میں نسناس ان کے مرید

اسی بن میں تھے خوک جاموش رنگ

کیا اس سوربن نے لوگوں کو تنگ

اسی بن میں رہنا اسی بن میں راہ

وہیں شام کا حسن لطف پگاہ

اسی بن میں وہ جھیل گہری بہت

ہوئے صید بری و بحری بہت

وہیں مچھلی بکتی تھی دمڑی کی سیر

ولیکن نہ کھاتا تھا ہو کوئی سیر

کہ اس آب کا ہضم دشوار تھا

کہ جوں آب شمشیر دم دار تھا

شغال اور خرگوش جی سے گئے

شکاری سگ ان کو اچک لے گئے

کہ اس مثنوی میں کہیں متصل

ہے گی طلب شرط یاں کچھ تو کیا چاہیے

بیٹھے نہیں بنتی میاں کچھ تو کیا چاہیے

عشق میں اے ہمرہاں کچھ تو کیا چاہیے

گریہ و شور و فغاں کچھ تو کیا چاہیے

ہاتھ رکھے ہاتھ پر بیٹھے ہو کیا بے خبر

چلنے کو ہے کارواں کچھ تو کیا چاہیے

میں جو کہا تنگ ہوں مار مروں کیا کروں

وہ بھی لگا کہنے ہاں کچھ تو کیا چاہیے

سون کسے رہنے کی کس نے بدی ہے بھلا

لطف و غضب مہرباں کچھ تو کیا چاہیے

کام اب اپنا ہے یاں کندن جاں ہر زماں

کیا کریں ہم ناتواں کچھ تو کیا چاہیے

کیا کروں دل خوں کروں شعر ہی موزوں کروں

چلتی ہے اب تک زباں کچھ تو کیا چاہیے

ہو نہ سکے گر نماز دل کی طرف کر نیاز

وقت گیا پھر کہاں کچھ تو کیا چاہیے

چاہوں کسو سے دعا دل کی کروں اب دوا

نفع ہو پھر یا زیاں کچھ تو کیا چاہیے

عمر گئی لغو سب وقت بہت کم ہے اب

کچھ نہ کیا ہائے میاں کچھ تو کیا چاہیے

یہ تو نہیں دوستی ہم سے جو تم کو رہی

پاس دل دوستاں کچھ تو کیا چاہیے

تونے کماں کی ہے زہ پر ہوں نہ یوں صید میں

میری بھی خاطر نشاں کچھ تو کیا چاہیے

میرؔ نہیں پیر تم کاہلی اللہ رے

نام خدا ہو جواں کچھ تو کیا چاہیے

کنارے پہ تھی اس کے اک گل زمیں

سراسر ہری جوں زمردنگیں

جہاں تک نظر جائے شاداب تھی

کہ یک دست واقع لب آب تھی

وہیں خیمے سب کے ہوئے تھے کھڑے

وہیں دام رہتے تھے اکثر پڑے

نواڑوں کی سیر اس میں ہر شام گہ

وہی سیرگاہ و وہی دام گہ

وہیں صید ہوں مرغ و ماہی تمام

مقام ایسے ہوویں تو کریے مقام

ہوا خیمہ آکر جو نواب کا

فلک ساے تھا فرق اس آب کا

ہوا ہوتا واں کاش دو آب رز

ہوئے جیسے شائستۂ سیر نز

عجب ڈھب سے کی روشنی صد عجب

کہ دیں چھوڑ ناویں دیے بھر کے سب

جدا ہوویں تو غنچہ غنچہ چراغ

ملے جیسے عاشق کی چھاتی کے داغ

ورے روشنی شعلہ انگیز نار

پرے سطح پانی کا آئینہ وار

ہوئیں کشتیاں کچھ ورے سے پرے

چراغوں سے موجوں کے کوچے بھرے

حبابوں میں تھی جو چراغوں کی تاب

حبابی تھا آئینہ سب سطح آب

نمودار چرخ پر انجم تھی شب

دیوں سے وہ پھیلاؤ پانی کا سب

غرض روشنی کی عجب کچھ تھی لاگ

لگا دی ہے گویاکہ پانی میں آگ

کسو تو زمیں پر رہا چاہیے

کب آوے گا کیا جانے وہ سروقامت

ہمارے تو سر پر ابھی ہے قیامت

نماز سفر ہے اشارت اسی سے

کہ تھوڑا بہت یاں ہے وقت اقامت

رہا رابطہ غارت دل تلک بس

نہیں اب تو بندے سے صاحب سلامت

گریباں کو گل چاک کرنے لگیں گے

کھلے رکھ گلستاں میں بند قبا مت

اٹھاکر نہ یک زخم شمشیر اس کا

غزال حرم نے اٹھائی ملامت

بگڑتی ہے صورت علاقے سے دل کے

کسو بے وفا سے دل اپنا لگا مت

کوئی فصل گل میں بھی توبہ کرے ہے

رہے گی ہمیں دیر اس کی ندامت

کہیں دل کی لاگیں لگیں چھپتیاں ہیں

کہ چہرے کی زردی بڑی ہے علامت

گئی سو گئی پیشتر تھی جوانی

رہ عشق میں میرؔ آئندہ جا مت

زمانے میں ہے رسم کہنے کی کچھ

امید اس سے ہے نام رہنے کی کچھ

کسو سے ہوئی شاہنامے کی فکر

کہ محمود کا لوگ کرتے ہیں ذکر

گیا شاجہاں نامہ کہہ کر کلیم

دل شاعراں رشک سے ہے دونیم

کنھوں نے کہی عشق کی داستاں

ہوا کوئی کہانی سے ہم داستاں

پئے آصف الدولہ میں نے بھی میرؔ

کہے صیدنامے بہت بے نظیر

مگر نام نامی یہ مشہور ہو

گئے پر بھی لوگوں میں مذکور ہو

زہے آصف الدولۂ دادگر

سخنورنواز اور عاشق ہنر

دہش سے جہاں اس کے رونق پذیر

وزیر ابن دستور ابن وزیر

کریمی کرے تو جہاں در جہاں

کف جود خورشید سا زرفشاں

سراپاے احساں تمامی ہمم

ہمہ تن مروت سراسر کرم

ہمیشہ رہے گرم سیروشکار

یہ حرف و حکایت بھی ہے یادگار

قفاے غزل اک رباعی کہو

سخن آگے موقوف چپکے رہو

بہت کچھ کہا ہے کرو میرؔ بس

کہ اللہ بس اور باقی ہوس

جواہر تو کیا کیا دکھایا گیا

خریدار لیکن نہ پایا گیا

متاع ہنر پھیر لے کر چلو

بہت لکھنؤ میں رہے گھر چلو

کرو تامل کہ حال ہم میں رہا نہیں ہے غموں کے مارے

جو کچھ بھروسا جنھوں پہ تھا سو شکیب و تاب و تواں سدھارے

ہوئے ہیں غائر قیامت اب تو گئے جگر تک گئے ہیں دل تک

جو ٹک بھی دیکھے وہ غور سے تو جراحت اس کو دکھائیں سارے

ہماری آنکھیں بہی ہیں اتنی کہ اب ہے دریا محیط عالم

کہیں کہیں جو رہیں ہیں مردم سو بیٹھے ہیں وے کیے کنارے

کریں تحمل سو کاہے پر ہم مدام بے خود ہمیشہ غش ہے

گئی ہے طاقت دلوں سے شاید نہیں ہے آیا جگر ہمارے

کبھو سروں پر ہے تیغ نالہ کبھو سنان فغاں جگر پر

کسو سے کہنے کا کچھ بھی حاصل گئے ہیں جوں توں کے وقت بارے

بھری تھی آتش کہاں کی یارب دل و جگر میں کہ نصف شب کو

لگا جو رونے تو جاے آنسو مری مژہ سے گرے شرارے

قبول عشق و محبت اتنا ہوا ہے اے میرؔ سیر قابل

مدام جاتے دکھائی دوں ہوں کبھو نہ ان نے کہا کہ آرے

چلنے کو ہوئے بادیے سے ہم جو کڑے

مل چلنے کے اتفاق بہتیرے پڑے

مجنوں نے کہا تھا میں بھی آتا ہوں میرؔ

آیا نہ رہے راہ میں ہم دیر کھڑے

mukarrar hai nawwab ko qasd-e-said

bayaban pahnawar ab honge qaid

rawan bahr lashkar hua mauj mauj

gai chashm-e-khurshid tak gard fauj

bihar-o-sahari pe hai arsa tang

magar yan sarasima hain wan palang

pahan baithe hain sher babri libas

karen log shayad faqiri ka pas

chikare hiran donon andesha mand

dilon mein hiras-e-kaman-o-kamand

kahin gurg wadi ko fikr-e-gurez

nazar idhar udhar kare sher tez

banon mein hai ashob-e-kohon mein dar

bayaban watan sare garm-e-safar

kahin amn ho to kahun wan gae

nikal akharon se pareshan gae

asad ki na sherana hankar hai

na kaftar ko tab raftar hai

jahan ke tahan fikr mein hain khare

ke dangal se jangal mein kya ban pare

hawa dud barut se tira rang

sadai tafang-o-sadai tafang

wuhush-o-suturan ko wahshat ghazab

hawa hain kharakte hi patte ke sab

hazaron hi banduq har dam chale

hawa hi mein panchhi pakhero jale

gae badkhur asman mein palat

kalangon ki saf baz ne di ulat

ure hath dochar jarre kahan

rahe murgh-e-abi jahan ke tahan

par tir jis dam kushada hue

baze said had se ziyada hue

banon mein machi dhum si ake dhum

jahan dekhiye hai qayamat hujum

kahin arne mare ghazanfar kahin

kahin hathi nikla hai azhdar kahin

pare mast hathi jo the man chale

sun is shor ko chhor kar ban chale

na tira hai roz-e-gauzanan-o-gor

ke sheron ko bhi qashaarera hai zor

lab-e-ab jakar jo khele shikar

asad wan ke the kaudak ne sawar

hue qarqare said ho ho ke dher

hawa mein se bhaga uqab-e-diler

zaghan in banon mein na pai gai

na tughdar ki lash uthai gai

hua hai yahi to ye honi nahin

ke ho khad akar siyah yan kahin

jigar kya ke purzan ho is ban mein zagh

ye zohra nahin rakhte kohi kulagh

shutarmurgh simurgh azbas hiras

nahin ate koh-e-shumali ke pas

bayaban khush ainda-o-khush faza

sabza hai abjo hai fasl-e-bahar bhi hai

sargarm-e-jalwa dekho pahlu mein yar bhi hai

ye to nahin ke ham par har dam hai be dimaghi

ankhen dikhate hain to chitwan mein pyar bhi hai

gul ham kanar hoga hans kar kabhu chaman mein

par kam baghal hai bulbul us ko qarar bhi hai

hun waada gah mein to par main hi janta hun

kuchh iztirab bhi hai kuchh intizar bhi hai

jun mauj ham baghal hun nayab is guhar se

dariya ki sair bhi hai bos-o-kanar bhi hai

ham jabriyon se kya ho be dast-o-pa-o-ajiz

kahne ko kahte hain to kuchh ikhtiyar bhi hai

kaun is bhabhuke sa hai dekho na tuk bhi to wo

shama-o-charagh-o-shola-e-barq-o-sharar bhi hai

jana muslim aya is khakdan se go phir

mushkil guzar hai rasta gard-o-ghubar bhi hai

dil-e-tang mir kyun hai hamrah wazir ke to

dariya faza hua hai sair-o-shikar bhi hai

utha fauj mein se ye gard-o-ghubar

ke munh par tha khurshid aina war

falak kohre se tha dhuan sa numud

saman shab ka rakhta tha mulk-e-shuhud

zamin thi so thi farsh bala-e-ab

tahlahal se mutlaq na rakhti thi tab

na puchho ke logon ka kya hal tha

jo rakhe qadam wan to bhaunchal tha

ronide lage chalne tezi se chal

hawa mazhab sheyan etizal

kisi dhab se jun tun ke chalna hua

ajab mahlake se nikalna hua

utar log dariya se age gae

hazbaran khunkhwar bhage gae

palangan mardum dar aise dare

ke jate hain kohon ke chhore darre

bayaban mein marna kahan sar dharen

na len rah bar arab kya karen

ruke dil hamare bhi hun bagh bagh

thi bad bhi ane ki chaman mein na rawadar

par kijiye kya gul ki saba bhi hai hawadar

shaista-e-didin hai mire yar ki sohbat

wo sahab nakhwah hai banda hai wafadar

kya khub ho kya zisht ho ro dewe hai sab ko

is arsa mein aina ko dekha hai hawadar

kis taur se yak rang hun ye ashiq-o-maashuq

hai gul kanne zar bulbul-e-be barg hai nadar

kya bekasi se mir ne rehlat ki jahan se

roya na koi us pe na koi hai azadar

banon mein phira karte hain ham to der

nahin bolte dar se gharnada sher

rahe the jo felan mast an kar

gae kajli ban yan se dar man kar

jo un mein se akar lara phir diya

so kath bandhanon se hua fel pa

giriwe kahin the buland aur past

phir urte the wan jaise pilan mast

bahi tegh nawwab is taur se

bahe jadwal-e-tez jis taur se

bahut rah gae zer-e-shamshir-o-tir

bahut ae lashkar mein ho kar asir

lade hathiyon par jo hokar shikar

huin bojh se pusht felan figar

kiye gum jo gainde ne apne hawas

khara ho raha ake bhainson ke pas

ke bhains us ko bhi jan kar lashkari

chale jaen sarsar namat sarsari

na chhora hai tair ek asfor tak

na wahshi kuppi aur langur tak

lage jake shahin-e-dastur yun

pare bakriyon mein kuhan gurg jyun

kalang aise bazon se ae satwo

ke kabal se age gae sad kuroh

nahin qoch sarzan na ayyal na rang

hue qaid ya said kya be dirang

ghazab kargae jarre nawwab ke

ura kha gae khail surkhab ke

na lag lag na titar raha dasht mein

na gham khuark aya nazar gasht mein

sabhon mein jo the qaz-o-saras siras

hue said yun jin pe aya taras

hawasal ko hota agar hausla

tu girta na kheton mein ho da dala

kahin sare taus marte gae

idhar log afsos karte gae

kahin ji uthi thi zamin baad-e-marg

nihal us ke khush qad-e-bisyar barg

na basti se sahra talak sabz the

nazar jae jis ja talak sabz the

hawa dilkash-o-har taraf sabza zar

ke sarson ne ki thi qayamat bahar

khare log mahw-e-tamasha the wan

ke kahne lagi bulbul-e-khush zaban

ke khatir junun se na rakhte nichant

khabar bhi hai tum ko ke ai basant

ye ahd-e-junun hai junun kijiye

jigar ko ghazal kahte khun kijiye

bulbul ke bolne se azar dil ne paya

kya kah gai ke ham ko sunte hi ghash sa aya

nakhchirgah mein us ke jata nahin hai koi

ham ko to shauq mufrat wan ka laga ke laya

anwa ranj ham ne khinche the ashiqi mein

par hijr ke alam ne changa bahut banaya

sufi saf mashrab be hosh-o-be khirad hain

masti ne us nigah ki majlis ke tin chhakaya

mehr-o-wafa-o-ulfat karte the log baham

rahmat-e-khuda ki tum ne is rasm ko uthaya

sar mare to pari ko aisi rawish na ae

kis naz se zamin par parta hai us ka saya

ye janta to hargiz bazar mein na jata

yusuf ke tur mein bhi sasta bahut bukaya

ghairat se ashiqi ke jata nahin hun main to

wo khud ba khud hi awe kash is taraf khudaya

maashuq to hai par wo aubash kaj rawish hai

kya kahiye mir ji se dil ko kahan lagaya

kisu aise jangal mein jana hua

ke mushkil qadam ka uthana hua

nazar gard lashkar pe thi dam ba dam

na tha wan ke zaigham ko kuchh aur gham

koi arsalan bhejta gar rasul

to shayad ke ilhah hoti qubul

so we khun girafta to bhule hue

bahut apne zoron pe phule hue

chale har taraf ab jo akar tafang

na auqat sulh-o-na hangam-e-jang

lagi ag jangal mein chara gaya

ban ai na kuchh muft mara gaya

hawa chehra koi to jun sher sang

na sheri dileri na chehre pe rang

lagi goli parne na phir chal saka

na jagah se uksa na tuk hal saka

chale ham jo bahrach se peshtar

hue said dariya ke wan beshtar

bhare fart hi se to dehat shahr

kahe to ke sote rahe rod-o-nahr

ghate goliyon se magar be shumar

rahe sonas gharyal chanden hazar

jo kuchh zakhm pani mein le kar gae

wahin ho ke nasur mar mar gae

laga kahne bakha sar apna jhuka

ke pani to jalon se sara ruka

agar jaiye tah ko dhans jaiye

wagar gariye sar to phans jaiye

ajab makhmasa hai bachche kyunke jan

yahi maut hai sujhti hai nidan

jawab us ka gharyal ne yun diya

ghari ek do ka hai qissa raha

pari sar pe bajti hai fursat nahin

pahar us ko khinchte hain ab kya kahen

tahammul ho kuchh bhi to tadbir ho

karen kya agar yun hi taqdir ho

koi dasht-e-yak dast ne zar tha

rakhe wan qadam paon afgar tha

yahi saink ya kanas pani ki ghas

zamin-o-hawa ab-o-atish udas

kahin dun lagi hai tamami hai dud

kahin do shajar hain so kya badnumud

na pata na shakhen na kuchh un ko bar

sarapa hai khushk-o-zabun zard-o-zar

na sae se un ke koi bahra mand

na dekha charinda na aya parind

siyahi na hirnon ki daron ne ki

na chashmak kahin se chakaron ne ki

kahin lipte apas mein do char ne

kahin hathi aya kahin sher ne

kahin sarpata sar pe tha jaise tegh

raundon ke paon pe aya daregh

na bulbul ghazal khwan na tairon ka shor

sabhi dekhte mir ke munh ki aur

so un ne ghazal sust si ye kahi

wale dil ko logon ke lagti rahi

zauq-e-shikar us ko hai itna ke had nahin

kis us ke tegh kash pe mulk ko hasad nahin

khali pare hain said se wadi-o-kohsar

rahne do wahash-o-tair ko ab dam-o-dad nahin

be jadd-o-kad jo us se mulaqat ho to ho

tum kad se dekho ho ke hamen us ki kad nahin

kuchh aur shai hai khub jo dekho rukh-e-nigar

harchand gul bhi taza khula itna bad nahin

is bekasi se kaun jahan mein mua ke main

juz dagh sina aj charagh-e-lahad nahin

kya sarw-o-gul se howe tasalli ke ahl-e-shauq

gul munh nahin hai yar ka sarw us ka qad nahin

be soz-e-dil kanhon ne kaha rekhta to kya

guftar kham pesh-e-azizan sanad nahin

sau bar mast kaabe mein pakre gae hain ham

ruswai ke tariq ke kuchh nabalad nahin

lutf-e-sukhan bhi piri mein rahta nahin hai mir

ab sher ham parhen hain to wo shud-o-mad nahin

kisu aise ban se nikalna hua

ke koson talak is mein chalna hua

kashida qad is ban ke sare darakht

chaman ke se naubawagan sabz bakht

barabar barabar khare sar ba sar

phire der udhar ko jakar nazar

pare chal ke aya tarakum bahut

hawas is mein jakar hue gum bahut

kahin rah nikli to chalte pare

rahe pal-o-partal bahut wan khare

ke shakhon ne jhuk jhuk milae the sar

bahut age ja ja ke ae the phir

wahi rah darpesh-o-kasrat hui

qayamat ke upar qayamat hui

saron par idhar top ai chali

pari thi idhar logon mein khalbali

kahin asp-o-ashtar kahin fel-e-mast

zamin har sar-e-gam bala-o-past

guzar jis tarah is tarah se kiya

raundon ne khun-e-jigar hi piya

wahin bech aya miyana mira

koi dekhta ranj uthana mira

sawari se mujh ko nadamat hui

ke charon taraf se malamat hui

lage kahne aya farangi kahan

ke chaupale ki rasm chhore hai yan

jise dekho char un ne rakh kar kahar

laga hone har subh us par sawar

chalo hi chalo hai ke bach jaiyo

ke chaupale ke pas tum ayu

ronide idhar ke idhar hain kharab

ye jate hain mujre ko bhage shitab

charhe char ke kandhe jite hi ji

liya atkal is saude mein nafa bhi

ke ghore diye chhor yak bargi

miyanon mein karte hain awargi

na is hal se ahl-e-daftar khabar

tawajjoh na amdon ki kuchh hai idhar

wagarna ho qadghan ke ab ahl-e-kar

na rahne den lashkar mein doli sawar

na manen to chaupale dewen ulat

abhi ghore len dapaten ek hi dapat

karo mir-e-bahr aur ab ikhtiyar

magar us se niklen dar abdar

jaujo zulm kiye hain tum ne sau sau ham ne uthae hain

dagh-e-jigar pe jalae hain chhati pe jarahat khae hain

tegh daregh nahin hai us ki bismil gah mein kisu se bhi

hain to shikar laghar ham par ek ummid par ae hain

tal kar samne yun bhi ab jo tir tarazu ho us ka

kya kya lohu pi kar dil ko is pale par lae hain

kham se lagi maikhana ke diwar bhi apne ghar ki hai

lutf-e-pir-e-mughan se ajab kya ham akhir hamsae hain

shauq gham mein be sabri hai ah kisu ko kya kahiye

achchhe apne ji ko ham ne ap hi rog lagae hain

mahw-e-sukhan ham fikr-e-sukhan mein rafta hi baithe rahte hain

ap ko jab khoya hai ham ne tab ye gauhar pae hain

dekhen taraf hai kaun si jis se tegh-e-naz buland kare

ham ne bhi to is hi jihat se farq-e-niyaz jhukae hain

tab the sipahi ab hain jogi ah jawani yun kati

aisi thori rat mein ham ne kiya kya sawang banae hain

kis ko aisi be khabari thi jis ke bole to chaunka

so thokar ne in palkon ki kitne fitne jagae hain

kaun wo aisa zalim tha ustad fan ayyari ka

itne sun mein jin ne tujh ko aise fareb sikhae hain

mir muqaddas admi hain the subha ba kaf maikhane mein

subh jo ham bhi ja nikle to dekh ke kya sharmae hain

kiya ek nale se ham ne guzar

hui qaim is ja pe hashr-e-digar

gire gari chhakre piyade sawar

ke maqsad tha sab ka ubur ek bar

gazara jo felon ka pahla hua

mila khak mein ab chehla hua

kamar tak lage phansne daldal ke bich

ke nale ka pani tha yak dast-e-kaich

phanse gao ashtar gire barkhar

hue asp-o-ashtar bhi zer-o-zabar

agarchand bandhe the wo jasar kham

hue ek rele mein donon tamam

na dekhe the age kabhu ye samin

walekin khuda ne utara hamen

salamat raha apna asbab sab

rahe log lashkar ke karte ajab

chale wan se age bandila mila

kiya un ne ek ek ko da dala

ajab rah purkhauf mushkil guzar

na hote the maalum hathi sawar

khatar sher ka shor bangah ka

taab wan ke jane ka gham rah ka

ke ja-o-zamin kuchh huwaida na thi

kahin is mein paggdandi paida na thi

garhe ghar paon ki laghzish bala

chali bao tu ne ki larzish bala

sada barg ne ki nihayat muhib

tariq-e-ajib-o-musafir gharib

junun pesha wo dasht-e-wahshat shiar

ke fel us ke tiflan bazi madar

kahin pani aya so halat kharab

ke tha zer-e-kah is mein har jae ab

na hathi na asbab apne kanne

yahi ik miyana bane so bane

chunancheh gae rawati ke kanar

na rabt ashnai kisu se na pyar

khare ham rahe hath par rakh ke hath

karen par jane ki kis munh se bat

kahar ik miyane main apne diye

phir us ke jo the charon ham ne liye

charh un ke sar an rawe dariya hue

hue pani pani ke ruswa hue

na jana ke ata hai kis ka qadam

ke said-e-bayaban gae karke ram

gauzan ek do mar lae kabhu

ure baz jarre kahin ek su

na said ek dekha bhare lakh rang

ik darj motiyon ke ewaz hath agya

yusuf hazar haif ke sasta buka gaya

jana na tha sirhane se mujh mukhtasar ke hae

kya waqt rah gaya tha ke wo munh chhupa gaya

ashufta sar hain sarw-o-gareban darida gul

baitha kahan chaman mein ke fitna utha gaya

gul barg se bhare the kahe to kanar-o-jeb

kya kya samin na girya-e-khunin dikha gaya

khat bhej ke bhi shauq ki baten chali gain

qasid ke pichhe dur talak mein laga gaya

rota hun yun ke barse hai shiddat se jaise minh

jun abr mere dil pe gham-e-ishq chha gaya

jo naqsh rozgar ke safhe se mahw ho

surat pazir phir nahin hota mita gaya

hasti miri ke hech thi main munfail raha

is sharm se nidan zamin mein sama gaya

dagh-e-dil-e-kharab shabon ko jale hai mir

ishq is kharabe mein bhi charagh ik jala gaya

chale subh gah daman-e-koh ko

tamashakunan fauj-o-amboh ko

darakhton mein chalna to dushwar tha

wale rasta bhi qadam war tha

guzara hua yun hi ik adh kos

pitile pe hangama ara thi os

nayastan mein chhupta tha ghore sawar

agar ho to wan sher ka ho shikar

na rahte the so sher-e-sharza bhi wan

na hathi ke paon ka paya nishan

ajab kashmakash darmiyan agi

baher ik bala thi jahan agi

na hilne ki jagah na chalne ko rah

saron par khare asp-o-fel-e-sipah

khatar fel dashti ka har har qadam

gae sher ke har qadam par qadam

kanar-e-ab ke log utre tamam

hue daman-e-koh mein kuchh maqam

sar-e-koh kyunkar na ho charkh sae

ke nawwab wan sair karne ko jae

rahe ab par farsh chauki-o-takht

khahe rod koh-o-zahe un ke bakht

hamara to jane ko chaha na ji

ke the pir ham wan hua khub thi

rahi munaqid bazm tha nach rag

na ho kuchh to kyunkar ho ye dil ki lag

kahi aur hi bahr mein ye ghazal

magar mir ko hai dimaghi khalal

kar lutf-e-ariz mat chhupa ashiq se ai yar is qadar

yak jan ko ye arze yak dil ko afkar is qadar

jo kuchh hai so dil ke sabab gham ghussa-o-ranj-o-taab

the chahne se peshtar kahe ko bimar is qadar

har dam jo us ke abrwan jumbish mein hain kanpe hai jan

yaani hain ankhen jhunpattiyan chalti hai talwar is qadar

shab nala-o-zari rahe din khastagi khwari rahe

wo dil nahin baqi raha khinche jo azar is qadar

we dil zide hain khasta jan mar jate hain jo nagahan

warna qaza kis shakhs ki pahunchi hai yak bar is qadar

tare se tarrari kare masti mein hushyari kare

aya nazar ab tak nahin tarrar-o-ayyar is qadar

ulfat kahan kulfat hai yan ye bhi ajab sohbat hai miyan

bezar wo is martaba jis se hamen pyar is qadar

tum age kab the badguman sab hujjat-o-yaksar zaban

ab ik sukhan par mehrban karte ho takrar is qadar

ankhen khuli hain mir ki jab dekho tab aina san

adam nahin hote kahin mushtaq-e-didar is qadar

baha sang rezon pe is rang ab

ke qadar un ki jun qadr yaqut nab

liye umde hathon mein dekhen bahar

ke har shai ka hai waqt-e-lail-o-nahar

isi ab ka rabti yan hai nam

hamen sath us ke hai rabt tamam

kinare kinare usi ke hai rah

chale jate hain jo na howe panah

jahan tak hai ab-o-khur ab jaenge

samin dekhenge jo nazar aenge

jabal se hue zahir asar-e-ab

barasne laga qatra qatra sahab

hamen par nahin kuchh hawa ka sitam

kahin gurg wadi ko bhi hai ye gham

kahin aise sukre hain haiwan-e-dasht

ke tukre karo to na hun garm gasht

na nikle hai hathi na bole hai sher

koi yoz pakra hai so baad der

asad yak taraf yoz yak so rahe

ajab ye hai bandhe gae azhdahe

na puchho khincha dur kar-e-shikar

na ab dasht-o-dar mein namir hai na mar

shikarafganan rah karte the tai

mile jate the khak mein dasht ne

na babron ko jangal mein taqat rahi

na magron ko pani mein fursat rahi

asad mare jate the sag ki misal

bandhe ate the yoz-o-gurg-o-ghazal

mila ek chuqqar agar ya garha

tu kasrat se nau neza pani charha

bahut mushkilon se kya hai ubur

ke yak gam rah aur sau sau futur

ke ur jae mir is bihaire ki tah

na dimagh hai ke kisu se ham karen guftugu gham-e-yar mein

na faragh hai ke faqiron se milen ja ke dili dayar mein

na chaman mein jate raha hai dil na banon mein phirne laga hai dil

wahi be kali rahi jan ko rahe sair mein na shikar mein

kahe kaun said ramida se ke idhar bhi phir ke nazar kare

ke naqab ulte sawar hai tire pichhe koi ghubar mein

tire sham khat ke qarib ki jo safa mein dekhi mein khubiyan

na samin pe gul mein nazar pare na ye rang subh-e-bahar mein

koi shola hai ke sharara hai ke hua hai ye ke sitara hai

yahi dil jo le ke guren ge ham to lagegi ag mazar mein

jhuki kuchh ke ji mein chubhi sabhi hili tuk ke dil mein khabbi sabhi

ye jo lag palkon mein us ke hai na chhuri mein hai na katar mein

mire ek dil mein jo gham ye hai so fuzun hai mere shumar se

na to das mein ye na pachas mein na to so main ye na hazar mein

bare janwar-e-khwar kya kya hue

bandhe pae felan se ruswa hue

bahut nale khole pakhale gae

bihairon se roho nikale gae

magar ki pas az marg izzat hui

ke hathi pe charhne ki rukhsat hui

kashf ka hua hai ye ausaf ab

ke jhingon ne ki sharh-e-kashshaf ab

na titar bater aur kabutar mila

diye baz jarron ko sare khula

kahin bahri pani mein yun ja lage

ke panjon mein be said idhar a lage

hawa mein se yun kar utare kalang

ke bazon ne chiriya se mare kalang

kisu aur arnon ko dekha khare

kahe to bayaban mein hathi pare

jigar karke jate the mardan-e-kar

to wo ek do kar hi late shikar

wagarna bashar ka na maqdur tha

qarib us ke jana bahut dur tha

na in charshanon ka rukash hai sher

na so fel dochar rakhte hain gher

madadgar the hazrat-e-zinda pil

pakar late the log tab zhanda pil

bihaira na dariya-e-aazam se kam

utha karte the laje latme baham

har ik mauj us ki samundar ki lahr

kinare pe girdab gharqab qahr

yahi jangal is jhil ke as pas

darakhton ka amboh ne ka ugus

isi ban mein sher aur yoz-o-palang

isi ban mein gor-o-gauzan aur rang

isi ban mein hathi wahin kargadan

wahin qoch sarzan isi mein hiran

isi ban mein langur bandar bhi the

wahin ek do ham qalandar bhi the

isi ban mein parha wahin nil gao

isi ban mein ye saidbandi ka chao

isi ban mein the hazrat-e-buhamid

isi ban mein nisnas un ke murid

isi ban mein the khuk jamosh rang

kya is soriban ne logon ko tang

isi ban mein rahna isi ban mein rah

wahin sham ka husn lutf-e-pagah

isi ban mein wo jhil gahri bahut

hue said buri-o-bahri bahut

wahin machhli bikti thi damri ki sair

walekin na khata tha ho koi sair

ke is ab ka hazm dushwar tha

ke jun ab-e-shamshir dam dar tha

shaghal aur khargosh ji se gae

shikari sag un ko uchak le gae

ke is masnawi mein kahin muttasil

hai gi talab shart yan kuchh to kya chahiye

baithe nahin banti miyan kuchh to kya chahiye

ishq mein ai hamrahan kuchh to kya chahiye

girya-o-shor-o-fughan kuchh to kya chahiye

hath rakhe hath par baithe ho kya be khabar

chalne ko hai karwan kuchh to kya chahiye

main jo kaha tang hun mar marun kya karun

wo bhi laga kahne han kuchh to kya chahiye

suwun kise rahne ki kis ne badi hai bhala

lutf-o-ghazab mehrban kuchh to kya chahiye

kam ab apna hai yan kundan jan har zaman

kya karen ham natawan kuchh to kya chahiye

kya karun dil-e-khun karun sher hi mauzun karun

chalti hai ab tak zaban kuchh to kya chahiye

ho na sake gar namaz dil ki taraf kar niyaz

waqt gaya phir kahan kuchh to kya chahiye

chahun kisu se dua dil ki karun ab dawa

nafa ho phir ya ziyan kuchh to kya chahiye

umr gai laghw sab waqt bahut kam hai ab

kuchh na kiya hae miyan kuchh to kya chahiye

ye to nahin dosti ham se jo tum ko rahi

pas dil-e-dostan kuchh to kya chahiye

tune kaman ki hai zeh par hun na yun said mein

meri bhi khatir nishan kuchh to kya chahiye

mir nahin pir tum kahili allah re

nam-e-khuda ho jawan kuchh to kya chahiye

kinare pe thi us ke ik gul zamin

sarasar hari jun zamurradnagin

jahan tak nazar jae shadab thi

ke yak dast-e-waqe lab-e-ab thi

wahin kheme sab ke hue the khare

wahin dam rahte the aksar pare

nawaron ki sair is mein har sham gah

wahi sairgah-o-wahi dam gah

wahin said hun murgh-o-mahi tamam

maqam aise howen to kariye maqam

hawa khema akar jo nawwab ka

falak sae tha farq is ab ka

hawa hota wan kash do ab-e-raz

hue jaise shaista-e-sair-e-naz

ajab dhab se ki raushni sad ajab

ke den chhor nawen diye bhar ke sab

juda howen to ghuncha ghuncha charagh

mile jaise ashiq ki chhati ke dagh

ware raushni shola angez nar

pare sath pani ka aina war

huin kashtiyan kuchh ware se pare

charaghon se maujon ke kuche bhare

hababon mein thi jo charaghon ki tab

hababi tha aina sab sath-e-ab

numudar charkh par anjum thi shab

diyon se wo phailao pani ka sab

gharaz raushni ki ajab kuchh thi lag

laga di hai goyake pani mein ag

kisu to zamin par raha chahiye

kab awega kya jane wo sarwqamat

hamare to sar par abhi hai qayamat

namaz-e-safar hai isharat usi se

ke thora bahut yan hai waqt iqamat

raha rabta gharat dil talak bas

nahin ab to bande se sahab-e-salamat

gareban ko gul chak karne lagenge

khule rakh gulistan mein band-e-qaba mat

uthakar na yak zakhm-e-shamshir us ka

ghazal-e-haram ne uthai malamat

bigarti hai surat ilaqe se dil ke

kisu be wafa se dil apna laga mat

koi fasl-e-gul mein bhi tauba kare hai

rahegi hamen der us ki nadamat

kahin dil ki lagen lagen chhuptiyan hain

ke chehre ki zardi bari hai alamat

gai so gai peshtar thi jawani

rah-e-ishq mein mir ainda ja mat

zamane mein hai rasm kahne ki kuchh

ummid us se hai nam rahne ki kuchh

kisu se hui shahname ki fikr

ke mahmud ka log karte hain zikr

gaya shajahan nama kah kar kalim

dil shayaran rashk se hai donim

kanhon ne kahi ishq ki dastan

hawa koi kahani se ham dastan

piye asaf alddaula main ne bhi mir

kahe saidname bahut be nazir

magar nam-e-nami ye mashhur ho

gae par bhi logon mein mazkur ho

zahe asaf alddaula-e-dadgar

sakhnornawaz aur ashiq hunar

dihish se jahan us ke raunaq pazir

wazir ibn-e-dastur ibn-e-wazir

karimi kare to jahan dar jahan

kaf-e-jud khurshid sa zarfishan

sarapa-e-ehsan tamami himam

hama tan murawwat sarasar karam

hamesha rahe garm sairoshikar

ye harf-o-hikayat bhi hai yadgar

qafae ghazal ik rubai kaho

sukhan age mauquf chupke raho

bahut kuchh kaha hai karo mir bas

ke allah bas aur baqi hawas

jawahir to kya kya dikhaya gaya

kharidar lekin na paya gaya

mata-e-hunar pher le kar chalo

bahut lakhnau mein rahe ghar chalo

karo taammul ke hal ham mein raha nahin hai ghamon ke mare

jo kuchh bharosa janhon pe tha so shakeb-o-tab-o-tawan sidhare

hue hain ghair qayamat ab to gae jigar tak gae hain dil tak

jo tuk bhi dekhe wo ghaur se to jarahat us ko dikhaen sare

hamari ankhen bahi hain itni ke ab hai dariya muhit-e-alam

kahin kahin jo rahen hain mardum so baithe hain we kiye kinare

karen tahammul so kahe par ham mudam be khud hamesha ghash hai

gai hai taqat dilon se shayad nahin hai aya jigar hamare

kabhu saron par hai tegh nala kabhu sinan-e-fughan jigar par

kisu se kahne ka kuchh bhi hasil gae hain jun tun ke waqt bare

bhari thi atish kahan ki yarab dil-o-jigar mein ke nisf-e-shab ko

laga jo rone to jae ansu miri mizha se gire sharare

qubul ishq-o-mohabbat itna hua hai ai mir-e-sair qabil

mudam jate dikhai dun hun kabhu na un ne kaha ke are

chalne ko hue badye se ham jo kare

mil chalne ke ittifaq bahutere pare

majnun ne kaha tha main bhi ata hun mir

aya na rahe rah mein ham der khare