شکار نامۂ اول

چلا آصف الدولہ بہر شکار

نہاد بیاباں سے اٹھا غبار

روانہ ہوئی فوج دریا کے رنگ

لگا کانپنے ڈر سے شیر و پلنگ

طیور آشیانوں سے جانے لگے

وحوش اپنی جانیں چھپانے لگے

سن آواز شیران نر ڈر گئے

پلنگ و نمر خوف سے مر گئے

جہاں ببر آیا نظر صید تھا

بیاباں اسی پہن سے قید تھا

گئے مست ہاتھی مکانوں کو چھوڑ

دیے پنجۂ شیر نلیوں سے توڑ

نہ دیکھا نہ ہم نے سنا یہ شکار

کہ بکری سا ہاتھی کو لیتے ہیں مار

پلنگان صحرا کے دل خوں کیے

نہنگان دریا ہوئے مرجیے

کہاں سہل مارے گئے نرہ شیر

لگے بکریوں کو پکڑتے بھی دیر

ہوئے لشکری جب کہ سرگرم گشت

مقید ہوئے مست فیلان دشت

گئے جانور دشت خالی رہے

بیابان جھاڑے گئے توکہے

عجب تر ہے یہ صید کرنے کا ڈھنگ

کہ چو رنگ ہاتھی ہوئے بے د رنگ

نہ چیتل نہ پاڑھا نہ ارنا نہ شیر

ہوئے گولیاں کھا کے یک لخت ڈھیر

درندوں کا پیدا نہ نام و نشاں

نہ شیر ژیان و نہ پیل دماں

کبھو فیل دشتی نہ جکڑے گئے

نہ یوں بھیڑ بکری سے پکڑے گئے

سنا جس طرف فیل دشتی کا میل

رواں فوج ادھر کو ہوئی سیل سیل

اگر ٹک بھی اٹکا تو مارا گیا

پڑے سینکڑوں پھاند چارا گیا

وگر سرکشی سے کی استادگی

تو پیش آئی اک طرفہ افتادگی

پہاڑ ایک ہاتھی مقابل ہوا

بزور آمد و شد کا حائل ہوا

جٹے دونوں وے دیو میدان میں

اٹھا شور محشر بیابان میں

جہاں دونوں فیلوں کی تھی سرزنی

شتر مرغ سے واں نہ ہو پر زنی

جو اس مار کھانے پہ اکڑا رہا

کئی روز رسوں سے جکڑا رہا

رہے کس طرح پھٹ گیا تھا جگر

موا دوپہر میں لہو موت کر

مگر سرکشی سے نہ اپنی ہٹا

نہ میدان میں ٹک دبا ٹک گھٹا

اشارہ ہوا اس کے چورنگ کا

سبھوں کو ارادہ ہوا جنگ کا

برسنے لگا مینھ تیروں کا زور

ہوا فیل باراں کا جنگل میں شور

لگی پڑنے بجلی سی تیغ سپاہ

پریشان ہو جیسے ابر سیاہ

نہایت وہ ہاتھی ہوا لخت لخت

گرا یوں کہ جیوں پارۂ کوہ سخت

رکھا لاکے لشکر میں اثناے راہ

سر اس کا کٹا جیسے برج سیاہ

رہے کہتے اس دن عجب سب ہے یہ

سر فیل ہے یا سر شب ہے یہ

اگر دیو ہیں سرگرانی کے ساتھ

نہ اس تیرگی و کلانی کے ساتھ

دماں خشم گیں جیسے آتش یہ تھا

مگر فیل سر دیو سرکش یہ تھا

گوزن اور ہرنوں کی کیا دیجے شرح

گئے شیر مارے سو کتوں کی طرح

گیا دشت در دشت شور شکار

ہوئے گرگ آہو کے اوپر سوار

ہرن جھانگیوں میں رہے گھومتے

کھپے فیل بیلوں ہی میں جھومتے

برابر رہے گور و شیر ژیاں

برابر تھا دونوں کو وسواس جاں

گئے پیشتر چھوڑ نخچیرگہ

شغالوں کی روباہ بازی تھی یہ

اس اوقات سے جوکہ بے ہوش تھے

بہیروبنہ کے وے خرگوش تھے

اگر ریچھ نکلا تو تھا سو بہ سو

بہت مضطرب تھا وہ آشفتہ مو

قلندر سپاہی پئے جاں ہوئے

لیے اس کو سر در گریباں ہوئے

علف آب گوں تیغ کا پھر ہوا

کہیں پاؤں اس کے کہیں سر ہوا

موئے اس طرح حضرت بوحمید

کہ جوں ہوتے ہیں گے بڑے سے پلید

گرے پشت سوے فلک خاک پر

اک انبوہ تھا جسم ناپاک پر

گئے لادنے فیل پر لشکری

یہی ذات تھی لائق برتری

کروں صید ماہی کا کیا میں بیاں

کہ فیلوں پہ تھے تودہ تودہ رواں

پڑے سینکڑوں دام تالاب میں

نہ چھوٹی تنک خاک اس آب میں

نہ تیتر نہ طاؤس صحرا کے بیچ

نہ ماہی نہ مرغابی دریا کے بیچ

رہے گوشت ہی پکتے ہر صبح و شام

جواں کھاگئے مرغ و ماہی تمام

ہوا حائل راہ بحر عمیق

کہ ہو وہم ساحل پہ جس کے غریق

قریب آکے اتری یہ خائف تھی فوج

کہ بے ڈول اٹھتی تھی ہر ایک موج

مہیب اور آلودۂ خاک و آب

بعینہ پھٹی آنکھ تھا ہر حباب

غضب لجہ خیزی بلاجوش پر

تلاطم قیامت لیے دوش پر

چلے بس تو کچھ کوئی چارہ کرے

مگر دیکھ ہی کر کنارہ کرے

تردد میں ہر اک کہ ہوں کیونکے پار

کنارے پہ سرگشتہ گرداب وار

رواں آب ایسی روانی کے ساتھ

کہ جوں رفتگی ہو جوانی کے ساتھ

لگے پاؤں چلنے جہاں شور تھا

کہ کم آب میں بھی بڑا زور تھا

تامل سے اقبال نواب دیکھ

توقف کیا پہلے تو آب دیکھ

پھر اس پار جاکر اشارہ کیا

کہ لشکر نے ووہیں گزارہ کیا

شباشب اترنے لگے لشکری

نہ جوش آب کا وہ نہ ویسی تری

وہ سوتا جگاتا تھا جس کا خطر

اٹھا شور سے فوج کے چونک کر

نشہ اس کے سر سے اتر سا گیا

چڑھائی سے لشکر کی ڈر سا گیا

کچھ اک ناویں لے کچھ شجر کاٹ کر

شتابی سے دریا کے تیں پاٹ کر

اترنے لگا لشکر بیکراں

کراں تا کراں تھی یہ محشر عیاں

سلامت ہوا پار سب ازدحام

رہے دنگ خضر علیہ السلام

شکار اس کنارے بھی تھا بیشتر

ہوئے صید یاں کے جگر ریش تر

گئے ارنے مارے سو مانند فیل

ہوا خون جنگل میں ان کا سبیل

رہے گور راتوں کے تیں جاگتے

گئے ببر کوسوں تلک بھاگتے

پکڑ لائے چیتے گوزن اور گور

عصا سے چلے راہ یاں مار و مور

بہت ہم نے دیکھے وزیر و شہاں

شکار ایسے دستور سے تھا کہاں

نمک خوار مجھ سے تو ہیں گے ہزار

پہ میرا بھی ہونا ہے یھاں یادگار

غرض میرؔ تا دور چرخ بلند

رہے آصف الدولہ اقبال مند

کرے اس کا اقبال ہر لحظہ کام

شکار اس کے دشمن رہیں صبح و شام

ٹک اس بھی زمیں پر رہا چاہیے

ہم وحشیوں پہ کچھ ہو کاہے کو یار ہے تو

اے ترک صیدپیشہ کس کا شکار ہے تو

پہنچی قریب شاید نخچیرگاہ اس کی

جوں صید خوں گرفتہ دل بے قرار ہے تو

دل تجھ تلک رسائی مشکل ہے چشم تر سے

عسرالعبور کیسے دریا کے پار ہے تو

شہری ہیں اس کی آنکھیں کیا تجھ کو ان سے نسبت

اے آہوے بیاباں اچھا گنوار ہے تو

کیا صبح جلوہ گر ہو خوبی کے آگے تیری

اے گل دم تبسم باغ و بہار ہے تو

یھاں دو قدم بھی چلنا بن سر دیے نہ ہووے

اے راہ عشق کتنی مشکل گذار ہے تو

لیتا ہے تجھ سے عبرت جو کوئی دیکھتا ہے

کیا میرؔ اس گلی میں بے اعتبار ہے تو

باز قدم رنجہ فرمودن آصف الدولہ بہادر روز دیگر براے شکار

چلا پھر بھی نواب گردوں شکار

اسد باؤ کے گھوڑے پر ہو سوار

روانہ ہوئی فوج دریا مثال

نہنگوں کی اب کھینچی جاوے گی کھال

گیا شور تا آسمان بریں

ہوئی گرد افواج گردوں قریں

زمیں ہوگئی جاے خوف و خطر

فلک کو لگے دیکھنے شیرنر

چڑھا بسکہ دریاے فوج گراں

اتر ہاتھیوں کی گئیں مستیاں

دبی چپ لگا چلنے بھیڑوں کی چال

پریشاں ہے گرگ بغل زن کا حال

پلنگوں نے کہسار سے راہ لی

نہنگوں نے دریا کی جا تھاہ لی

بحیرے جو تھے دام سے چھا گئے

کشف نیچے ڈھالوں کے گھبرا گئے

درندے پرندے چرندے کھپے

گزندوں کے منھ گرد نیچے ڈھپے

تلف جانور ہیں جہاں کے تہاں

گوزن اور گور اور آہو کہاں

رہے گور یک شاخ و یک سو غزال

تزلزل میں ہیں کیا شجر کیا نہال

شغال اور روباہ و خرگوش سے

نہیں بحث کچھ یہ ہیں بے ہوش سے

کوئی شور سن سن کے گھبرائے ہے

کوئی کان ڈالے چلا جائے ہے

کوئی ڈھونڈتا ہے بیاباں میں جھاڑ

کوئی چاہے ہے پھاند جاؤں پہاڑ

کہ شاید یہ اودھر نہ ہو کل مکل

کوئی دن جیے اس بلا سے نکل

پھرے مضطرب ہو کے شیر غریں

کہ بیشوں میں تھی یا کماں یا کمیں

نکلتا ہے کفتار پر بے حواس

ہزبر جگرخوار سب ہیں اداس

کیا کام ڈرتے گئے پھٹ جگر

بن آئی ہی مر مر رہیں ہیں نمر

اگر خرس تھا مفتر و بدمعاش

لگا موش خانے کی کرنے تلاش

وگر ببر ہے پیش و پس ہے نگاہ

نہیں سوجھتی بے حواسی سے راہ

مبادا شکاری سگان رکاب

گریں آکے مجھ تک بھی پہنچیں شتاب

ہوا آب زہرہ وہ شیری گئی

جگر ڈر سے ہے خوں دلیری گئی

ہوئی صیدبندی کی جنگل میں دھوم

گرے فیل جیسے گھٹا آوے جھوم

بیاباں میں چھایا ہے کیا ابر مرگ

برستی ہے گولی بسان تگرگ

لڑائی نہیں ہوں جو مصروف جنگ

اڑیں رنجکیں اڑتے دشمن کے رنگ

جو آتا ہے پلٹن کو کچھ ولولہ

چلے ہے کوئی توپ ہے زلزلہ

اگر جاے تھی اس کی کوہ گراں

گیا شیر پھنکے بھی جاگہ سے یھاں

نہ دل مرد ہے ببر و گرم شتاب

دل شیر برفی بھی ڈر سے ہے آب

نہ رنجک کے اڑنے کا اچھا ہے طور

ہوا آن ہی میں زمانہ کچھ اور

ہوئی گرم آتش زنی سے ہوا

رکھا آب میں جا کے لگ لگ نے پا

محیط آب گیروں کے تھے مردکار

موئے مالک الحزن چندیں ہزار

بہت دام پانی کی جانب جھکے

کھڑے رہ گئے رود کیا کیا رکے

ٹھٹک سونس گھڑیال رہ رہ گئے

مگرمچھ نہ جانے کدھر بہہ گئے

نہ قشقل نہ سلی نہ سرخاب ہے

تمام ان کے لوہو سے سرخ آب ہے

عجب روغن قاز ملتے تھے یار

کہ قازوں کو لیتے ہوا میں سے مار

منگاتے تھے بطخ کی چربی ظریف

سو وہ چربی اب پھینک دیں ہیں حریف

ہوئے کتنے اقسام ماہی شکار

نہ آوے قسم کھائے بن اعتبار

مگر مرگ ماہی تھی جالوں کے بیچ

کہ یوں مچھلیاں سب نکالیں الیچ

نہ ارنب ہے جنگل میں نے سوسمار

کوئی بدوی کیا کھاوے پروردگار

کلنگوں کی الٹی گئی صف کی صف

ہوئے بیچ میں قرقرے بھی تلف

نہ سبزے گئے سبزہ کھا کھا کے چیت

بزے ویسے ہی آئے کھیتوں میں کھیت

بٹیر اور تیتر کا ہے کیا شمار

کہ باز آگئے جرے کرتے شکار

ہوا زرد سبزک بہت دل میں ڈر

نمدمو ہوا گرد سے شانہ سر

خطرناک تھا دشت کیا کہیے مور

دبا یوں پھرے جیسے دبتا ہے چور

نہ پاڑھا نہ نیلا نہ چیتل کوئی

بنوں میں جو دوں تھی گئی جل کوی

کوئی میرؔ صاحب غزل یاں کہو

پر ایسی کہ ویسی کسی سے نہ ہو

کیا کشت و خوں پہ ان دنوں میلان یار ہے

ہر جاے پوچھتا ہے کہ یاں کچھ شکار ہے

جاتا ہے اس کشندے کی جانب چلا ہوا

صید ازل رسیدہ ہے دل بے قرار ہے

آنکھیں جو میری باز ہیں جوں صید بسملی

اس ترک صیدبند کا یہ انتظار ہے

عزت جو اس گلی میں ہے اپنی نہ پوچھیے

جب جایئے تو خشم ہے گالی ہے مار ہے

جانیں چلی گئیں ہیں بہت قلب گاہ سے

تو رہ کے جا کہ راہ ابھی پرغبار ہے

ہے زلف و روے یار سے ہر لحظہ بحث یھاں

یہ وجہ ہے کہ شعر مرا پیچدار ہے

کم اختلاطی کا ہے گلہ یار سے عبث

کس کشتۂ وفا سے بہت اس کو پیار ہے

گل گل شگفتگی ہے ترے چہرے سے عیاں

کچھ آج میری جان قیامت بہار ہے

کیا میرؔ تم کو گریۂ شب سے ہے گفتگو

طوفان میری پلکوں کا سردرکنار ہے

نشیب و فراز بیاباں کو سن

جو ذی ہوش ہیں وے تو ہوتے ہیں سن

چڑھو آسماں پر جو آوے چڑھاؤ

پھر اترو تو تحت الثریٰ ہی کو جاؤ

جو اس میں کہیں ہووے لغزش تو خیر

کہ درپیش ہے اور عالم کی سیر

زمیں ضیق ازبس ہوئی یک بہ یک

نہ پھیلا سکا پاؤں گزپا تنک

ملے پر سے پر تھے ہوا میں کلنگ

کہ چلنے لگے یاں سے تیر و تفنگ

قیامت تھی آفت تھی ہر ایک چوٹ

لگے جس کے پھرتا وہیں لوٹ پوٹ

ہوئے خون اس جمع کے بے درنگ

ہوا کا ہوا اور اک دم میں رنگ

نہ پر تھا نہ پرزا نہ بازو نہ پا

کنھوں نے بھی پوچھا نہ یوں تھا یہ کیا

نہ زردی کو دیکھا نہ پایا کبود

نکالا ہے لوگوں نے پانی سے دود

سپہ کی بلا ترک تازی رہی

نہ سارس کی وہ سرفرازی رہی

کماں دار مردم سے چارہ گیا

کسو کھیت پر مفت مارا گیا

نہ جو فیل دشتی کی مستی گئی

وہیں مٹ گیا اس کی ہستی گئی

سنانوں کی نوکوں پہ پھر بٹ گیا

وہ کوہ گراں سنگ سب پھٹ گیا

بہت جانور چھوڑ آکھر گئے

لگی دوں بہت جل گئے مر گئے

اگر بن ہے گویا بنا ہے اسے

کرے قصد واں کا تو کیوں کر گھسے

مگر زور سے کچھ نکلتا ہے کام

بہت رنج کھینچے سے چلتا ہے کام

خریدار دستار سرخار بن

زمیں پر رکھو پاؤں کانٹوں کو چن

کئی گام یوں راہ چلنا پڑے

پھر اس دامگہ سے نکلنا پڑے

تو آگے بیابان پرخار ہے

کہیں جھاڑ بوٹا کہیں غار ہے

اگر اس میں پانی نظر پڑ گیا

کنارے پہ اس کے یہ چڑھ کر گیا

ہوا حال اپنا پریشاں بہت

پھرے مضطرب اور حیراں بہت

ترائی جو واں سے گذرنا ہوا

کہاروں کے سر چڑھ اترنا ہوا

بیابان وحشت اثر پرخطر

یہی ڈر ہے ڈر کیا ادھر کیا ادھر

جہاں تک نظر جائے سوکھی ہے کانس

اگر سبزہ بھی تھا تو تھوہڑ کا بانس

کہیں دل رکے بند ہوجائے دم

لکھوں کیا نیستاں ہی تھے یک قلم

چلے باؤ دن کو تو ہو سائیں سائیں

پڑے رات تو پھر کرے بھائیں بھائیں

نہ سبزہ نہ کھیتی نہ آب رواں

کوئی شیر غراں کہ پیل دماں

سو وہ شیر مارا گیا مثل سگ

وہ ہاتھی پکڑ لائے بے تاز و تگ

کوئی دشت ایسا کہ تھا سبزہ زار

ہوا دلکش و جرگہ جرگہ شکار

اگر آہوگیری کا ہوتا نہ عیب

تو وہ ہم بھی رکھ لیتے بے شک و ریب

مسطح زمیں میل در میل تھی

نہ دریاچہ تھا کوئی نے جھیل تھی

اگر آگیا رودخانہ کہیں

نہ دلخواہ تھا واں سے جانا کہیں

بڑا لطف تھا سیر میں گشت میں

نہ تھی دخت رز حیف اس دشت میں

ہوا اک جبل سامنے سے سیاہ

اسی کی طرف کو پڑی سب کی راہ

عجب لطف کا تھا وہ کوہ گراں

کہ صد چشمہ کا اس میں پانی رواں

شجر سبز و پتھر بہت صاف تھے

سبھی جیسے الماس شفاف تھے

ہوا ایک ابر اس جبل سے بلند

ہوا پر بچھے اس کے یزدی پرند

پہر دن سے بارش لگی ہونے زور

رہا ساری وہ رات طوفاں کا شور

ہوئے خیمے پانی کے اوپر حباب

سب اسباب لوگوں کا تھا زیر آب

نہ پوچھ اور اسباب مردم کا حال

نہ چادر رہی خشک نے کوئی پال

قنات اور تنبو بسر سب گئے

کھڑے تھے جو کندے اتر سب گئے

بھرا پانی لشکر میں پھیلا ہوا

اگر فرش بستر تھا تھیلا ہوا

ہوا سرد ازبس ہوئی ایک بار

کلیجوں کے ہوتی تھی برچھی سی پار

پھرے باد سے لوگ منھ ڈھانپتے

جگر چھاتیوں میں رہے کانپتے

رہا ایسی سردی میں کیدھر شکار

ہوئے لوگ خیموں کے اندر شکار

بہت پیر جب جی کو تجنے لگے

جوانوں کے بھی دانت بجنے لگے

تہ میغ خورشید پنہاں ہوا

نہ دیکھا مگر روے جاناں ہوا

بہت اسپ و اشتر موئے پاؤں پیٹ

نکالا انھیں خیمہ گہ سے گھسیٹ

تامل کرو دل جگر خوں کرو

وہ دل شکار آن جو نکلا شکار کو

انداز یک نگاہ سے مارا ہزار کو

چلنا پڑے ہے رکھ کے قدم تیغ تیز پر

کس ڈھب سے کاٹیں اس رہ مشکل گذار کو

اڑنے لگے ہے باد میں تو جاں گزا ہے پھر

خجلت ہی اس کی زلف سے ہے تیر مار کو

سو بار منھ چڑھاتے ہو کچھ بولتے نہیں

یہ بات کیا چڑھو ہو کہے اپنی بار کو

آتا نہیں نظر کہ حصول امید ہو

کیا تھام تھام رکھیے دل بے قرار کو

جیتے رہے تو اس سے ہم آغوش ہوں گے ہم

لبریز گل سے دیکھیں گے جیب و کنار کو

کیا سمجھے خوبی میری خراش جبیں کی تو

اس کام کو دکھا کسی استاد کار کو

ایسے ستم کیے کہ گیا جی سے میں ندان

ٹک منصفی سے دیکھو پھر انصاف یار کو

بولا کہ مجھ کو کرتی ہے بدنام گور میرؔ

ہے خوب اگر مٹاوے کوئی اس مزار کو

کسو بن میں ارنوں کا پاکر نشاں

لگی جانے ہر صبح فوج گراں

مقابل ہوا آکے جوں فیل مست

اگر فیل تھا تو ہوا اس کا پست

غضب ہے خدا کا کوئی اس کے چوٹ

اگر اسپ اشتر ہے تو لوٹ پوٹ

نہ خوک اس کی جنگل میں گھیرے ہے راہ

نہ شیر اس کی جانب کرے ہے نگاہ

بڑی دیر جنگل میں دوڑا پھرا

لیا زیر بندوق آخر گرا

لگی بہنے شمشیر جدول شعار

لگے قیمہ کرنے جوانان کار

بہت ایسے مارے بہت کٹ گئے

نظر کرکے ہیئت جگر پھٹ گئے

کسو بن میں رونق نہ پائی گئی

پھر اس پر جو ایسی اوائی گئی

جگر واں کے شیروں کے پھٹ پھٹ گئے

بیابان سے کرگدن ہٹ گئے

نہ فیلوں میں سدھ بدھ نہ شیروں میں زور

نہ چیتوں کو جاگہ نہ گوروں کو گور

نہ بوٹی کو چھوڑا نہ باقی ہے جھاڑ

پہاڑوں کو راہوں سے ڈالا اکھاڑ

پرندہ جہاں پر نہ سکتا تھا مار

ہوا رہکلے توپ کا واں گذار

نکل شیر جنگل سے حیراں ہوئے

اڑاہے جو تھے صاف میداں ہوئے

جہاں چلتے پھرتے نہ تھے مار و مور

چلے پہروں واں تیر بندوق زور

شغال اور خرگوش و ہم روبہاں

شکاری سگوں نے کیے نوش جاں

ہوا پر جو تھے مرغ پرواز میں

گرے سینکڑوں ایک آواز میں

بہت جانور کھا گئے کر کباب

ہوئے آشیانے ہزاروں خراب

حواصل تھا کیا جو کہوں تھا کہیں

کہ تعداد کشتوں کی پاتے نہیں

بہت مضطرب جھانگیوں میں پھرے

سلامت نہ آخر گئے برسرے

انھوں ہی میں سیمرغ بھی تھا مگر

کہ پر مارتا ہی نہیں کوہ پر

نہیں فیل مرغ اور شتر مرغ اب

کہ بعضوں کے طعموں کے کام آئے سب

کسو بن میں تھے نیستاں اور کانس

چلے راہ واں لے نہ سکتے تھے سانس

برس مینھ دو دن میں کھل بھی گیا

ولیکن ہے کہرا لطیفہ نیا

کہ اندھیر تھا جیسے ظاہر ہو دود

ہوئے ہونٹھ سردی سے سب کے کبود

بلا دھوم سے کوئی گھبرا پڑے

جنھیں دیکھو وے کانپتے ہیں کھڑے

ہوا سرد ہوکر گئی جان مار

اٹھایا بڑا لطف سیر و شکار

دل اس دود تیرہ سے گھبرا گیا

کہیں آگ دیکھی تو جی آگیا

یہی چال تھی ایک دو چار کوس

ہوا ٹھنڈی ٹھنڈی پڑی ایسی اوس

کسو کوہ کے پاس نکلی جو راہ

گئی کوہ کی تیغ تک کم نگاہ

بلندی تھی اس کوہ کی تا فلک

نگہ جاتے ہی جاتے جاتی تھی تھک

نہ اس رنگ سے صید ہوں گے کہیں

ہوئی خون کے رنگ رنگیں زمیں

جہاں دام اور دد کی تھی بود و باش

لگے چوک لوگوں نے کی واں معاش

ہوا ایک جنگل میں آکر گذر

کسو کو نہ تھی واں کسو کی خبر

تراکم قیامت تھا اشجار کا

ستم پھر ہواے ستمگار کا

کہ اس مرتبہ بارد و سرد تھی

ہوئے سن مگر برف پرورد تھی

کوئی خاربن حائل رہ ہوا

پھٹے پیرہن ہوش سب تہ ہوا

درختان بے برگ و بر بدنما

نہ اک شاخ پر مرغ رنگیں نوا

بہت سر ملائے بہم تھے شجر

ولیکن نہ پایا کنھوں نے ثمر

نہ قمری ہوئی نالہ پرداز ٹک

نہ بلبل کی واں آئی آواز ٹک

یہی کل مکل تھی یہی کشمکش

پھرے مارتے سر کو دیوانہ وش

درختوں کے انبوہ سے رک گئے

چلے اتنے جھک کے کہ ہم جھک گئے

اگر شاخ جاگہ سے اپنی ہلی

تو کانٹے سی ہم رہرواں پر چلی

جو اس دشت میں تھا کوئی صید بھی

سو آگے ہی وہ ہوگیا قید بھی

رہائی ہی مقصود تھی واں سے یار

پڑی اپنی سب کو کہاں کا شکار

کہوں کیا کہ یکسر تھے اس میں قلم

چلے روسیہ اور سو سو بہم

نہ چھوٹی تھی جاگہ قدم وار بھی

نہ اٹھتا تھا اک نالۂ زار بھی

کہ دل کو کسو کے لگے جوں خدنگ

ہوئے ایسے سنسان جنگل میں تنگ

نکلنا ہوا کھینچ کر یہ عذاب

ملا بیشتر ایک تہ دار آب

رواں تھا کسو کی طرف تند و تیز

ہوا اس کے چلنے کی تھی پیش خیز

حباب اس کا چشمک زناں موج پر

کہ یوں گرم جاتے ہیں اہل نظر

طلبگار کرتے نہیں سادگی

نہ ہو جوں گہر ایسی استادگی

کنارے پہ اس کے اترنا ہوا

دوبالا ہوئی ٹھنڈ مرنا ہوا

نہ رکھتے تھے جوں رند مفلس لباس

نہ ان سے ہوا اپنے جامے کا پاس

جو اچھی ہو موزوں تو کیا خوب ہے

حیف اس شکارپیشہ کو ہم سے خبر نہیں

ہم ہیں شکار خستہ ہمارے جگر نہیں

ہم خاک منھ سے مل کے پھرے جیسے آرسی

افسوس ہے کہ روے دل یار ادھر نہیں

آنکھیں نکال اس کے قدم کے تلے رکھیں

تو بھی ہمارے حال پہ اس کو نظر نہیں

کیا کیجے جو نہ کیجیے انداز دام کا

گلزار کے تو قابل پرواز پر نہیں

نکلی پڑے ہے میان سے کاہے کو ہر گھڑی

لاگ اس کی تیغ تیز کو ہم سے اگر نہیں

سر رکھ کے اس کی تیغ تلے مرچکو شتاب

یاں پاؤں پیٹ پیٹ کے مرنا ہنر نہیں

آنکھیں ہیں اس کی راہ پہ جوں نقش پا ہزار

پر میرؔ اس کو کچھ سر سیر و سفر نہیں

لیے کتنے روزوں میں نانک مٹے

جواں اس سے آگے بھی جاکر ڈٹے

نہنگ اس طرف کے بحاروں کے سن

پلنگ ان بنوں سے چلے سر کو دھن

غریب اشتلم جنگلوں میں رہا

نہ جھانکا ادھر کوہ سے اژدہا

گیا سینکڑوں کوس شور شکار

رہے ٹھور حیوان یکجا ہزار

چلا باز چھاتی کو کھولے جہاں

پرندہ رہا وہم کا بے گماں

زمیں گرد جرہ ہے کیا تیز بال

رکھا جن نے اٹھتے ہی مرغ خیال

فلک سیر شاہیں کی پرواز دیکھ

لگے جوں نگہ جا کے انداز دیکھ

نہ جھاڑا گیا نسر طائر سے سر

گھٹا کرگس چرخ چھوٹا نہ پر

رواں جس گھڑی ہوتی فوج گراں

بہیروبنہ ہر طرف سے عیاں

زمیں پر قدم کوئی کیوں کر دھرے

بیاباں فراخی سے تنگی کرے

کوئی شعبہ آیا اگر درمیاں

ہوا اور لشکر سے محشر عیاں

بلندی و پستی تھی اتنی کڈھب

کہ گاہے زمیں گہ فلک پر تھے سب

کوئی نالا کھولا اگر آگیا

تو اپنا کیا پھر کوئی پاگیا

گرے یاں رہے یاں یہی چال تھی

جہاں در جہاں خلق پامال تھی

ہوا دن تو یوں کھینچتے رنج شام

گئی رات چوروں کے ڈر میں تمام

کہے ہے کوئی کون آتا ہے یہ

پکارے کوئی کون جاتا ہے یہ

لگے آنکھ کپڑوں کے تیں زور ہو

پھر آرام سے رات کو سو رہو

ہوا خیمہ گہ دامن کوہ سب

رہا آکے نواب واں تین شب

قریب ایک مٹیاپہاڑی تھی واں

لگا اس سے کم کم تھا آب رواں

پہاڑی کہ تودہ کہوں خاک کا

کہ انبار تھا خار و خاشاک کا

محاذی تھا اس کوہ کے ایک دشت

کہ دشوار تھا اس میں آدم کا گشت

ہوا بد بہت اور پانی لگے

قدم راہ چلتے ہوئے ڈگمگے

چلے باؤ تو ایک موحش ہے شور

رکھے پاؤں دامن کو کھینچے بہ زور

فقط خاربن کیا کپڑپھاڑ تھا

کہ بوٹا بھی واں جھاڑجھنکاڑ تھا

چلو ہی چلو ہے یہ چلتے نہیں

کہ اشجار آگے سے ٹلتے نہیں

نہ ٹوٹیں نہ سرکیں نہ کاٹے کٹیں

مگر پچھلے پاؤں ہی رہ رہ ہٹیں

کہیں ہاتھی آیا ہے بھڑکا ہے اونٹ

کھڑے لوگ پیتے ہیں لوہو کے گھونٹ

کہیں ہیں گے انفار سرگرم جنگ

کرے ٹٹو پرتل کا عرصہ ہے تنگ

قیامت نمودار ہر ہر قدم

چلے کوئی کیا رکھ کے سر بر قدم

کہیں بچ کے نکلے کہیں جھک چلے

کہیں مضطرب تھے کہیں رک چلے

اسی طور منزل کو کر قطع راہ

پہنچتے رہے ہم بحال تباہ

شجر جمع تھے کچھ تہ کوہ بھی

فرود آیا اس جا یہ انبوہ بھی

زمیں اونچی نیچی خشونت بہت

اسی سے تھی واں کم سکونت بہت

ولیکن وہی خاک زشت و پلشت

ہوئی بود آدم سے رشک بہشت

ہوئی بیلچوں سے برابر زمیں

چمن سے بھی شاداب وہ سرزمیں

وہ پانی جو چلتا نہ تھا ڈھنگ سے

کہ تھا رہ گرا سرزناں سنگ سے

صفا اور خوبی میں کچھ بڑھ گیا

کئی ہاتھ مقدار سے چڑھ گیا

دل اپنا ہے لطف سخن کا اسیر

وہ کماں ابرو اگر در پے ہوا ہے میرؔ کے

ترکش ان پلکوں کا ہے بالاے ترکش تیر کے

یوں تو کہتا ہے گلے کا تو مرے تعویذ ہے

پر نہیں آثار ظاہر یار کی تسخیر کے

میں بھی زنجیری رہا ہوں دیر گلشن کے قریب

پہنچے ہوں گے دور تک نالے مری زنجیر کے

خون ہی دست حنائی سے کیا کرتے ہو تم

لو کبھو ٹک ہاتھ میں دل کو کسو دل گیر کے

بندہ و صاحب میں نسبت ہے ولے نازک بہت

معترف رہتے ہیں عاشق اپنی ہی تقصیر کے

اور بھی وہ رشک خور کچھ اب خنک ملنے لگا

معتقد ہم کیا ہوں آہ صبح کی تاثیر کے

روے دلکش وہ خدا جانے کہ کس سے کھنچ گیا

میرؔ ہم عاشق رہے ہیں ایسی ہی تصویر کے

پہاڑی سے لشکر چلا سوے کوہ

چلے بس تو کریے سیہ روے کوہ

پڑی وادی سوختہ بیچ میں

کہیں آب میں تھے کہیں کیچ میں

نیستان سے ہے خرابہ کڈھنگ

پٹیلے سے عرصہ نہایت ہے تنگ

شجر جنگل ایسے تھے انبوہ سے

کہ ان میں سے جانا ہو اندوہ سے

کہیں بید کے برگ خنجرگزار

کہیں پا نہ رکھنے دیں سرتیز خار

تنک دو درختوں کے اودھر ہوئے

نیستان پھرتے ہی پھرتے موئے

اگر بید آئے تو بن بیدباف

نہ آئے نظر دور تک راہ صاف

اگر بانس تھے واں تو تھے دشت دشت

کہ دشوار تھا دو قدم کا بھی گشت

ہمیں چار نالے اترنے پڑے

کنارے پہ دو دو گھڑی تھے کھڑے

رہا ہر قدم گرنے ہی کا خطر

چلے دو قدم راہ پائی اگر

بہت لوگ دشت قلم کو گئے

بہت اسپ و اشتر عدم کو گئے

لگی ہاتھ فیلان دشتی کی راہ

ولے ڈر نہ ہو فیل کوئی سیاہ

نہ ہاتھی ملا کوئی بارے نہ شیر

ہوئی خیر گو طے ہوئی راہ دیر

شجر سرکشیدہ بہت کیا کہوں

جو دیکھوں تو پگڑی سنبھالے رہوں

چنار ان درختوں کے تھے پائمال

سفیدار رکھتے تھے حکم نہال

اگر کوئی دریاچہ آتا ہے بیچ

تو لوگوں کے روندوں سے ہوتا ہے کیچ

تل کوہ رفعت نمودار ہو

گیا آمد و شد میں ہموار ہو

کوئی گل زمیں ایسی آئی نظر

کہ عالم نے اودھر لگائی نظر

کہیں سبزۂ تر سے جی جا لگے

کہیں سرسوں پھولے دلوں کو ٹھگے

نہ تھا پر گل زرد دامان کوہ

یہی رنگ تھا تا گریبان کوہ

فضا دلکشا آب یکسر صفا

شجر خوش نما نرم نرمک ہوا

چکارے بہت مارے کہسار میں

دو رستہ بکا گوشت بازار میں

یہ انبوہ اشجار تا شش کروہ

پھر آگے بیاباں وہ ہے اور کوہ

کناروں میں اس کے کہیں کوئی کھیت

وگرنہ یہی سنگ بے رتبہ ریت

نہ سبزہ کہیں تھا نہ آب رواں

نہ دامن میں اس کے چکارا دواں

دکھائی نہ دیتا تھا خوش قد نہال

سیاہی پکڑتے تھے چشم غزال

وہی جنگلہ دوطرف بدنمود

مقام اس طرح کے بھی ہیں یادبود

نہ پھولی تھی سرسوں نہ کچھ تھی بہار

نہ ظاہر میں اس کے کہیں لالہ زار

نہ چشمک زناں دور نزدیک پھول

نہ نرمی سے آتی تھی باد قبول

چلے باد ایسے کہ جھکڑ رہے

ہوا اور پانی میں پھکڑ رہے

ادھر باد کا شور ادھر آب کا

شب و روز مذکور کیا خواب کا

ادھر کے تئیں ایک تھا آبشار

وہ البتہ شایان سیر و شکار

وہیں ایک دم تھا دلوں کا لگاؤ

اڑانے نہ دے جو حواسوں کو باؤ

سو اپنے تئیں تو نہ تھا کچھ دماغ

کہ حال اپنا جیسا تھا بجھتا چراغ

بہت شعبۂ کوہ مشہور تھا

زبانوں پہ لوگوں کے مذکور تھا

قدم رکھ جو نواب وھاں تک گیا

سر اس شعبہ کا آسماں تک گیا

کڈھب وہ جگہ سیرگہ ہوگئی

حضور اس کے فردوس تہ ہوگئی

ہوا خیمہ استادہ ایسی جگہ

کہ آنے لگی دیر واں سے نگہ

رواں دوطرف اس کے ایک آب کم

کہ دل کا لیے جائے سب زنگ غم

جہاں تک نظر کیجے مدنظر

ہوا موج زن کوہ کے تا کمر

نظر والوں کے جی بھی ڈھلنے لگے

گرفتہ دل اس جاے کھلنے لگے

وہ پانی چلا واں سے دریا ہوا

رواں گرم تر سوے صحرا ہوا

بہا دامن کوہ میں سنگ پر

کیا سنگ ریزوں کو بھی رنگ پر

کہ لوگ ان کو ہاتھوں میں رکھنے لگے

جواہر کے رنگوں پرکھنے لگے

کراڑوں کا کیا عظم کیجے بیاں

برابر کھڑے تھے دو کوہ گراں

انھیں میں سے تھی راہ اس آب کی

وہیں بھیڑ رہتی تھی احباب کی

ہوئے دامن کوہ میں کچھ مقام

سفر کی بھی مدت ہو شاید تمام

کوئی روز گھاٹی کی بھی سیر ہے

سبھوں کی ہے معلوم پھر خیر ہے

جو اس میں کسو شیر کا دیں نشاں

نظر آئے یا کوئی پیل دماں

تو اور ایک دو دن کی ہوتی ہے دیر

وہ ہاتھی بندھے کہیے گا یا وہ شیر

شکار ایسا دیکھا ہے اس بار کا

کہ جھاڑا ہوا دشت و کہسار کا

کوئی دیکھے کب تک پہاڑ اور جھاڑ

ٹلے چھاتی پر سے کہیں یہ پہاڑ

غرض ہے وزیر جہاں ارجمند

رئیس کلاں کار عالم پسند

در اس کا ہے باب سجود سراں

رہیں حکم کش اس کے زور آوراں

سدا وہ رہے یوں ہی دشمن شکار

جہاں میں سخن ہے مرا یادگار

بہانے نہ کر میرؔ اب شاخ شاخ

نہیں خوں بستگی سے چشم تر بند

جراحت نے کیے ہیں چشم پر بند

گیا ہے وہ سو دل کھلتا نہیں ہے

پڑا ہے ایک مدت سے یہ گھر بند

کریں ہیں شوق گل خوں دل میں ناچار

اسیران شکستہ بال و پربند

گئے دن ٹکٹکی کے باندھنے کے

اب آنکھیں رہتی ہیں دو دو پہر بند

بہت ہے یار کا کم بولنا بھی

نہیں چنداں ہم ان باتوں کے در بند

سبھوں سے آرسی کے مثل وا ہو

کسو کے منھ پہ دروازہ نہ کر بند

ہمارے ہاتھ خنجر سے کرو قطع

نہ کھلوایا کبھو اس کا کمربند

رکے ہے یار آنکھیں ہی دکھا کر

ہم اس کے ان دنوں میں ہیں نظربند

نہ خط آتا ہے اودھر سے نہ قاصد

لکھوں کیا مدتوں سے ہے خبر بند

ہنر کچھ اس زمیں میں میرؔ کر بند

جگرخوں کن ہیں خوبان حنابند

دل ان کے دست رنگیں کا ہے پابند

گرہ بند قبا میں دے ہمیں دیکھ

ہوا کیا آہ باغ دلکشا بند

رکھ آہ سرد ہی سے گرم جوشی

رکے ہے دل جو ہوتی ہے ہوا بند

ہمیں سے کیا وہ جادوگر نہ بولے

کسو دشمن نے اس کا منھ کیا بند

نہیں تھمتا ہے اب پلکوں سے رونا

بہت خاشاک سے دریا رہا بند

ہمیں منظور ہر صورت میں ہے دید

کھلی ہو چشم جوں آئینہ یا بند

نہیں کام آتی اتنی تیزگامی

سمند عمر ہوتا کاش جا بند

زبردستوں کی کشتی ہوگئی پاک

نکالا عشق زورآور نے کیا بند

یہی انداز باندھے ہیں یہی ناز

قیامت میرؔ صاحب ہیں ادابند

chala asaf alddaula bahr-e-shikar

nihad-e-bayaban se utha ghubar

rawana hui fauj dariya ke rang

laga kanpne dar se sher-o-palang

tuyur ashiyanon se jane lage

wuhush apni janen chhupane lage

sun awaz sheran nar dar gae

palang-o-namir khauf se mar gae

jahan babar aya nazar said tha

bayaban isi pahan se qaid tha

gae mast hathi makanon ko chhor

diye panja-e-sher naliyon se tor

na dekha na ham ne suna ye shikar

ke bakri sa hathi ko lete hain mar

palangan sahra ke dil khun kiye

nahangan dariya hue marjiye

kahan sahl mare gae narra sher

lage bakriyon ko pakarte bhi der

hue lashkari jab ke sargarm-e-gasht

muqayyad hue mast felan dasht

gae janwar-e-dasht-e-khali rahe

bayaban jhare gae tokahe

ajab tar hai ye said karne ka dhang

ke chau rang hathi hue be d rang

na chital na parha na arna na sher

hue goliyan kha ke yak lakht-e-dher

darindon ka paida na nam-o-nishan

na sher zhayan-o-na pil-e-daman

kabhu fel dashti na jakre gae

na yun bhir bakri se pakre gae

suna jis taraf fel dashti ka mel

rawan fauj idhar ko hui sail sail

agar tuk bhi atka to mara gaya

pare sainkron phand chara gaya

wagar sarkashi se ki istadagi

tu pesh ai ik turfa uftadagi

pahar ek hathi muqabil hua

bazor amad-o-shud ka hail hua

jute donon we dew-e-maidan mein

utha shor-e-mahshar bayaban mein

jahan donon felon ki thi sarzani

shutar murgh se wan na ho par zani

jo is mar khane pe akra raha

kai roz rason se jakra raha

rahe kis tarah phat gaya tha jigar

mua dopahar mein lahu maut kar

magar sarkashi se na apni hata

na maidan mein tuk daba tuk ghata

ishara hua us ke chaurang ka

sabhon ko irada hua jang ka

barasne laga minh tiron ka zor

hawa fel baran ka jangal mein shor

lagi parne bijli si tegh-e-sipah

pareshan ho jaise abr-e-siyah

nihayat wo hathi hua lakht lakht

gira yun ke jyun para-e-koh-e-sakht

rakha lake lashkar mein asna-e-rah

sar us ka kata jaise biraj-e-siyah

rahe kahte us din ajab sab hai ye

sar-e-fel hai ya sar-e-shab hai ye

agar dew hain sargirani ke sath

na is tirgi-o-kalani ke sath

daman khashm-e-gin jaise atish ye tha

magar fel sar-e-dew-e-sarkash ye tha

gauzan aur hirnon ki kya dije sharh

gae sher mare so kutton ki tarah

gaya dasht dar dasht-e-shor-e-shikar

hue gurg ahu ke upar sawar

hiran jhunanagiyon mein rahe ghumte

khape fel belun hi mein jhumte

barabar rahe gor-o-sher-e-zhiyan

barabar tha donon ko waswas jan

gae peshtar chhor nakhchirgah

shaghalon ki rubah bazi thi ye

is auqat se joke be hosh the

baherobna ke we khargosh the

agar richh nikla to tha so ba su

bahut muztarib tha wo ashufta mu

qalandar sipahi piye jan hue

liye us ko sar dar gareban hue

alaf ab gun tegh ka phir hua

kahin paon us ke kahin sar hua

mu-e-is tarah hazrat-e-buhamid

ke jun hote hain ge bare se palid

gire pusht siwe falak khak par

ik amboh tha jism napak par

gae ladne fel par lashkari

yahi zat thi laiq-e-bartari

karun said mahi ka kya main bayan

ke felon pe the tauda tauda rawan

pare sainkron dam talab mein

na chhoti tunuk khak is ab mein

na titar na taus sahra ke bich

na mahi na murghabi dariya ke bich

rahe gosht hi pakte har subh-o-sham

jawan khagae murgh-o-mahi tamam

hawa hail rah-e-bahr-e-amiq

ke ho wahm sahil pe jis ke ghariq

qarib ake utri ye khaif thi fauj

ke be dol uthti thi har ek mauj

muhib aur aluda-e-khak-o-ab

biaineh phati ankh tha har habab

ghazab laja khezi balajosh par

talatum qayamat liye dosh par

chale bas to kuchh koi chara kare

magar dekh hi kar kinara kare

taraddud mein har ik ke hun kyunke par

kinare pe sargashta girdab war

rawan ab aisi rawani ke sath

ke jun raftagi ho jawani ke sath

lage paon chalne jahan shor tha

ke kam ab mein bhi bara zor tha

taammul se iqbal nawwab dekh

tawaqquf kiya pahle to ab dekh

phir us par jakar ishara kiya

ke lashkar ne wohain guzara kiya

shabashab utarne lage lashkari

na josh-e-ab ka wo na waisi tiri

wo sota jagata tha jis ka khatar

utha shor se fauj ke chaunk kar

nasha us ke sar se utar sa gaya

charhai se lashkar ki dar sa gaya

kuchh ik nawen le kuchh shajar kat kar

shitabi se dariya ke tin pat kar

utarne laga lashkar-e-bekaran

karan ta karan thi ye mahshar ayan

salamat hua par sab izdiham

rahe dang khizr alaya alssalam

shikar us kinare bhi tha beshtar

hue said yan ke jigar rish-e-tar

gae arne mare so manind-e-fel

hawa khun jangal mein un ka sabil

rahe gor raton ke tin jagte

gae babar koson talak bhagte

pakar lae chite gauzan aur gor

asa se chale rah yan mar-o-mor

bahut ham ne dekhe wazir-o-shahan

shikar aise dastur se tha kahan

namak khwar mujh se to hain ge hazar

pe mera bhi hona hai yahan yadgar

gharaz mir ta daur-e-charkh-e-buland

rahe asaf alddaula iqbal mand

kare us ka iqbal har lahza kam

shikar us ke dushman rahen subh-o-sham

tuk is bhi zamin par raha chahiye

ham wahshiyon pe kuchh ho kahe ko yar hai tu

ai tark-e-saidpesha kis ka shikar hai tu

pahunchi qarib shayad nakhchirgah us ki

jun said-e-khun girafta dil-e-be qarar hai tu

dil tujh talak rasai mushkil hai chashm-e-tar se

asralaabor kaise dariya ke par hai tu

shahri hain us ki ankhen kya tujh ko un se nisbat

ai ahuwe bayaban achchha ganwar hai tu

kya subh jalwa gar ho khubi ke age teri

ai gul dam tabassum bagh-o-bahar hai tu

yahan do qadam bhi chalna ban sar diye na howe

ai rah-e-ishq kitni mushkil guzar hai tu

leta hai tujh se ibrat jo koi dekhta hai

kya mir us gali mein be etibar hai tu

baz qadam ranjhu farmodin asaf alddaula bahadur roz-e-digar barae shikar

chala phir bhi nawwab gardun shikar

asad bao ke ghore par ho sawar

rawana hui fauj dariya misal

nahangon ki ab khinchi jawegi khal

gaya shor ta asman-e-barin

hui gard afwaj gardun qarin

zamin hogai jae khauf-o-khatar

falak ko lage dekhne shernar

charha baske dariya-e-fauj-e-giran

utar hathiyon ki gain mastiyan

dabi chup laga chalne bhiron ki chal

pareshan hai gurg-e-baghal zan ka hal

palangon ne kohsar se rah li

nahangon ne dariya ki ja thah li

bihaire jo the dam se chha gae

kashf niche dhalon ke ghabra gae

darinde parinde charinde khape

gazandon ke munh gard niche dhape

talaf janwar hain jahan ke tahan

gauzan aur gor aur ahu kahan

rahe gor yak shakh-o-yak so ghazal

tazalzul mein hain kya shajar kya nihal

shaghal aur rubah-o-khargosh se

nahin bahs kuchh ye hain be hosh se

koi shor sun sun ke ghabrae hai

koi kan dale chala jae hai

koi dhundta hai bayaban mein jhar

koi chahe hai phand jaun pahar

ke shayad ye udhar na ho kal makal

koi din jiye is bala se nikal

phire muztarib ho ke sher-e-gharen

ke beshon mein thi ya kaman ya kamin

nikalta hai kaftar par be hawas

hazbar jigarkhwar sab hain udas

kiya kam darte gae phat jigar

ban ai hi mar mar rahen hain namir

agar khirs tha muftar-o-badmaash

laga mosh khane ki karne talash

wagar babar hai pesh-o-pas hai nigah

nahin sujhti be hawasi se rah

mabada shikari sagin-e-rikab

giren ake mujh tak bhi pahunchen shitab

hawa ab zohra wo sheri gai

jigar dar se hai khun dileri gai

hui saidbandi ki jangal mein dhum

gire fel jaise ghata awe jhum

bayaban mein chhaya hai kya abr-e-marg

barasti hai goli basan-e-tagrg

larai nahin hun jo masruf-e-jang

uren ranjaken urte dushman ke rang

jo ata hai paltan ko kuchh walwala

chale hai koi top hai zalzala

agar jae thi us ki koh-e-giran

gaya sher phinke bhi jagah se yahan

na dil-e-mard hai babar-o-garm shitab

dil-e-sher barfi bhi dar se hai ab

na ranjak ke urne ka achchha hai tur

hawa an hi mein zamana kuchh aur

hui garm atish zani se hua

rakha ab mein ja ke lag lag ne pa

muhit-e-ab giron ke the mardkar

mu-e-malik alhazan chanden hazar

bahut dam pani ki janib jhuke

khare rah gae rod kya kya ruke

thitak sonas gharyal rah rah gae

magarmachh na jane kidhar bah gae

na qashqal na sili na surkhab hai

tamam un ke lohu se surkh ab hai

ajab roghan-e-qaz milte the yar

ke qazon ko lete hawa mein se mar

mangate the battakh ki charbi zarif

so wo charbi ab phenk den hain harif

hue kitne aqsam mahi shikar

na awe qasam khae ban etibar

magar marg mahi thi jalon ke bich

ke yun machhliyan sab nikalen alech

na arnab hai jangal main ne sosmar

koi badwi kya khawe parwardigar

kalangon ki ulti gai saf ki saf

hue bich mein qarqare bhi talaf

na sabze gae sabza kha kha ke chet

baze waise hi ae kheton mein khet

bater aur titar ka hai kya shumar

ke baz age jarre karte shikar

hawa zard sabzak bahut dil mein dar

namadmu hua gard se shana sar

khatarnak tha dasht kya kahiye mor

daba yun phire jaise dabta hai chur

na parha na nila na chital koi

banon mein jo dun thi gai jal kawi

koi mir sahab ghazal yan kaho

par aisi ke waisi kisi se na ho

kya kisht-o-khun pe in dinon mailan-e-yar hai

har jae puchhta hai ke yan kuchh shikar hai

jata hai is kashnide ki janib chala hua

said-e-azal rasida hai dil-e-be qarar hai

ankhen jo meri baz hain jun said bismili

is tark-e-saidband ka ye intizar hai

izzat jo us gali mein hai apni na puchhiye

jab jaiye to khashm hai gali hai mar hai

janen chali gain hain bahut qalb gah se

tu rah ke ja ke rah abhi purghubar hai

hai zulf-o-rawe yar se har lahza bahs yahan

ye wajh hai ke sher mira pechdar hai

kam ikhtilati ka hai gila-e-yar se abas

kis kushta-e-wafa se bahut us ko pyar hai

gul gul shaguftagi hai tire chehre se ayan

kuchh aj meri jan qayamat bahar hai

kya mir tum ko girya-e-shab se hai guftugu

tufan meri palkon ka sardarkanar hai

nasheb-o-faraz-e-bayaban ko sun

jo zi hosh hain we to hote hain sun

charho asman par jo awe charhao

phir utro to taht alssari hi ko jao

jo is mein kahin howe laghzish to khair

ke darpesh hai aur alam ki sair

zamin ziq azbas hui yak ba yak

na phaila saka paon gazpa tunuk

mile par se par the hawa mein kalang

ke chalne lage yan se tir-o-tafang

qayamat thi afat thi har ek chot

lage jis ke phirta wahin laut pot

hue khun is jama ke be dirang

hawa ka hua aur ik dam mein rang

na par tha na purza na bazu na pa

kanhon ne bhi puchha na yun tha ye kya

na zardi ko dekha na paya kabud

nikala hai logon ne pani se dud

sipah ki bala tark-e-tazi rahi

na saras ki wo sarfarazi rahi

kaman dar mardum se chara gaya

kisu khet par muft mara gaya

na jo fel dashti ki masti gai

wahin mit gaya us ki hasti gai

sinanon ki nokon pe phir bat gaya

wo koh-e-giran sang sab phat gaya

bahut janwar chhor akhar gae

lagi dun bahut jal gae mar gae

agar ban hai goya bana hai use

kare qasd wan ka to kyun kar ghise

magar zor se kuchh nikalta hai kam

bahut ranj khinche se chalta hai kam

kharidar dastar sarkhar ban

zamin par rakho paon kanton ko chun

kai gam yun rah chalna pare

phir is damgah se nikalna pare

tu age bayaban purkhar hai

kahin jhar buta kahin ghar hai

agar is mein pani nazar par gaya

kinare pe us ke ye charh kar gaya

hawa hal apna pareshan bahut

phire muztarib aur hairan bahut

tirai jo wan se guzarna hua

kaharon ke sar charh utarna hua

bayaban-e-wahshat asar purkhatar

yahi dar hai dar kya idhar kya idhar

jahan tak nazar jae sukhi hai kanas

agar sabza bhi tha to thuhar ka bans

kahin dil ruke band hojae dam

likhun kya nayastan hi the yak qalam

chale bao din ko to ho saen saen

pare rat to phir kare bhaen bhaen

na sabza na kheti na ab-e-rawan

koi sher-e-ghurran ke pil-e-daman

so wo sher mara gaya misl-e-sag

wo hathi pakar lae be taz-o-tag

koi dasht aisa ke tha sabza zar

hawa dilkash-o-jirga jirga shikar

agar ahugiri ka hota na aib

to wo ham bhi rakh lete be shak-o-raib

musattah zamin mel dar mel thi

na dariyacha tha koi ne jhil thi

agar agya rodkhana kahin

na dilkhwah tha wan se jana kahin

bara lutf tha sair mein gasht mein

na thi dukht-e-raz haif is dasht mein

hawa ik jabal samne se siyah

usi ki taraf ko pari sab ki rah

ajab lutf ka tha wo koh-e-giran

ke sad chashma ka is mein pani rawan

shajar sabz-o-patthar bahut saf the

sabhi jaise almas shaffaf the

hawa ek abr is jabal se buland

hawa par bichhe us ke yazdi parind

pahar din se barish lagi hone zor

raha sari wo rat tufan ka shor

hue kheme pani ke upar habab

sab asbab logon ka tha zer-e-ab

na puchh aur asbab mardum ka hal

na chadar rahi khushk ne koi pal

qanat aur tambu basar sab gae

khare the jo kande utar sab gae

bhara pani lashkar mein phaila hua

agar farsh-e-bistar tha thaila hua

hawa sard azbas hui ek bar

kalejon ke hoti thi barchhi si par

phire bad se log munh dhanpte

jigar chhatiyon mein rahe kanpte

raha aisi sardi mein kidhar shikar

hue log khemon ke andar shikar

bahut pir jab ji ko tajne lage

jawanon ke bhi dant bajne lage

tah-e-megh khurshid pinhan hua

na dekha magar rawe janan hua

bahut asp-o-ashtar mu-e-paon pet

nikala unhen khema gah se ghasit

taammul karo dil jigar khun karo

wo dil shikar an jo nikla shikar ko

andaz-e-yak nigah se mara hazar ko

chalna pare hai rakh ke qadam tegh-e-tez par

kis dhab se katen is rah mushkil guzar ko

urne lage hai bad mein to jan gaza hai phir

khajlat hi us ki zulf se hai tir-e-mar ko

sau bar munh charhate ho kuchh bolte nahin

ye bat kya charho ho kahe apni bar ko

ata nahin nazar ke husul-e-ummid ho

kya tham tham rakhiye dil-e-be qarar ko

jite rahe to us se ham aghosh honge ham

labrez gul se dekhenge jeb-o-kanar ko

kya samjhe khubi meri kharash-e-jabin ki to

is kam ko dikha kisi ustad kar ko

aise sitam kiye ke gaya ji se main nidan

tuk munsifi se dekho phir insaf yar ko

bola ke mujh ko karti hai badnam gor mir

hai khub agar mitawe koi is mazar ko

kisu ban mein arnon ka pakar nishan

lagi jane har subh fauj-e-giran

muqabil hua ake jun fel-e-mast

agar fel tha to hua us ka past

ghazab hai khuda ka koi us ke chot

agar asp-e-ashtar hai to laut pot

na khuk us ki jangal mein ghere hai rah

na sher us ki janib kare hai nigah

bari der jangal mein daura phira

liya zer-e-banduq akhir gira

lagi bahne shamshir jadwal shiar

lage qima karne jawanan kar

bahut aise mare bahut kat gae

nazar karke haiat jigar phat gae

kisu ban mein raunaq na pai gai

phir us par jo aisi awai gai

jigar wan ke sheron ke phat phat gae

bayaban se kargadan hat gae

na felon mein sudh budh na sheron mein zor

na chiton ko jagah na goron ko gor

na boti ko chhora na baqi hai jhar

paharon ko rahon se dala ukhar

parinda jahan par na sakta tha mar

hawa rahkale top ka wan guzar

nikal sher jangal se hairan hue

urahhe jo the saf maidan hue

jahan chalte phirte na the mar-o-mor

chale pahron wan tir banduq zor

shaghal aur khargosh-o-ham robhan

shikari sagon ne kiye nosh-e-jan

hawa par jo the murgh-e-parwaz mein

gire sainkron ek awaz mein

bahut janwar kha gae kar kabab

hue ashiyane hazaron kharab

hawasal tha kya jo kahun tha kahin

ke taadad kishton ki pate nahin

bahut muztarib jhunanagiyon mein phire

salamat na akhir gae barsire

inhon hi mein simurgh bhi tha magar

ke par marta hi nahin koh par

nahin fel-e-murgh aur shutar murgh ab

ke baazon ke taamon ke kam ae sab

kisu ban mein the nayastan aur kanas

chale rah wan le na sakte the sans

baras minh do din mein khul bhi gaya

walekin hai kohra latifa naya

ke andher tha jaise zahir ho dud

hue honth sardi se sab ke kabud

bala dhum se koi ghabra pare

jinhen dekho we kanpte hain khare

hawa sard hokar gai jan mar

uthaya bara lutf sair-o-shikar

dil is dud-e-tira se ghabra gaya

kahin ag dekhi to ji agya

yahi chal thi ek do char kos

hawa thandi thandi pari aisi os

kisu koh ke pas nikli jo rah

gai koh ki tegh tak kam nigah

bulandi thi is koh ki ta falak

nigah jate hi jate jati thi thak

na is rang se said honge kahin

hui khun ke rang rangin zamin

jahan dam aur dad ki thi bud-o-bash

lage chok logon ne ki wan maash

hawa ek jangal mein akar guzar

kisu ko na thi wan kisu ki khabar

tarakum qayamat tha ashjar ka

sitam phir hoai sitamgar ka

ke is martaba barid-o-sard thi

hue sun magar barf parward thi

koi kharban hail-e-rah hua

phate pairahan hosh sab tah hua

darakhtan-e-be barg-o-bar badnuma

na ik shakh par murgh rangin nawa

bahut sar milae baham the shajar

walekin na paya kanhon ne samar

na qumri hui nala pardaz tuk

na bulbul ki wan ai awaz tuk

yahi kal makal thi yahi kashmakash

phire marte sar ko diwana wash

darakhton ke amboh se ruk gae

chale itne jhuk ke ke ham jhuk gae

agar shakh jagah se apni hili

tu kante si ham rahrawan par chali

jo is dasht mein tha koi said bhi

so age hi wo hogaya qaid bhi

rihai hi maqsud thi wan se yar

pari apni sab ko kahan ka shikar

kahun kya ke yaksar the is mein qalam

chale rosiyah aur sau sau baham

na chhoti thi jagah qadam war bhi

na uthta tha ik nala-e-zar bhi

ke dil ko kisu ke lage jun khadang

hue aise sunsan jangal mein tang

nikalna hua khinch kar ye azab

mila beshtar ek tah dar-e-ab

rawan tha kisu ki taraf tund-o-tez

hawa us ke chalne ki thi pesh khez

habab us ka chashmak zanan mauj par

ke yun garm jate hain ahl-e-nazar

talabgar karte nahin sadgi

na ho jun guhar aisi istadagi

kinare pe us ke utarna hua

dobala hui thand marna hua

na rakhte the jun rind-e-muflis libas

na un se hua apne jame ka pas

jo achchhi ho mauzun to kya khub hai

haif is shikarpesha ko ham se khabar nahin

ham hain shikar khasta hamare jigar nahin

ham khak munh se mil ke phire jaise arsi

afsos hai ke rawe dil-e-yar idhar nahin

ankhen nikal us ke qadam ke tale rakhen

tu bhi hamare hal pe us ko nazar nahin

kya kije jo na kijiye andaz-e-dam ka

gulzar ke to qabil-e-parwaz par nahin

nikli pare hai miyan se kahe ko har ghari

lag us ki tegh-e-tez ko ham se agar nahin

sar rakh ke us ki tegh tale marchuko shitab

yan paon pet pet ke marna hunar nahin

ankhen hain us ki rah pe jun naqsh-e-pa hazar

par mir us ko kuchh sar sair-o-safar nahin

liye kitne rozon mein nanak mite

jawan is se age bhi jakar date

nahang is taraf ke biharon ke sun

palang in banon se chale sar ko dhun

gharib ashtlam jangalon mein raha

na jhanka idhar koh se azhdaha

gaya sainkron kos shor-e-shikar

rahe thaur haiwan yakja hazar

chala baz chhati ko khole jahan

parinda raha wahm ka be guman

zamin gard jarra hai kya tez bal

rakha jin ne uthte hi murgh-e-khayal

falak sair shahin ki parwaz dekh

lage jun nigah ja ke andaz dekh

na jhara gaya nasr-e-tair se sar

ghata kargas-e-charkh chhota na par

rawan jis ghari hoti fauj-e-giran

baherobna har taraf se ayan

zamin par qadam koi kyun kar dhare

bayaban farakhi se tangi kare

koi shoba aya agar darmiyan

hawa aur lashkar se mahshar ayan

bulandi-o-pasti thi itni kudhab

ke gahe zamin gah falak par the sab

koi nala khola agar agya

tu apna kiya phir koi pagaya

gire yan rahe yan yahi chal thi

jahan dar jahan khalq pamal thi

hawa din to yun khinchte ranj-e-sham

gai rat choron ke dar mein tamam

kahe hai koi kaun ata hai ye

pukare koi kaun jata hai ye

lage ankh kapron ke tin zor ho

phir aram se rat ko so raho

hawa khema gah daman-e-koh sab

raha ake nawwab wan tin shab

qarib ek matyaphari thi wan

laga us se kam kam tha ab-e-rawan

pahari ke tauda kahun khak ka

ke ambar tha khar-o-khashak ka

mahazi tha is koh ke ek dasht

ke dushwar tha is mein adam ka gasht

hawa bad bahut aur pani lage

qadam rah chalte hue dagmugge

chale bao to ek mohish hai shor

rakhe paon daman ko khinche ba zor

faqat kharban kya kapraphar tha

ke buta bhi wan jharjhankar tha

chalo hi chalo hai ye chalte nahin

ke ashjar age se talte nahin

na tuten na sarken na kate katen

magar pichhle paon hi rah rah haten

kahin hathi aya hai bharka hai unt

khare log pite hain lohu ke ghunt

kahin hain ge anfar sargarm-e-jang

kare tuto partal ka arsa hai tang

qayamat numudar har har qadam

chale koi kya rakh ke sar bar qadam

kahin bach ke nikle kahin jhuk chale

kahin muztarib the kahin ruk chale

isi taur manzil ko kar qat-e-rah

pahunchte rahe ham bahal tabah

shajar jama the kuchh tah-e-koh bhi

furud aya is ja ye amboh bhi

zamin unchi nichi khashont bahut

usi se thi wan kam sukunat bahut

walekin wahi khak zisht-o-palshat

hui bud adam se rashk-e-bahisht

hui belchon se barabar zamin

chaman se bhi shadab wo sarzamin

wo pani jo chalta na tha dhang se

ke tha rah gira sarzanan sang se

safa aur khubi mein kuchh barh gaya

kai hath miqdar se charh gaya

dil apna hai lutf-e-sukhan ka asir

wo kaman abru agar dar pe hua hai mir ke

tarkash in palkon ka hai bala-e-tarkash tir ke

yun to kahta hai gale ka to mire taawiz hai

par nahin asar zahir yar ki taskhir ke

main bhi zanjiri raha hun der gulshan ke qarib

pahunche honge dur tak nale miri zanjir ke

khun hi dast-e-hinai se kya karte ho tum

lo kabhu tuk hath mein dil ko kisu dil gir ke

banda-o-sahab mein nisbat hai wale nazuk bahut

motarif rahte hain ashiq apni hi taqsir ke

aur bhi wo rashk-e-khur kuchh ab khunuk milne laga

motaqid ham kya hun ah subh ki tasir ke

rawe dilkash wo khuda jane ke kis se khinch gaya

mir ham ashiq rahe hain aisi hi taswir ke

pahari se lashkar chala siwe koh

chale bas to kariye siyah rawe koh

pari wadi-e-sokhta bich mein

kahin ab mein the kahin kaich mein

nistan se hai kharaba kadhnag

pitile se arsa nihayat hai tang

shajar jangal aise the amboh se

ke un mein se jana ho andoh se

kahin baid ke barg khanjarguzar

kahin pa na rakhne den sartez khar

tunuk do darakhton ke udhar hue

nistan phirte hi phirte maue

agar baid ae to ban baidbaf

na ae nazar dur tak rah saf

agar bans the wan to the dasht dasht

ke dushwar tha do qadam ka bhi gasht

hamen char nale utarne pare

kinare pe do do ghari the khare

raha har qadam girne hi ka khatar

chale do qadam rah pai agar

bahut log dasht-e-qalam ko gae

bahut asp-o-ashtar adam ko gae

lagi hath felan dashti ki rah

wale dar na ho fel koi siyah

na hathi mila koi bare na sher

hui khair go tai hui rah der

shajar sarkashida bahut kya kahun

jo dekhun to pagri sambhale rahun

chanar in darakhton ke the paimal

sifidar rakhte the hukm nihal

agar koi dariyacha ata hai bich

tu logon ke raundon se hota hai kaich

til koh-e-rifat numudar ho

gaya amad-o-shud mein hamwar ho

koi gul zamin aisi ai nazar

ke alam ne udhar lagai nazar

kahin sabza-e-tar se ji ja lage

kahin sarson phule dilon ko thage

na tha par gul-e-zard daman-e-koh

yahi rang tha ta gareban-e-koh

faza dilkusha ab yaksar safa

shajar khush numa narm narmak hua

chikare bahut mare kohsar mein

do rasta buka gosht bazar mein

ye amboh ashjar ta shash kuroh

phir age bayaban wo hai aur koh

kinaron mein us ke kahin koi khet

wagarna yahi sang be rutba ret

na sabza kahin tha na ab-e-rawan

na daman mein us ke chikara dawan

dikhai na deta tha khush qad nihal

siyahi pakarte the chashm-e-ghazal

wahi jangla dotaraf badnumud

maqam is tarah ke bhi hain yadbud

na phuli thi sarson na kuchh thi bahar

na zahir mein us ke kahin lala zar

na chashmak zanan dur nazdik phul

na narmi se ati thi bad-e-qubul

chale bad aise ke jhakkar rahe

hawa aur pani mein phakkar rahe

idhar bad ka shor idhar ab ka

shab-o-roz mazkur kya khwab ka

idhar ke tain ek tha abshar

wo albuta shayan-e-sair-o-shikar

wahin ek dam tha dilon ka lagao

urane na de jo hawason ko bao

so apne tain to na tha kuchh dimagh

ke hal apna jaisa tha bujhta charagh

bahut shoba-e-koh mashhur tha

zabanon pe logon ke mazkur tha

qadam rakh jo nawwab wahan tak gaya

sar is shoba ka asman tak gaya

kudhab wo jagah sairgah hogai

huzur us ke firdaus tah hogai

hawa khema istada aisi jagah

ke ane lagi der wan se nigah

rawan dotaraf us ke ek ab kam

ke dil ka liye jae sab zang gham

jahan tak nazar kije maddinazar

hawa mauj zan koh ke ta kamar

nazar walon ke ji bhi dhalne lage

girafta dil is jae khulne lage

wo pani chala wan se dariya hua

rawan garm tar siwe sahra hua

baha daman-e-koh mein sang par

kiya sang rezon ko bhi rang par

ke log un ko hathon mein rakhne lage

jawahir ke rangun parakhne lage

kararon ka kya azm kije bayan

barabar khare the do koh-e-giran

unhen mein se thi rah is ab ki

wahin bhir rahti thi ahbab ki

hue daman-e-koh mein kuchh maqam

safar ki bhi muddat ho shayad tamam

koi roz ghati ki bhi sair hai

sabhon ki hai maalum phir khair hai

jo is mein kisu sher ka den nishan

nazar ae ya koi pil-e-daman

tu aur ek do din ki hoti hai der

wo hathi bandhe kahiyega ya wo sher

shikar aisa dekha hai is bar ka

ke jhara hua dasht-o-kohsar ka

koi dekhe kab tak pahar aur jhar

tale chhati par se kahin ye pahar

gharaz hai wazir jahan arjmand

rais-e-kalan kar-e-alam pasand

dar us ka hai bab-e-sujud-e-saran

rahen hukm kash us ke zor awaran

sada wo rahe yun hi dushman shikar

jahan mein sukhan hai mira yadgar

bahane na kar mir ab shakh shakh

nahin khun bastagi se chashm-e-tar band

jarahat ne kiye hain chashm par band

gaya hai wo so dil khulta nahin hai

para hai ek muddat se ye ghar band

karen hain shauq-e-gul khun dil mein nachar

asiran-e-shikasta bal-o-parband

gae din tiktiki ke bandhne ke

ab ankhen rahti hain do do pahar band

bahut hai yar ka kam bolna bhi

nahin chandan ham in baton ke dar band

sabhon se arsi ke misl-e-wa ho

kisu ke munh pe darwaza na kar band

hamare hath khanjar se karo qata

na khulwaya kabhu us ka kamarband

ruke hai yar ankhen hi dikha kar

ham us ke in dinon mein hain nazarband

na khat ata hai udhar se na qasid

likhun kya muddaton se hai khabar band

hunar kuchh is zamin mein mir kar band

jigarkhun kin hain khuban hinaband

dil un ke dast rangin ka hai paband

girah band-e-qaba mein de hamen dekh

hua kya ah bagh dilkusha band

rakh ah-e-sard hi se garm joshi

ruke hai dil jo hoti hai hawa band

hamen se kya wo jadugar na bole

kisu dushman ne us ka munh kya band

nahin thamta hai ab palkon se rona

bahut khashak se dariya raha band

hamen manzur har surat mein hai did

khuli ho chashm jun aina ya band

nahin kam ati itni tezgami

samand-e-umr hota kash ja band

zabardaston ki kashti hogai pak

nikala ishq zorawar ne kiya band

yahi andaz bandhe hain yahi naz

qayamat mir sahab hain adaband