شوق گریزاں

دیر و کعبہ کا میں نہیں قائل

دیر او کعبہ کو آستاں نہ بنا

مجھ میں تو روح سرمدی مت پھونک

رونق بزم عارفاں نہ بنا

دشت ظلمات میں بھٹکنے دے

میری راہوں کو کہکشاں نہ بنا

عشرت جہل و تیرگی مت چھین

محرم راز دو جہاں نہ بنا

بجلیوں سے جہاں نہ ہو چشمک

اس گلستاں میں آشیاں نہ بنا

خار چشم حریف رہنے دے

حرز بازوئے دوستاں نہ بنا

میری خود بینیاں نہ لے مجھ سے

جلوہ افروز مہوشاں نہ بنا

دل صد پارۂ حوادث کو

تختۂ مشق گل رخاں نہ بنا

میری خودداریوں کا خون نہ کر

مطرب بزم دلبراں نہ بنا

ماہ و انجم سے مجھ کو کیا نسبت

مجھ کو ان کا مزاج داں نہ بنا

جس کو اپنی خبر نہیں رہتی

اس کو سالار کارواں نہ بنا

میری جانب نگاہ لطف نہ کر

غم کو اس درجہ کامراں نہ بنا

اس زمیں کو زمیں ہی رہنے دے

اس زمیں کو تو آسماں نہ بنا

میری ہستی نیاز و شوق سہی

اس کو عنوان داستاں نہ بنا

راز تیرا چھپا نہیں سکتا

تو مجھے اپنا راز داں نہ بنا

dair-o-kaaba ka main nahin qail

der o kaaba ko astan na bana

mujh mein to ruh sarmadi mat phunk

raunaq-e-bazm-e-arifan na bana

dasht-e-zulmat mein bhatakne de

meri rahon ko kahkashan na bana

ishrat-e-jahl-o-tirgi mat chhin

mahram-e-raz-e-do jahan na bana

bijliyon se jahan na ho chashmak

is gulistan mein ashiyan na bana

khar chashm-e-harif rahne de

hirz-e-bazu-e-dostan na bana

meri khud biniyan na le mujh se

jalwa afroz mahwashan na bana

dil-e-sad para-e-hawadis ko

takhta-e-mashq-e-gul rukhan na bana

meri khuddariyon ka khun na kar

mutrib-e-bazm-e-dilbaran na bana

mah-o-anjum se mujh ko kya nisbat

mujh ko un ka mizaj dan na bana

jis ko apni khabar nahin rahti

us ko salar-e-karwan na bana

meri janib nigah-e-lutf na kar

gham ko is darja kamran na bana

is zamin ko zamin hi rahne de

is zamin ko to asman na bana

meri hasti niyaz-o-shauq sahi

us ko unwan dastan na bana

raz tera chhupa nahin sakta

tu mujhe apna raz dan na bana