شکوہ مختصر

مجھے شکوہ نہیں دنیا کی ان زہرہ جبینوں سے

ہوئی جن سے نہ میرے شوق رسوا کی پذیرائی

مجھے شکوہ نہیں ان پاک باطن نکتہ چینوں سے

لب معجزنما نے جن کے مجھ پر آگ برسائی

مجھے شکوہ نہیں تہذیب کے ان پاسبانوں سے

نہ لینے دی جنہوں نے فطرت شاعر کو انگڑائی

مجھے شکوہ نہیں دیر و حرم کے آستانوں سے

وہ جن کے در پہ کی ہے مدتوں میں نے جبیں سائی

مجھے شکوہ نہیں افتادگان عیش و عشرت سے

وہ جن کو میرے حال زار پر اکثر ہنسی آئی

مجھے شکوہ نہیں ان صاحبان جاہ و ثروت سے

نہیں آتی مرے حصہ میں جن کی ایک بھی پائی

زمانہ کے نظام زنگ آلودہ سے شکوہ ہے

قوانین کہن آئین فرسودہ سے شکوہ ہے

mujhe shikwa nahin duniya ki un zohra jabinon se

hui jin se na mere shauq ruswa ki pazirai

mujhe shikwa nahin un pak batin nukta chainon se

lab-e-mojiznuma ne jin ke mujh par ag barsai

mujhe shikwa nahin tahzib ke in pasbanon se

na lene di jinhon ne fitrat shayar ko angrai

mujhe shikwa nahin dair-o-haram ke astanon se

wo jin ke dar pe ki hai muddaton main ne jabin sai

mujhe shikwa nahin uftadagan-e-aish-o-ishrat se

wo jin ko mere hal-e-zar par aksar hansi ai

mujhe shikwa nahin un sahiban-e-jah-o-sarwat se

nahin ati mire hissa mein jin ki ek bhi pai

zamana ke nizam-e-zang aluda se shikwa hai

qawanin-e-kuhan ain-e-farsuda se shikwa hai