شکریہ ہستی کا! لیکن تم نے یہ کیا کر دیا

شکریہ ہستی کا! لیکن تم نے یہ کیا کر دیا

پردے ہی پردے میں اپنا راز افشا کر دیا

مانگ کر ہم لائے تھے اللہ سے اک درد عشق

وہ بھی اب تقدیر نے اوروں کا حصہ کر دیا

دو ہی انگارے تھے ہاتھوں میں خدائے عشق کے

ایک کو دل ایک کو میرا کلیجا کر دیا

جب تجلی ان کی برق ارزانیوں پر آ گئی

آبلے سے دل کے پیدا طور سینا کر دیا

اپنی اس وارفتگی شوق کا ممنون ہوں

بارہا مجھ کو بھری محفل میں تنہا کر دیا

واقعات عشق کا تھا لمحہ لمحہ اک صدی

ہر نفس میں میں نے اک ارمان پورا کر دیا

مرحمت فرما کے اے سیمابؔ غم کی لذتیں

زیست کی تلخی کو فطرت نے گوارا کر دیا

shukriya hasti ka! lekin tum ne ye kya kar diya

parde hi parde mein apna raz ifsha kar diya

mang kar ham lae the allah se ik dard-e-ishq

wo bhi ab taqdir ne auron ka hissa kar diya

do hi angare the hathon mein khuda-e-ishq ke

ek ko dil ek ko mera kaleja kar diya

jab tajalli un ki barq arzaniyon par a gai

able se dil ke paida tur-e-sina kar diya

apni is waraftagi-e-shauq ka mamnun hun

barha mujh ko bhari mahfil mein tanha kar diya

waqiat-e-ishq ka tha lamha lamha ik sadi

har nafas mein main ne ik arman pura kar diya

marhamat farma ke ai simab gham ki lazzaten

zist ki talkhi ko fitrat ne gawara kar diya