صمد کو سراپا صنم دیکھتے ہیں

صمد کو سراپا صنم دیکھتے ہیں

مسمیٰ کو اسما میں ہم دیکھتے ہیں

تجھے کیف مستی میں ہم دیکھتے ہیں

ثلاثہ نظر کا عدم دیکھتے ہیں

ترا حسن اوصاف ہم دیکھتے ہیں

فنا میں بقا دم بدم دیکھتے ہیں

جو ہیں خالی و پر سے سرمست نغمہ

ہم آہنگیٔ کیف و کم دیکھتے ہیں

نظر گاہ تیری ہے آئینہ دل

تجھے حیرتی ہو کے ہم دیکھتے ہیں

فنا ہے فنا مقتضائے محبت

تقاضائے الفت کو ہم دیکھتے ہیں

غبار دل و دیدہ جو پاک کر دے

ہم اس اشک شبنم کو یم دیکھتے ہیں

اٹھا جب سے پندار ہستی کا پردہ

تجھے نور وحدت میں ہم دیکھتے ہیں

مکین مکاں لا مکانی ہے ساحرؔ

ہم انداز دیر و حرم دیکھتے ہیں

samad ko sarapa sanam dekhte hain

musammi ko asma mein ham dekhte hain

tujhe kaif-e-masti mein ham dekhte hain

sulasa nazar ka adam dekhte hain

tira husn ausaf ham dekhte hain

fana mein baqa dam badam dekhte hain

jo hain khali-o-par se sarmast-e-naghma

ham ahangi-e-kaif-o-kam dekhte hain

nazar gah teri hai aina dil

tujhe hairati ho ke ham dekhte hain

fana hai fana muqtaza-e-mohabbat

taqaza-e-ulfat ko ham dekhte hain

ghubar-e-dil-o-dida jo pak kar de

ham is ashk shabnam ko yam dekhte hain

utha jab se pindar-e-hasti ka parda

tujhe nur-e-wahdat mein ham dekhte hain

makin-e-makan la makani hai sahir

ham andaz dair-o-haram dekhte hain