صبح کا بھید ملا کیا ہم کو

صبح کا بھید ملا کیا ہم کو

لگ گیا رات کا دھڑکا ہم کو

شوق نظارا کا پردہ اٹھا

نظر آنے لگی دنیا ہم کو

کشتیاں ٹوٹ گئی ہیں ساری

اب لیے پھرتا ہے دریا ہم کو

بھیڑ میں کھو گئے آخر ہم بھی

نہ ملا جب کوئی رستہ ہم کو

تلخئ غم کا مداوا معلوم

پڑ گیا زہر کا چسکا ہم کو

تیرے غم سے تو سکون ملتا ہے

اپنے شعلوں نے جلایا ہم کو

گھر کو یوں دیکھ رہے ہیں جیسے

آج ہی گھر نظر آیا ہم کو

ہم کہ شعلہ بھی ہیں اور شبنم بھی

تو نے کس رنگ میں دیکھا ہم کو

جلوۂ لالہ و گل ہے دیوار

کبھی ملتے سر صحرا ہم کو

لے اڑی دل کو نسیم سحری

بوئے گل کر گئی تنہا ہم کو

سیر گلشن نے کیا آوارہ

لگ گیا روگ صبا کا ہم کو

یاد آئی ہیں برہنہ شاخیں

تھام لے اے گل تازہ ہم کو

لے گیا ساتھ اڑا کر باقیؔ

ایک سوکھا ہوا پتا ہم کو

subh ka bhed mila kya ham ko

lag gaya rat ka dharka ham ko

shauq nazara ka parda utha

nazar ane lagi duniya ham ko

kashtiyan tut gai hain sari

ab liye phirta hai dariya ham ko

bhir mein kho gae akhir ham bhi

na mila jab koi rasta ham ko

talkhi-e-gham ka mudawa maalum

par gaya zahr ka chaska ham ko

tere gham se to sukun milta hai

apne sholon ne jalaya ham ko

ghar ko yun dekh rahe hain jaise

aj hi ghar nazar aya ham ko

ham ke shola bhi hain aur shabnam bhi

tu ne kis rang mein dekha ham ko

jalwa-e-lala-o-gul hai diwar

kabhi milte sar-e-sahra ham ko

le uri dil ko nasim-e-sahari

bu-e-gul kar gai tanha ham ko

sair-e-gulshan ne kiya awara

lag gaya rog saba ka ham ko

yad ai hain barahna shakhen

tham le ai gul-e-taza ham ko

le gaya sath ura kar baqi

ek sukha hua patta ham ko