صبح دم روتی جو تیری بزم سے جاتی ہے شمع — امداد امام اثر

Arooz is now on the App Store, for iPhone and iPad. Download →

امداد امام اثر

صبح دم روتی جو تیری بزم سے جاتی ہے شمع

صاف میرے سوز غم کا رنگ دکھلاتی ہے شمع

جس طرح کالے کے من کے روبرو گل ہو چراغ

دیکھ کر تعویذ زلف یار بجھ جاتی ہے شمع

صرف پروانہ ادب سے دم بخود رہتا نہیں

تیرے رعب حسن سے محفل میں تھراتی ہے شمع

گھیر لیتے ہیں تجھے پروانے اس کو چھوڑ کر

جس میں تو ہو کب فروغ اس بزم میں پاتی ہے شمع

کاربند عدل ہوتے ہیں جو ہیں روشن دماغ

بزم میں ہر سمت یکساں نور پہنچاتی ہے شمع

پردۂ فانوس سے باہر نہیں رکھتی قدم

روبرو تیرے رخ روشن کے شرماتی ہے شمع

جائے گریہ صحبت اہل تماشا ہے اثرؔ

ہے بجا روتی ہوئی جو بزم میں آتی ہے شمع