شفق جو روئے سحر پر گلال ملنے لگی

شفق جو روئے سحر پر گلال ملنے لگی

یہ بستیوں کی فضا کیوں دھواں اگلنے لگی

اسی لئے تو ہوا رو پڑی درختوں میں

ابھی میں کھل نہ سکا تھا کہ رت بدلنے لگی

اتر کے ناؤ سے بھی کب سفر تمام ہوا

زمیں پہ پاؤں دھرا تو زمین چلنے لگی

کسی کا جسم اگر چھو لیا خیال میں بھی

تو پور پور مری مثل شمع جلنے لگی

میں ناپتا چلا قدموں سے اپنے سائے کو

کبھی جو دشت مسافت میں دھوپ ڈھلنے لگی

مری نگاہ میں خواہش کا شائبہ بھی نہ تھا

یہ برف سی ترے چہرے پہ کیوں پگھلنے لگی

ہوا چلی سر صحرا تو یوں لگا جیسے

ردائے شام مرے دوش سے پھسلنے لگی

کہیں پڑا نہ ہو پرتو بہار رفتہ کا

یہ سبز بوند سی پلکوں پہ کیا مچلنے لگی

نہ جانے کیا کہا اس نے بہت ہی آہستہ

فضا کی ٹھہری ہوئی سانس پھر سے چلنے لگی

جو دل کا زہر تھا کاغذ پہ سب بکھیر دیا

جو اپنے آپ طبیعت مری سنبھلنے لگی

جہاں شجر پہ لگا تھا تبر کا زخم شکیبؔ

وہیں یہ دیکھ لے کونپل نئی نکلنے لگی

shafaq jo ru-e-sahar par gulal milne lagi

ye bastiyon ki faza kyun dhuan ugalne lagi

isi liye to hua ro pari darakhton mein

abhi main khul na saka tha ke rut badalne lagi

utar ke nao se bhi kab safar tamam hua

zamin pe paon dhara to zamin chalne lagi

kisi ka jism agar chhu liya khayal mein bhi

tu por por miri misl-e-shama jalne lagi

main napta chilla qadmon se apne sae ko

kabhi jo dasht-e-masafat mein dhup dhalne lagi

miri nigah mein khwahish ka shaiba bhi na tha

ye barf si tire chehre pe kyun pighalne lagi

hawa chali sar-e-sahra to yun laga jaise

rida-e-sham mire dosh se phisalne lagi

kahin para na ho partau bahar rafta ka

ye sabz bund si palkon pe kya machalne lagi

na jane kya kaha us ne bahut hi ahista

faza ki thahri hui sans phir se chalne lagi

jo dil ka zahr tha kaghaz pe sab bikher diya

jo apne ap tabiat miri sambhalne lagi

jahan shajar pe laga tha tabar ka zakhm shakeb

wahin ye dekh le konpal nai nikalne lagi