شعلۂ آہ نے سیکھا ہے جلانا دل کا

شعلۂ آہ نے سیکھا ہے جلانا دل کا

نہیں ملتا ہے جو پہلو میں ٹھکانا دل کا

شوخیاں آئیں گی بڑھنے دو ابھی سن ان کا

زلف پر پیچ سکھا دے گی پھنسانا دل کا

نئے انداز سے لیتے ہیں وہ دل عاشق کا

روش ناز سے سیکھا ہے چرانا دل کا

صورت برگ حنا کس نے بنایا تم کو

پیش کر پائے نگاریں میں لگانا دل کا

کیا مجھے دشت نوردی کا مزا دیتا ہے

جستجو میں تری یوں خاک اڑانا دل کا

کیا خبر تھی وہ پئے سیر ادھر آئے گا

سیکھتا پردۂ پہلو میں چھپانا دل کا

ان کے کوچہ میں بپا فتنۂ محشر نہ کرے

شب تاریک میں کیا شور مچانا دل کا

طور الفت پہ چلو تا میں دکھاؤں تم کو

ہو کے بے ہوش کبھی ہوش میں آنا دل کا

شکر کر شکر جمیلہؔ کہ زہے تیرا نصیب

ہو گیا کوچۂ جیلاں میں ٹھکانا دل کا

shola-e-ah ne sikha hai jalana dil ka

nahin milta hai jo pahlu mein thikana dil ka

shokhiyan aengi barhne do abhi sun un ka

zulf pur pech sikha degi phansana dil ka

nae andaz se lete hain wo dil ashiq ka

rawish-e-naz se sikha hai churana dil ka

surat-e-barg-e-hina kis ne banaya tum ko

pesh kar pae nigaren mein lagana dil ka

kya mujhe dasht nawardi ka maza deta hai

justuju mein tiri yun khak urana dil ka

kya khabar thi wo piye sair idhar aega

sikhta parda-e-pahlu mein chhupana dil ka

un ke kucha mein bapa fitna-e-mahshar na kare

shab-e-tarik mein kya shor machana dil ka

tur ulfat pe chalo ta mein dikhaun tum ko

ho ke be hosh kabhi hosh mein ana dil ka

shukr kar shukr jamilahu ke zahe tera nasib

ho gaya kucha-e-jelan mein thikana dil ka