شعلۂ عشق

محبت نے ظلمت سے کاڑھا ہے نور

نہ ہوتی محبت نہ ہوتا ظہور

محبت مسبب محبت سبب

محبت سے آتے ہیں کار عجب

محبت بن اس جا نہ آیا کوئی

محبت سے خالی نہ پایا کوئی

محبت ہی اس کارخانے میں ہے

محبت سے سب کچھ زمانے میں ہے

محبت سے کس کو ہوا ہے فراغ

محبت نے کیا کیا دکھائے ہیں داغ

محبت اگر کارپرداز ہو

دلوں کے تئیں سوز سے ساز ہو

محبت ہے آب رخ کار دل

محبت ہے گرمی آزار دل

محبت عجب خواب خوں ریز ہے

محبت بلاے دل آویز ہے

محبت کی ہیں کارپردازیاں

کہ عاشق سے ہوتی ہیں جانبازیاں

محبت کی آتش سے اخگر ہے دل

محبت نہ ہووے تو پتھر ہے دل

محبت کو ہے اس گلستاں میں راہ

کلی کے دل تنگ میں بھی ہے چاہ

محبت ہی سے دل کو رو بیٹھیے

محبت میں جی مفت کھو بیٹھیے

محبت لگاتی ہے پانی میں آگ

محبت سے ہے تیغ و گردن میں لاگ

محبت سے ہے انتظام جہاں

محبت سے گردش میں ہے آسماں

محبت سے روتے گئے یار خوں

محبت سے ہو ہو گیا ہے جنوں

محبت سے آتا ہے جو کچھ کہو

محبت سے ہو جو وہ ہرگز نہ ہو

محبت سے پروانہ آتش بجاں

محبت سے بلبل ہے گرم فغاں

اسی آگ سے شمع کو ہے گداز

اسی کے لیے گل ہے سرگرم ناز

محبت ہی ہے تحت سے تا بہ فوق

زمیں آسماں سب ہیں لبریز شوق

محبت سے یاروں کے ہیں رنگ زرد

دلوں میں محبت سے اٹھتے ہیں درد

گیا قیس ناشاد اس عشق میں

کھپی جان فرہاد اس عشق میں

ہوئی اس سے شیریں کی حالت تباہ

کیا اس سے لیلیٰ نے خیمہ سیاہ

سنا ہوگا وامق پہ جو کچھ ہوا

نل اس عشق میں کس طرح سے موا

جو عذرا پہ گذرا سو مشہور ہے

دمن کا بھی احوال مذکور ہے

ستم اس بلا کے ہی سہتے گئے

سب اس عشق کو عشق کہتے گئے

اس آتش سے گرمی ہے خورشید میں

یہی ذرے کی جان نومید میں

اسی سے دل ماہ ہے داغ دار

کتاں کا جگر ہے سراسر فگار

نئے اس کے چرچے حکایت سنی

گہے شکر گاہے شکایت سنی

اسی سے قیامت ہے ہر چار اور

اسی فتنہ گر کا ہے عالم میں شور

کوئی شہر ایسا نہ دیکھا کہ واں

نہ ہو اس سے آشوب محشر عیاں

کب اس عشق نے تازہ کاری نہ کی

کہاں خون سے غازہ کاری نہ کی

زمانے میں ایسا نہیں تازہ کار

غرض ہے یہ اعجوبۂ روزگار

عجب کام پٹنے میں اس سے ہوا

عجب اہل عالم کو جس سے ہوا

کہ واں اک جواں تھا پرس رام نام

خوش اندام و خوش قامت و خوش خرام

جوانی کے گلشن کا وہ آب و رنگ

گلستاں پہ کام اس کی خوبی سے تنگ

جدھر نکلے رنگیں ادائی کے ساتھ

چلے جائیں جی خوش نمائی کے ساتھ

کھلے بال چلتا تھا وہ سرو ناز

قدم بوس کو آتی عمر دراز

جدھر کو وہ ٹک گرم رفتار ہو

قیامت ادھر سے نمودار ہو

نگہ گرم اس کی جدھر جا لڑی

کہے تو کہ اودھر کو بجلی پڑی

وہ کافر بھویں ہوویں مائل جہاں

کریں سجدہ اس جا پہ اسلامیاں

نگہ تیغ مجروح جس کے پڑے

پلک سیل جوں دل میں جاکر گڑے

سیہ چشم اس کے دو بدمست تھے

نگاہوں سے شمشیر در دست تھے

رخ اس کا کہاں اور مہ و خور کہاں

تفاوت زمیں آسماں کا ہے یاں

دو لب لعل کو جن سے شرمندگی

دم حرف سرمایۂ زندگی

دہن کی جو تنگی نظر کیجیے

تو آگے سخن مختصر کیجیے

نہ ہم تم زنخ دیکھ حیراں رہیں

سبھی دست زیر زنخداں رہیں

سراپا میں اس کے جہاں دیکھیے

وہیں روے مقصود جاں دیکھیے

خراماں نکلتا وہ جس راہ سے

قیامت تھی واں نالہ و آہ سے

فدا اس پہ جی جان ہر ایک کا

کہ مقصود دل تھا بد و نیک کا

کئی گرد و پیش اس کے وارفتگاں

کئی ایدھر اودھر جگر تفتگاں

بہت رفتگان اداے کلام

بہت مبتلاے بلاے خرام

کوئی کشتۂ شوق رفتار کا

کوئی نیم جاں ذوق دیدار کا

کوئی والۂ خندۂ برق وش

کسو کے تئیں جنبش لب سے غش

کسو کی نظر میں کمر کی لچک

کسو کے جگر میں پلک کی کسک

کوئی حیرتی طرز گفتار کے

کوئی آرزوکش بروبار کے

کوئی زلف سے اس کی مجنوں رہے

کسو کا تبسم سے دل خوں رہے

کوئی دل ستم کشتۂ یک نگاہ

کوئی جان ہونٹھوں پہ موقوف آہ

کسو پر فسوں گردش چشم کا

کسو پر غضب غمزہ و خشم کا

کوئی دست بر دل کوئی بے قرار

کوئی بے خبر کوئی بے اختیار

انھوں میں سے اک عاشق زار تھا

اس آفت کو اس سے سروکار تھا

محبت میں تھا جذب کامل اسے

مراد دل اپنی تھی حاصل اسے

شب و روز ہم بستر کام دل

ہمیشہ ہم آغوش آرام دل

دم اس کے میں یاں تک تو تاثیر تھی

کہ صحبت اس آتش سے درگیر تھی

بہم ربط چسپاں بہم اختلاط

نہ کم ہوتی گرمی نہ کم اختلاط

مرو کوئی غم سے کوئی ہو ہلاک

وہ شعلہ اسی خس سے رکھتا تپاک

کہاں حسن میں تھا وفا کا یہ پاس

یہ سنیے کہ ہے گا خلاف قیاس

بہت سے بہت اس کا مالوف تھا

اسی کی تسلی سے مصروف تھا

کہ ناگہ وہ دلبر ہوا کدخدا

رہا اپنے عاشق سے چندے جدا

زن و شو سے اخلاص باہم ہوا

اس آشفتہ سے رابطہ کم ہوا

نگاہیں بہم دل میں کاوش کریں

سخن سے وفائیں تراوش کریں

ہوا ربط چسپاں بہم اس قدر

کہ دشوار اٹھے ہم دگر سے نظر

رہیں دونوں دست و بغل روز و شب

کبھو منھ پہ منھ ہو کبھو لب پہ لب

وفا نے جو تکلیف کی ایک روز

گیا اپنے عاشق کے وہ دل فروز

کئی دن میں جاکر جو اس سے ملا

کیا اس نے حد سے زیادہ گلہ

کہ اے نازنیں آہ کن نے کہا

کہ تو حال سے میرے غافل رہا

مگر سد رہ تھا کسو کا فریب

ملا کوئی تجھ سے بھی دشمن شکیب

کوئی زلف زنجیر پا ہوگئی

کہ مسدود راہ وفا ہوگئی

طرح کس کی چتون کی دل میں کھبی

جگر میں پلک شوخ کس کی چبھی

کسو چشم نے تجھ کو جادو کیا

مرے جام عشرت کو لوہو کیا

کہا ان نے تھی کدخدائی مری

نہ تھی بے سبب یہ جدائی مری

رکھ اب مجھ کو معذور ناچار ہوں

محبت کا میں نوگرفتار ہوں

نہ فرصت مجھے صبح ہے اب نہ شام

طرف اس کے ہے دل کو میل تمام

اسے بھی مرے ساتھ اخلاص ہے

دلوں کو بہم رابطہ خاص ہے

اسے مجھ سے ہے نسبت عاشقی

وہ رہتی ہے بے طاقت عاشقی

نہیں اس کو یک لحظہ تاب فراق

جدائی مری اس پہ گذرے ہے شاق

نکلتا ہوں گھر سے جو میں ایک آن

تو پاتا ہوں جاکر اسے نیم جان

نہ دیکھے جو مجھ کو تو مر جائے وہ

وہیں جی سے اپنے گذر جائے وہ

جو پہنچے مری جھونٹھ اسے بدخبر

تو کر بیٹھے سچ اپنے جی کا ضرر

غرض اس کو تاب و تحمل نہیں

شکیبائی ہجر بالکل نہیں

یہ سن کر کہا اس دل افگار نے

ستم کشتۂ دوری یار نے

کہ مجھ کو نہیں تیری باتیں قبول

یہ مکر زناں ہیں تو ان پر نہ بھول

وفا کن نے ان ناقصوں میں سے کی

موا شوے کس کا کہ وہ پھر نہ جی

یہ ظاہر میں ہر چند ہوں رشک ماہ

ولیکن ہیں باطن میں مار سیاہ

خدا مکر سے ان کے دے ہے خبر

نہیں ان سے کوئی فریبندہ تر

جہاں میں فریب ان کا مشہور ہے

زبانوں پہ مکر ان کا مذکور ہے

پئے امتحاں عاقبت یک نفر

مقرر ہوا تاکہ جا اس کے گھر

کہے غرق دریا ہوا پرس رام

ہوئی زندگانی کی صبح اس کی شام

گیا تھا نہانے کو وقت سحر

سو ڈوبا وہ خورشید روشن گہر

کیا موج دریا نے سر سے گذار

اٹھا طبع نازک سے اس کے غبار

وہ گیسو جو بکھرے تھے بالاے آب

سو اب موج دریا کو ہے پیچ و تاب

پھرے تھیں جو وے انکھڑیاں آب میں

سو وے گردشیں اب ہیں گرداب میں

تمنا میں تھے جس کے سب دل فگار

سو دریا کو اب ہے وہ بوس و کنار

نہ سمجھا وہ نافہم اسرار عشق

نہ سوچا وہ ناتجربہ کار عشق

کہا غرق دریا ہوا پرس رام

ہوا کام اس رشک مہ کا تمام

کہے تو کہ موجوں کو تھا انتظار

کہ دست و بغل ہوگئیں ایک بار

گیا بیٹھ پانی میں ایسا شتاب

کہ گویا لب آب کا تھا حباب

کنارے پہ دریا کے اک شور ہے

بحال خراب ایک جمہور ہے

گرے ہیں کئی آشنا آب میں

کئی آتش غم سے ہیں تاب میں

کوئی سر پہ اس غم سے ڈالے ہے خاک

کسی نے کیا ہے گریباں کو چاک

ہمیں داغ وہ در تر دے گیا

بہت آب یہ ماجرا لے گیا

سنا اس کی ہمسر نے جب یہ سخن

ہوا موج زن بحر رنج و محن

نگہ اک طرف در کے مایوس کی

دم سرد کھینچا گیا ڈوب جی

وہی بے خودی رخصت جان تھی

وہ اک دم کی گویا کہ مہمان تھی

گری ہو کے بے جان وہ دردمند

ہوا شور نوحے کا گھر سے بلند

موئی غم میں اس جملہ تن ناز کے

گئی جان ہمرہ سخن ساز کے

وہ آیا جو تھا دل پریشاں گیا

کہ اس واقعے سے پشیماں گیا

خبر لے گیا اس کنے زودتر

جو تھا درپئے امتحاں بے خبر

کہ وہ رشک مہ امتحاں دے گئی

محبت کے ناموس کو لے گئی

موا سن پرس رام کے تیں موئی

مرے اک سخن میں قیامت ہوئی

اگرچہ نہ کچھ ان نے منھ سے کہا

دیا جی ولے جی اسی میں رہا

یہ سن کر وہ نافہم حیراں ہوا

خجالت میں سر در گریباں ہوا

گیا ہوش سن کر پرس رام کا

دوانہ ہوا عشق کے کام کا

اٹھا بے خود و بے خرد بے حواس

گرا آکے اس پیکر مردہ پاس

لگا کہنے اے مایۂ زندگی

مجھے منھ سے تیرے ہے شرمندگی

کیا جلد رخت سفر تونے بار

نہ میرا کیا آہ ٹک انتظار

نہ میری سنی کچھ نہ اپنی کہی

مرے تیرے دونوں کے جی میں رہی

زمیں پر سے آخر اٹھایا اسے

لب آب جاکر جلایا اسے

جب آگ اس کے پیکر پہ سب چھا گئی

محبت عجب داغ دکھلا گئی

یہ سرگرم فریاد و زاری ہوا

لہو اس کی آنکھوں سے جاری ہوا

جگر غم میں یک لخت خوں ہوگیا

رکا دل کہ آخر جنوں ہوگیا

گئے ہوش و صبر اس کے یک بارگی

طبیعت میں آئی اک آوارگی

سراسیمگی سے بگولا ہوا

پھرے اس طرح جیسے بھولا ہوا

نہ جی کو تسلی نہ دل کو قرار

کف غم میں سررشتۂ اختیار

کبھو یاد کر اس کو نالاں رہے

کبھو ٹک جو بھولے تو حیراں رہے

کبھو یاں کبھو واں بحال خراب

وہی بے قراری وہی اضطراب

رہے گھر تو آشوب گہ وہ گلی

چمن میں جو لے جائیں تو بے کلی

کبھو متصل ہونٹھ پر آہ سرد

کبھو دست بر دل کہ دل میں ہے درد

ہوئی رفتہ رفتہ جو وحشت زیاد

لگا بھاگنے سب سے وہ نامراد

کچھ اپنے بد و نیک کی سدھ نہیں

نکل جائے تنہا کہیں کا کہیں

کبھو جاکے صحرا سے لاویں اسے

کبھو روتے دریا پہ پاویں اسے

کبھو خاک ملتا ہے منھ پر کھڑا

کہیں ہے خرابی میں بے سدھ پڑا

سر شام اک روز دریا گیا

ہوئی رات واں سے نہ آیا گیا

کنارے پہ رہتا تھا اک دام دار

رہا رات اس کے یہ قرب و جوار

کہا اس کی عورت نے اس رات کو

نہیں تجھ سے جی چاہتا بات کو

تجھے فکر کچھ اب ہماری نہیں

تو جاتا نہیں شام کو اب کہیں

ترا شب کو دریا میں پڑتا تھا دام

تو چلتا تھا بارے معیشت کا کام

تو جاتا نہیں شب کو جس روز سے

معیشت ہے اندوہ جاں سوز سے

نہیں طاقت صبر ہم کو تنک

بہت دیر ملتا ہے نان و نمک

وہ بولا کہ میں بھی پریشان ہوں

بہت تنگ دستی سے حیران ہوں

کہوں کیا کئی روز سے شام کو

اٹھاتا ہوں میں اس سبب دام کو

کہ یک شعلۂ تند پرپیچ و تاب

فلک سے اترتا ہے نزدیک آب

کوئی دم تو رہتا ہے سرگرم گشت

کبھی سوے دریا کبھی سوے دشت

ٹھہرتا جو ہے پھر کنارے پہ واں

کہے ہے پرس رام تو ہے کہاں

یہ آتش مرے دل کی کیونکر بجھے

عدم میں بھی میں نے نہ پایا تجھے

کیا عشق نے مجھ کو آتش کا باب

نہ چھڑکا مری آگ پر تونے آب

گیا وہ یہ کہہ کر سوے آسماں

رہے ہے مجھے رات دن خوف جاں

سنا حال شعلے کا صیاد سے

دھواں اک اٹھا جان ناشاد سے

ہوا شعلۂ شوق دل سے بلند

رہا لوٹتا آگ میں جوں سپند

گئی رات جوں توں ہوئی صبح جب

زیادہ ہوئی عشق کی تاب و تب

محبت نے کی اشتعالک کہ وہ

سراسیمہ آیا چلا اس جگہ

جہاں سے اٹھی تھی یہ آتش سلگ

پھر اس کے جگر کو لگی گھر کو لگ

تبسم کناں واں یہ ان نے کہا

کہ کلفت میں غم کی بہت میں رہا

چلو سیرگشتی کو ہنگام شب

لب آب خالی کریں دل کو سب

ہوا سو ہوا یوں ہی تقدیر تھی

جہاں سوز الفت کی تاثیر تھی

نہ ہوتے جو دل گیر یاں متصل

نہ ہوتی یہ آتش کبھو مشتعل

کیاں عقل کی ان نے باتیں جو واں

وہ عاشق جو تھا درپئے امتحاں

لگا کہنے یہ آرزو تھی مجھے

کہ اک روز ہشیار دیکھوں تجھے

سو یہ دن خدا نے دکھایا مجھے

سخن تیرے منھ کا سنایا مجھے

ندامت سے ہوں تنگ شاہد ہیں سب

گرفتار ہوں میں بحال عجب

نہ خجلت سے رو ہے جو کچھ میں کہوں

نہ قدرت اجل پر کہ مر بھی رہوں

نہ تقدیر کا میں نے سمجھا فریب

نہ جانا کہ اتنی ہے وہ ناشکیب

ہوا اک سخن میں مرے یہ غضب

خرابی کا تیری ہوا میں سبب

کروں گا زمانے میں جب تک معاش

رہوں گا اسی درد سے دل خراش

مقرر کیا ہے کئی دن سے یہ

کہ آئندہ رہیے تری خاک رہ

جو اس میں ہے خوش تو تو ہوں میں بھی ساتھ

رہیں گے لب آب ہی آج رات

دل پر کو خالی کریں گے بہم

پھریں گے ترے ساتھ خوش کوئی دم

ہوئے عاقبت سوے دریا رواں

نہ پیدا کسو پر یہ راز نہاں

کہ اک آگ سلگی ہے واں یک کنار

محبت کمیں میں ہے سرگرم کار

کسو اشتعالک کی ہے منتظر

جہاں سر کو کھینچا قیامت ہے پھر

ہوئے ناؤ پر شام گہ جب سوار

کہا ان نے یاں ایک ہے دام دار

جہاں قفل ہو راہ دریا تو وھاں

کفایت ہے اس کی کلید زباں

اسے ساتھ لو تو بھلی بات ہے

کہ دریا میں پھرنا ہے اور رات ہے

لیا آخرالامر ہمرہ اسے

بٹھایا قریب اپنے کہہ کہہ اسے

تنک دور چل کر کیا یہ سوال

مجھے ہے ترے حرف شب کا خیال

کہاں شعلۂ سرکش آتا ہے یاں

کدھر پیچ و تاب آکے کھاتا ہے یاں

کہاں لے ہے دریا پہ اک دم قرار

کدھر مضطرب ہو کرے ہے گذار

ٹھہرتا ہے کس جا وہ آتش فگن

طرف کون سے ہو ہے گرم سخن

یہ صیاد سے تھا ہی محو سراغ

جگر آتش شوق رکھتی تھی داغ

کہ ہوکر فروغ اک سوے آسماں

تڑپنے لگا جیسے آتش بجاں

کوئی دم میں دریا پہ آیا فرود

ہوا نیزہ بالا سبھوں کو نمود

لب آب وہ شعلۂ جاں گداز

تڑپ کر بہت بازبان دراز

پکارا کہاں ہے پرس رام تو

محبت کا ٹک دیکھ انجام تو

کہ میں جملہ تن آتش تیز ہوں

دل گرم سے شعلہ انگیز ہوں

بھڑکتی ہے جب آگ دل کی مرے

لب آب اتروں ہوں غم میں ترے

مگر سوزش دل ہو کم آب سے

بجھے جی مرا اس تب و تاب سے

سو یہ آب رکھتا ہے روغن کا کام

کیا عشق نے آہ دشمن کا کام

یہ بے تاب سن کر ہوا بے قرار

سفینے سے اترا بصد اضطرار

ہوا ہمدم اس آتش انگیز سے

کہا اس بلاے دل آویز سے

کہ میں ہوں پرس رام خانہ خراب

مرا دل بھی اس آگ سے ہے کباب

مرے بھی جگر میں یہی سوز ہے

یہی مجھ کو جلنا شب و روز ہے

محبت تری برق خرمن ہوئی

تری دوستی جی کی دشمن ہوئی

سخن مختصر کچھ وہ شعلہ چلا

کچھ اک اپنی جاگہ سے یہ دل جلا

بہم گرم جوشی سے یک جا ہوئے

کہ گذری تھی مدت بھی تنہا ہوئے

وہ شعلہ رہا ایک جا مشتعل

کہے تو تسلی ہوئے جان و دل

یکایک بھڑک کر وہ جلنے لگا

پھر ایدھر ادھر پھرنے چلنے لگا

کیا پاس پانی کے آکر صعود

رہی روشنی سی کوئی دم نمود

پھر آگے کسو پر نہ پیدا ہوا

نہ جانا کہ وہ شعلہ پھر کیا ہوا

خبردار ہو اہل کشتی تمام

لگے کہنے باہم نہیں پرس رام

اٹھے ڈھونڈنے ہوکے سب ناصبور

کنارے پہ دریا کے نزدیک و دور

نہ پایا کہیں اس کو حیراں ہوئے

نہایت ہی خاطر پریشاں ہوئے

وہ صیاد بولا کہ دوں میں نشاں

گیا تھا سوے شعلہ یہ نوجواں

یہ اور آگ دونوں ہوئے ہم سخن

وہ شعلہ ہوا اس پہ آتش فگن

یہ جوشش تو یاں سے تھی مدنظر

پھر آگے نہیں اس کی مجھ کو خبر

نہ ہو آتش غم سے پہلے ہی داغ

چلو اس طرف کو جو نکلے سراغ

گئے مضطرب حال سارے رواں

تڑپتا تھا وہ شعلہ آکر جہاں

تلاش اس کی کی اور لے لے کے نام

پکارے بہت پر کہاں پرس رام

محبت نے ایسا کھپایا اسے

کہ ہرگز کنھوں نے نہ پایا اسے

یقینی ہوا یہ کہ وہ تیز آگ

اسی نیم کشتہ سے رکھتی تھی لاگ

لپٹ اس کو شعلہ ہی وہ لے گیا

عجب طور کا داغ یہ دے گیا

پھرے خوار ہو ہو کے ناچار سب

کسی کو تحیر کسی کو عجب

کوئی منفعل ساتھ آنے سے تھا

کوئی بر لب آب جانے سے تھا

خصوصاً وہ عاشق ہوا پرخجل

ندامت ہوئی یہ جسے متصل

نہ تھا اگلی خجلت ہی سے روے حرف

ہوا دوسرا ماجراے شگرف

تفکر کے دریا میں ڈوبا ہوا

کنارے پہ بیٹھا تھا روتا ہوا

کہ پوچھیں گے جو اس کے واماندگاں

تو یہ واقعہ کیا کروں گا بیاں

کہوں کیونکے یک بار وہ جل گیا

کف خاک ہو خاک میں رل گیا

کھنچی جرم کو بے گناہی مری

ہوئی شہر میں روسیاہی مری

وہ شعلہ جلاتا مجھے کاش کے

لیے ساتھ جاتا مجھے کاش کے

اگر ہے یہ قصہ بھی حیرت فزا

ولے میرؔ یہ عشق ہے بدبلا

بہت جی جلائے ہیں اس عشق نے

بہت گھر لٹائے ہیں اس عشق نے

فسانوں سے اس کے لبالب ہے دہر

جلائے ہیں اس تند آتش نے شہر

محبت نہ ہو کاش مخلوق کو

نہ چھوڑے یہ عاشق نہ معشوق کو

mohabbat ne zulmat se karha hai nur

na hoti mohabbat na hota zuhur

mohabbat misbib mohabbat sabab

mohabbat se ate hain kar-e-ajab

mohabbat ban is ja na aya koi

mohabbat se khali na paya koi

mohabbat hi is karkhane mein hai

mohabbat se sab kuchh zamane mein hai

mohabbat se kis ko hua hai faragh

mohabbat ne kya kya dikhae hain dagh

mohabbat agar karpardaz ho

dilon ke tain soz se saz ho

mohabbat hai ab-e-rukh kar dil

mohabbat hai garmi-e-azar dil

mohabbat ajab khwab khun rez hai

mohabbat balai dil awez hai

mohabbat ki hain karpardaziyan

ke ashiq se hoti hain janbaziyan

mohabbat ki atish se akhgar hai dil

mohabbat na howe to patthar hai dil

mohabbat ko hai is gulistan mein rah

kali ke dil-e-tang mein bhi hai chah

mohabbat hi se dil ko ro baithiye

mohabbat mein ji muft kho baithiye

mohabbat lagati hai pani mein ag

mohabbat se hai tegh-o-gardan mein lag

mohabbat se hai intizam jahan

mohabbat se gardish mein hai asman

mohabbat se rote gae yar khun

mohabbat se ho ho gaya hai junun

mohabbat se ata hai jo kuchh kaho

mohabbat se ho jo wo hargiz na ho

mohabbat se parwana atish bajan

mohabbat se bulbul hai garm-e-fughan

isi ag se shama ko hai gudaz

usi ke liye gul hai sargarm-e-naz

mohabbat hi hai taht se ta ba fauq

zamin asman sab hain labrez shauq

mohabbat se yaron ke hain rang-e-zard

dilon mein mohabbat se uthte hain dard

gaya qais nashad is ishq mein

khapi jan-e-farhad is ishq mein

hui us se shirin ki halat tabah

kiya us se laila ne khema siyah

suna hoga wamiq pe jo kuchh hua

nal is ishq mein kis tarah se mua

jo azra pe gazra so mashhur hai

daman ka bhi ahwal mazkur hai

sitam is bala ke hi sahte gae

sab is ishq ko ishq kahte gae

is atish se garmi hai khurshid mein

yahi zarre ki jan naumid mein

usi se dil-e-mah hai dagh dar

katan ka jigar hai sarasar figar

nae us ke charche hikayat suni

gahe shukr gahe shikayat suni

usi se qayamat hai har char aur

isi fitna gar ka hai alam mein shor

koi shahr aisa na dekha ke wan

na ho us se ashob-e-mahshar ayan

kab is ishq ne taza kari na ki

kahan khun se ghaza kari na ki

zamane mein aisa nahin taza kar

gharaz hai ye aajuba-e-rozgar

ajab kam pitne mein us se hua

ajab ahl-e-alam ko jis se hua

ke wan ik jawan tha pars ram nam

khush andam-o-khush qamat-o-khush khiram

jawani ke gulshan ka wo ab-o-rang

gulistan pe kam us ki khubi se tang

jidhar nikle rangin adai ke sath

chale jaen ji khush numai ke sath

khule bal chalta tha wo sarw-e-naz

qadam bos ko ati umr-e-daraz

jidhar ko wo tuk garm raftar ho

qayamat idhar se numudar ho

nigah garm us ki jidhar ja lari

kahe to ke udhar ko bijli pari

wo kafir bhuwen howen mail jahan

karen sajda is ja pe islamiyan

nigah tegh-e-majruh jis ke pare

palak sail jun dil mein jakar gare

siyah chashm us ke do badmast the

nigahon se shamshir dar dast the

rukh us ka kahan aur mah-o-khur kahan

tafawut zamin asman ka hai yan

do lab laal ko jin se sharmindagi

dam-e-harf sarmaya-e-zindagi

dahan ki jo tangi nazar kijiye

tu age sukhan mukhtasar kijiye

na ham tum zanakh dekh hairan rahen

sabhi dast-e-zer-e-zanakhdan rahen

sarapa mein us ke jahan dekhiye

wahin rawe maqsud jan dekhiye

khiraman nikalta wo jis rah se

qayamat thi wan nala-o-ah se

fida us pe ji jan har ek ka

ke maqsud-e-dil tha bad-o-nek ka

kai gard-o-pesh us ke waraftagan

kai idhar udhar jigar taftgan

bahut raftagan adai kalam

bahut mubtala-e-balai khiram

koi kushta-e-shauq raftar ka

koi nim jan zauq-e-didar ka

koi walahu-e-khanda-e-barq wash

kisu ke tain jumbish-e-lab se ghash

kisu ki nazar mein kamar ki lachak

kisu ke jigar mein palak ki kasak

koi hairati tarz-e-guftar ke

koi arzukash barobar ke

koi zulf se us ki majnun rahe

kisu ka tabassum se dil khun rahe

koi dil sitam kushta-e-yak nigah

koi jan honthon pe mauquf ah

kisu par fusun gardish-e-chashm ka

kisu par ghazab ghamza-o-khashm ka

koi dast bar dil koi be qarar

koi be khabar koi be ikhtiyar

inhon mein se ik ashiq-e-zar tha

is afat ko us se sarokar tha

mohabbat mein tha jazb-e-kamil use

murad-e-dil apni thi hasil use

shab-o-roz ham bistar-e-kam-e-dil

hamesha ham aghosh aram dil

dam us ke main yan tak to tasir thi

ke sohbat is atish se dargir thi

baham rabt chaspan baham ikhtilat

na kam hoti garmi na kam ikhtilat

maro koi gham se koi ho halak

wo shola isi khas se rakhta tapak

kahan husn mein tha wafa ka ye pas

ye suniye ke hai ga khilaf-e-qayas

bahut se bahut us ka maluf tha

usi ki tasalli se masruf tha

ke naga wo dilbar hua kadkhuda

raha apne ashiq se chande juda

zan-o-sho se ikhlas baham hua

is ashufta se rabta kam hua

nigahen baham dil mein kawish karen

sukhan se wafaen tarawish karen

hawa rabt chaspan baham is qadar

ke dushwar uthe ham digar se nazar

rahen donon dast-o-baghal roz-o-shab

kabhu munh pe munh ho kabhu lab pe lab

wafa ne jo taklif ki ek roz

gaya apne ashiq ke wo dil faroz

kai din mein jakar jo us se mila

kiya us ne had se ziyada gila

ke ai naznin ah kin ne kaha

ke tu hal se mere ghafil raha

magar sadd-e-rah tha kisu ka fareb

mila koi tujh se bhi dushman shakeb

koi zulf-e-zanjir-e-pa hogai

ke masdud rah-e-wafa hogai

tarah kis ki chitwan ki dil mein khabbi

jigar mein palak shokh kis ki chubhi

kisu chashm ne tujh ko jadu kiya

mire jam-e-ishrat ko lohu kiya

kaha un ne thi kadkhudai miri

na thi be sabab ye judai miri

rakh ab mujh ko maazur nachar hun

mohabbat ka main naugariftar hun

na fursat mujhe subh hai ab na sham

taraf us ke hai dil ko mel tamam

use bhi mire sath ikhlas hai

dilon ko baham rabta khas hai

use mujh se hai nisbat-e-ashiqi

wo rahti hai be taqat-e-ashiqi

nahin us ko yak lahza tab-e-firaq

judai miri us pe gazre hai shaq

nikalta hun ghar se jo main ek an

tu pata hun jakar use nim jan

na dekhe jo mujh ko to mar jae wo

wahin ji se apne guzar jae wo

jo pahunche miri jhunth use badkhabar

tu kar baithe sach apne ji ka zarar

gharaz us ko tab-o-tahammul nahin

shakebai hijr bilkul nahin

ye sun kar kaha is dil afgar ne

sitam kushta-e-duri-e-yar ne

ke mujh ko nahin teri baten qubul

ye makr-e-zanan hain to un par na bhul

wafa kin ne in naqison mein se ki

mua shawe kis ka ke wo phir na ji

ye zahir mein har chand hun rashk-e-mah

walekin hain batin mein mar-e-siyah

khuda makr se un ke de hai khabar

nahin un se koi farebinda tar

jahan mein fareb un ka mashhur hai

zabanon pe makr un ka mazkur hai

piye imtihan aqibat yak nafar

muqarrar hua take ja us ke ghar

kahe gharq-e-dariya hua pars ram

hui zindagani ki subh us ki sham

gaya tha nahane ko waqt-e-sahar

so duba wo khurshid raushan guhar

kiya mauj-e-dariya ne sar se guzar

utha tab-e-nazuk se us ke ghubar

wo gesu jo bikhre the bala-e-ab

so ab mauj-e-dariya ko hai pech-o-tab

phire thin jo we ankhriyan ab mein

so we gardishen ab hain girdab mein

tamanna mein the jis ke sab dil figar

so dariya ko ab hai wo bos-o-kanar

na samjha wo nafahm asrar-e-ishq

na socha wo natajriba kar-e-ishq

kaha gharq-e-dariya hua pars ram

hawa kam is rashk-e-mah ka tamam

kahe to ke maujon ko tha intizar

ke dast-o-baghal hogain ek bar

gaya baith pani mein aisa shitab

ke goya lab-e-ab ka tha habab

kinare pe dariya ke ik shor hai

bahal kharab ek jamhur hai

gire hain kai ashna ab mein

kai atish-e-gham se hain tab mein

koi sar pe is gham se dale hai khak

kisi ne kiya hai gareban ko chak

hamen dagh wo dar-e-tar de gaya

bahut ab ye majra le gaya

suna us ki hamsar ne jab ye sukhan

hawa mauj zan bahr ranj-o-mehan

nigah ik taraf dar ke mayus ki

dam-e-sard khincha gaya dub ji

wahi be khudi rukhsat-e-jan thi

wo ik dam ki goya ke mehman thi

giri ho ke be jan wo dardmand

hawa shor nauhe ka ghar se buland

maui gham mein is jumla tan naz ke

gai jan hamrah sukhan saz ke

wo aya jo tha dil pareshan gaya

ke is waqie se pasheman gaya

khabar le gaya is kanne zudtar

jo tha darpae imtihan be khabar

ke wo rashk-e-mah imtihan de gai

mohabbat ke namus ko le gai

mua sun pars ram ke tin maui

mire ik sukhan mein qayamat hui

agarche na kuchh un ne munh se kaha

diya ji wale ji isi mein raha

ye sun kar wo nafahm hairan hua

khijalat mein sar dar gareban hua

gaya hosh sun kar pars ram ka

diwana hua ishq ke kam ka

utha be khud-o-be khirad be hawas

gira ake is paikar-e-murda pas

laga kahne ai maya-e-zindagi

mujhe munh se tere hai sharmindagi

kiya jald rakht-e-safar tune bar

na mera kiya ah tuk intizar

na meri suni kuchh na apni kahi

mire tere donon ke ji mein rahi

zamin par se akhir uthaya use

lab-e-ab jakar jalaya use

jab ag us ke paikar pe sab chha gai

mohabbat ajab dagh dikhla gai

ye sargarm-e-fariyad-o-zari hua

lahu us ki ankhon se jari hua

jigar gham mein yak lakht-e-khun hogaya

ruka dil ke akhir junun hogaya

gae hosh-o-sabr us ke yak bargi

tabiat mein ai ik awargi

sarasimgi se bagula hua

phire is tarah jaise bhula hua

na ji ko tasalli na dil ko qarar

kaf-e-gham mein sarrishta-e-ikhtiyar

kabhu yad kar us ko nalan rahe

kabhu tuk jo bhule to hairan rahe

kabhu yan kabhu wan bahal kharab

wahi be qarari wahi iztirab

rahe ghar to ashob gah wo gali

chaman mein jo le jaen to be kali

kabhu muttasil honth par ah-e-sard

kabhu dast bar dil ke dil mein hai dard

hui rafta rafta jo wahshat ziyad

laga bhagne sab se wo namurad

kuchh apne bad-o-nek ki sudh nahin

nikal jae tanha kahin ka kahin

kabhu jake sahra se lawen use

kabhu rote dariya pe pawen use

kabhu khak milta hai munh par khara

kahin hai kharabi mein be sudh para

sar-e-sham ik roz dariya gaya

hui rat wan se na aya gaya

kinare pe rahta tha ik dam dar

raha rat us ke ye qurb-o-jawar

kaha us ki aurat ne is rat ko

nahin tujh se ji chahta bat ko

tujhe fikr kuchh ab hamari nahin

tu jata nahin sham ko ab kahin

tira shab ko dariya mein parta tha dam

tu chalta tha bare maishat ka kam

tu jata nahin shab ko jis roz se

maishat hai andoh-e-jan soz se

nahin taqat-e-sabr ham ko tunuk

bahut der milta hai nan-o-namak

wo bola ke main bhi pareshan hun

bahut tang dasti se hairan hun

kahun kya kai roz se sham ko

uthata hun main is sabab dam ko

ke yak shola-e-tund purpech-o-tab

falak se utarta hai nazdik ab

koi dam to rahta hai sargarm-e-gasht

kabhi siwe dariya kabhi siwe dasht

thaharta jo hai phir kinare pe wan

kahe hai pars ram to hai kahan

ye atish mire dil ki kyunkar bujhe

adam mein bhi main ne na paya tujhe

kiya ishq ne mujh ko atish ka bab

na chhirka miri ag par tune ab

gaya wo ye kah kar siwe asman

rahe hai mujhe rat din khauf-e-jan

suna hal shole ka sayyad se

dhuan ik utha jan-e-nashad se

hawa shola-e-shauq-e-dil se buland

raha lautta ag mein jun sapnad

gai rat jun tun hui subh jab

ziyada hui ishq ki tab-o-tab

mohabbat ne ki ishtialak ke wo

sarasima aya chala is jagah

jahan se uthi thi ye atish sulag

phir us ke jigar ko lagi ghar ko lag

tabassum kunan wan ye un ne kaha

ke kulfat mein gham ki bahut mein raha

chalo sairgashti ko hangam-e-shab

lab-e-ab khali karen dil ko sab

hua so hua yun hi taqdir thi

jahan soz-e-ulfat ki tasir thi

na hote jo dil gir yan muttasil

na hoti ye atish kabhu mushtail

kiyan aql ki un ne baten jo wan

wo ashiq jo tha darpae imtihan

laga kahne ye arzu thi mujhe

ke ik roz hushyar dekhun tujhe

so ye din khuda ne dikhaya mujhe

sukhan tere munh ka sunaya mujhe

nadamat se hun tang shahid hain sab

giraftar hun main bahal ajab

na khajlat se ro hai jo kuchh main kahun

na qudrat ajal par ke mar bhi rahun

na taqdir ka main ne samjha fareb

na jana ke itni hai wo nashikib

hawa ik sukhan mein mire ye ghazab

kharabi ka teri hawa mein sabab

karunga zamane mein jab tak maash

rahunga isi dard se dil kharash

muqarrar kya hai kai din se ye

ke ainda rahiye tiri khak-e-rah

jo is mein hai khush to to hun main bhi sath

rahenge lab-e-ab hi aj rat

dil par ko khali karenge baham

phirenge tire sath khush koi dam

hue aqibat siwe dariya rawan

na paida kisu par ye raz-e-nihan

ke ik ag sulgi hai wan yak kanar

mohabbat kamin mein hai sargarm-e-kar

kisu ishtialak ki hai muntazir

jahan sar ko khincha qayamat hai phir

hue nao par sham gah jab sawar

kaha un ne yan ek hai dam dar

jahan qufl ho rah dariya to wahan

kifayat hai us ki kilid-e-zaban

use sath lo to bhali bat hai

ke dariya mein phirna hai aur rat hai

liya akhirulamr hamrah use

bithaya qarib apne kah kah use

tunuk dur chal kar kya ye sawal

mujhe hai tire harf shab ka khayal

kahan shola-e-sarkash ata hai yan

kidhar pech-o-tab ake khata hai yan

kahan le hai dariya pe ik dam qarar

kidhar muztarib ho kare hai guzar

thaharta hai kis ja wo atish fagan

taraf kaun se ho hai garm-e-sukhan

ye sayyad se tha hi mahw-e-suragh

jigar atish-e-shauq rakhti thi dagh

ke hokar farogh ik siwe asman

tarapne laga jaise atish bajan

koi dam mein dariya pe aya furud

hawa neza bala sabhon ko numud

lab-e-ab wo shola-e-jan gudaz

tarap kar bahut bazaban daraz

pukara kahan hai pars ram to

mohabbat ka tuk dekh anjam to

ke main jumla tan atish-e-tez hun

dil-e-garm se shola angez hun

bharakti hai jab ag dil ki mire

lab-e-ab utrun hun gham mein tire

magar sozish-e-dil ho kam ab se

bujhe ji mira is tab-o-tab se

so ye ab rakhta hai roghan ka kam

kiya ishq ne ah dushman ka kam

ye be tab sun kar hua be qarar

safine se utra basad iztirar

hawa hamdam is atish angez se

kaha is balai dil awez se

ke main hun pars ram khana kharab

mira dil bhi is ag se hai kabab

mire bhi jigar mein yahi soz hai

yahi mujh ko jalna shab-o-roz hai

mohabbat tiri barq-e-khirman hui

tiri dosti ji ki dushman hui

sukhan mukhtasar kuchh wo shola chala

kuchh ik apni jagah se ye dil jala

baham garm joshi se yak ja hue

ke guzari thi muddat bhi tanha hue

wo shola raha ek ja mushtail

kahe to tasalli hue jan-o-dil

yakayak bharak kar wo jalne laga

phir idhar idhar phirne chalne laga

kiya pas pani ke akar suud

rahi raushni si koi dam numud

phir age kisu par na paida hua

na jana ke wo shola phir kya hua

khabardar ho ahl-e-kashti tamam

lage kahne baham nahin pars ram

uthe dhundne hoke sab nasabur

kinare pe dariya ke nazdik-o-dur

na paya kahin us ko hairan hue

nihayat hi khatir pareshan hue

wo sayyad bola ke dun main nishan

gaya tha siwe shola ye naujawan

ye aur ag donon hue ham sukhan

wo shola hua us pe atish fagan

ye joshish to yan se thi maddinazar

phir age nahin us ki mujh ko khabar

na ho atish-e-gham se pahle hi dagh

chalo is taraf ko jo nikle suragh

gae muztarib hal sare rawan

tarapta tha wo shola akar jahan

talash us ki ki aur le le ke nam

pukare bahut par kahan pars ram

mohabbat ne aisa khapaya use

ke hargiz kanhon ne na paya use

yaqini hua ye ke wo tez ag

isi nim kushta se rakhti thi lag

lipat us ko shola hi wo le gaya

ajab tur ka dagh ye de gaya

phire khwar ho ho ke nachar sab

kisi ko tahayyur kisi ko ajab

koi munfail sath ane se tha

koi bar lab-e-ab jane se tha

khususan wo ashiq hua purkhajil

nadamat hui ye jise muttasil

na tha agli khajlat hi se rawe harf

hawa dusra majra-e-shagraf

tafakkur ke dariya mein duba hua

kinare pe baitha tha rota hua

ke puchhenge jo us ke wamandagan

to ye waqia kya karunga bayan

kahun kyunke yak bar wo jal gaya

kaf-e-khak ho khak mein rul gaya

khinchi jurm ko be gunahi miri

hui shahr mein rusiyahi miri

wo shola jalata mujhe kash ke

liye sath jata mujhe kash ke

agar hai ye qissa bhi hairat faza

wale mir ye ishq hai badbala

bahut ji jalae hain is ishq ne

bahut ghar lutae hain is ishq ne

fasanon se us ke labalab hai dahr

jalae hain is tund atish ne shahr

mohabbat na ho kash makhluq ko

na chhore ye ashiq na maashuq ko