شادی و الم سب سے حاصل ہے سبکدوشی

شادی و الم سب سے حاصل ہے سبکدوشی

سو ہوش مرے صدقے تجھ پر مری بے ہوشی

گم ہونے کو پا جانا کہتے ہیں محبت میں

اور یاد کا رکھا ہے یاں نام فراموشی

کل غیر کے دھوکے میں وہ عید ملے ہم سے

کھولی بھی تو دشمن نے تقدیر ہم آغوشی

وہ قلقل مینا میں چرچے مری توبہ کے

اور شیشہ و ساغر کی مے خانے میں سرگوشی

ہم رنج بھی پانے پر ممنون ہی ہوتے ہیں

ہم سے تو نہیں ممکن احسان فراموشی

ہوش آتا ہے پھر مجھ کو پھر ہوش مجھے آیا

دینا نگہ ساقی اک ساغر بے ہوشی

کل عرصۂ محشر میں جب عیب کھلیں میرے

رحمت تری پھیلا دے دامان خطا پوشی

ملتے ہی نظر تجھ سے مستانہ ہوا بیدمؔ

ساقی تری آنکھیں ہیں یا ساغر بے ہوشی

shadi-o-alam sab se hasil hai subukdoshi

so hosh mire sadqe tujh par miri be hoshi

gum hone ko pa jana kahte hain mohabbat mein

aur yad ka rakha hai yan nam faramoshi

kal ghair ke dhoke mein wo eid mile ham se

kholi bhi to dushman ne taqdir ham aghoshi

wo qulqul mina mein charche miri tauba ke

aur shisha-o-saghar ki mai khane mein sargoshi

ham ranj bhi pane par mamnun hi hote hain

ham se to nahin mumkin ehsan faramoshi

hosh ata hai phir mujh ko phir hosh mujhe aya

dena nigah saqi ik saghar be hoshi

kal arsa-e-mahshar mein jab aib khulen mere

rahmat tiri phaila de daman-e-khata poshi

milte hi nazar tujh se mastana hua bedam

saqi tiri ankhen hain ya saghar be hoshi