شراب خون جگر ہے ہم کو شراب ہم لے کے کیا کریں گے

شراب خون جگر ہے ہم کو شراب ہم لے کے کیا کریں گے

گزک کی جا ہے دل برشتہ کباب ہم لے کے کیا کریں گے

ہزار پردہ میں تم چھپاؤ پہ حسن چھپتا نہیں مری جاں

تمہارے عارض یہ کہہ رہے ہیں نقاب ہم لے کے کیا کریں گے

ہمارے نقد دل و جگر کو حساب کے بعد پھیر دیں گے

حساب لینے کا ان سے حاصل حساب ہم لے کے کیا کریں گے

ہمیں جو بھیجا ہے تم نے مصحف تو یار حرف آشنا نہیں ہم

دکھاؤ اپنا رخ کتابی کتاب ہم لے کے کیا کریں گے

بتوں کی الفت سے بعض آئیں مگر جو دل مان جائے واعظ

عذاب میں جان پڑ گئی ہے ثواب ہم لے کے کیا کریں گے

جو منع کرتا ہے دل نہ دیں گے بتوں کو ناصح مگر خدارا

بتا دے تو ہی کہ اس طرح کا عذاب ہم لے کے کیا کریں گے

خدا کی بخشی ہوئی ہے وقعت اثرؔ نہیں کوئی ایسی نعمت

ملی ہے جب عزت سیادت خطاب ہم لے کے کیا کریں گے

sharab khun-e-jigar hai ham ko sharab ham le ke kya karenge

gazak ki ja hai dil birishta kabab ham le ke kya karenge

hazar parda mein tum chhupao pe husn chhupta nahin miri jan

tumhare ariz ye kah rahe hain naqab ham le ke kya karenge

hamare naqd-e-dil-o-jigar ko hisab ke baad pher denge

hisab lene ka un se hasil hisab ham le ke kya karenge

hamen jo bheja hai tum ne mushaf to yar harf ashna nahin ham

dikhao apna rukh kitabi kitab ham le ke kya karenge

buton ki ulfat se baaz aen magar jo dil man jae waiz

azab mein jan par gai hai sawab ham le ke kya karenge

jo mana karta hai dil na denge buton ko naseh magar khudara

bata de tu hi ke is tarah ka azab ham le ke kya karenge

khuda ki bakhshi hui hai waqat asar nahin koi aisi nemat

mili hai jab izzat-e-siyadat khitab ham le ke kya karenge