شرطیں جو بندگی میں لگانا روا ہوا

شرطیں جو بندگی میں لگانا روا ہوا

اے واعظوں نماز نہ ٹھہری جوا ہوا

ابھرا جو رو سیاہ تنک ظرف کیا ہوا

حد سے سوا جو خال ہوا وہ مسا ہوا

پوچھو نہ کوے یار عدم کی مسافرو

ڈھرا ہے سوئے گور غریباں لگا ہوا

سوکھا ہوائے غم سے جو کچھ تازگی ہوئی

میں وہ شجر ہوں خشک ہوا جب ہرا ہوا

ثانی محال ہے صنم لاجواب کا

پیدا کوئی خدا کا نہیں دوسرا ہوا

مثل حباب دم میں فنا ہو جو آدمی

پانی کا بلبلہ نہ ہوا اور کیا ہوا

وہ دل جلا ہوں جس میں مری خاک مل گئی

جو نخل اس زمیں پہ ہوا آگ کا ہوا

ناخن خراشیوں سے جراحت جو بڑھ چلے

ناسور اور زخم کہن میں سوا ہوا

ہنستے تو گل رخوں سے ہیں مثل دہان زخم

لیکن ہے آبلے کی طرح دل دکھا ہوا

ساکت زبان ہو گئی اے شادؔ مرتے دم

کیا بند عندلیب مرا بولتا ہوا

sharten jo bandagi mein lagana rawa hua

ai waizon namaz na thahri jawa hua

ubhra jo ro siyah tunuk zarf kya hua

had se siwa jo khal hua wo masa hua

puchho na kawwe yar adam ki musafiro

dhara hai su-e-gor-e-ghariban laga hua

sukha hawa-e-gham se jo kuchh tazgi hui

main wo shajar hun khushk hua jab hara hua

sani muhal hai sanam lajawab ka

paida koi khuda ka nahin dusra hua

misl-e-habab dam mein fana ho jo admi

pani ka balbila na hua aur kya hua

wo dil jala hun jis mein miri khak mil gai

jo nakhl is zamin pe hua ag ka hua

nakhun kharashiyon se jarahat jo barh chale

nasur aur zakhm-e-kuhan mein siwa hua

hanste to gul rukhon se hain misl-e-dahan-e-zakhm

lekin hai able ki tarah dil dikha hua

sakit zaban ho gai ai shad marte dam

kya band-e-andalib mira bolta hua