شراب آئے تو کیف و اثر کی بات کرو

شراب آئے تو کیف و اثر کی بات کرو

پیو تو بزم میں فکر و نظر کی بات کرو

فسانۂ خم گیسو میں کیف کچھ بھی نہیں

نظام عالم زیر و زبر کی بات کرو

چمن میں دام بچھاتا ہے وقت کا صیاد

گلوں سے حوصلۂ بال و پر کی بات کرو

قبائے زہد کی پاکیزگی تو دیکھ چکے

شراب خانے میں دامان تر کی بات کرو

کہانیاں شب ہجراں کی ہو چکی ہیں تمام

سحر طلوع ہوئی ہے سحر کی بات کرو

چمن چمن میں ادھر ہو رہی ہے حد بندی

کھلی فضائیں جدھر ہیں ادھر کی بات کرو

گلوں کا ذکر بہاروں میں کر چکے اخترؔ

اب آؤ ہوش میں برق و شرر کی بات کرو

sharab ae to kaif-o-asar ki bat karo

piyo to bazm mein fikr-o-nazar ki bat karo

fasana-e-kham-e-gesu mein kaif kuchh bhi nahin

nizam-e-alam zer-o-zabar ki bat karo

chaman mein dam bichhata hai waqt ka sayyad

gulon se hausla-e-bal-o-par ki bat karo

qaba-e-zohd ki pakizgi to dekh chuke

sharab khane mein daman-e-tar ki bat karo

kahaniyan shab-e-hijran ki ho chuki hain tamam

sahar tulu hui hai sahar ki bat karo

chaman chaman mein idhar ho rahi hai had bandi

khuli fazaen jidhar hain idhar ki bat karo

gulon ka zikr baharon mein kar chuke akhtar

ab ao hosh mein barq-o-sharar ki bat karo