شرمندہ کیا جوہر بالغ نظری نے

شرمندہ کیا جوہر بالغ نظری نے

اس جنس کو بازار میں پوچھا نہ کسی نے

صد شکر کسی کا نہیں محتاج کرم میں

احسان کیا ہے تری بیداد گری نے

محتاج تھی آئینے کی تصویر سی صورت

تصویر بنایا مجھے محفل میں کسی نے

گل ہنستے ہیں غنچے بھی ہیں لبریز تبسم

کیا ان سے کہا جا کے نسیم سحری نے

مایوس نہ کر دے کہیں ان کی نگہ گرم

امید دلائی ہے مجھے سادہ دلی نے

محنت ہی پہ موقوف ہے آسائش گیتی

کھوئی مری راحت مری راحت طلبی نے

وحشتؔ میں نگاہوں کے تجسس سے ہوں آزاد

احسان کیا مجھ پہ مری بے ہنری نے

sharminda kiya jauhar baligh nazari ne

is jins ko bazar mein puchha na kisi ne

sad shukr kisi ka nahin mohtaj-e-karam mein

ehsan kya hai tiri bedad giri ne

mohtaj thi aine ki taswir si surat

taswir banaya mujhe mahfil mein kisi ne

gul hanste hain ghunche bhi hain labrez tabassum

kya un se kaha ja ke nasim-e-sahari ne

mayus na kar de kahin un ki nigah-e-garm

ummid dilai hai mujhe sada dili ne

mehnat hi pe mauquf hai asaish-e-giti

khoi miri rahat miri rahat talbi ne

wahshat mein nigahon ke tajassus se hun azad

ehsan kiya mujh pe miri be hunari ne