شبیہ خنجر قاتل بنا کر

شبیہ خنجر قاتل بنا کر

رکھی سینے میں ہم نے دل بنا کر

جنوں دل کو نہ میرے بیٹھنے دے

اٹھا دے مست لا یعقل بنا کر

نگاہ بد کا اندیشہ ہے مجھ کو

وہ بیٹھے ہیں جبیں پر تل بنا کر

جو قابو تجھ پہ ہوتا میرا اے جان

تجھے پہلو میں رکھتا دل بنا کر

ڈرایا پرسش محشر سے ناحق

پشیماں ہوں تجھے قاتل بنا کر

اٹھایا حشر میں بھی مجھ کو اس نے

سوال دید کا سائل بنا کر

اڑا لے چل ہوائے شوق مجھ کو

غبار رہرو منزل بنا کر

نکالا آرزوئے دل کو انجمؔ

تمنائے دل بسمل بنا کر

shabih-e-khanjar-e-qatil bana kar

rakhi sine mein ham ne dil bana kar

junun dil ko na mere baithne de

utha de mast-e-la yaaqal bana kar

nigah-e-bad ka andesha hai mujh ko

wo baithe hain jabin par til bana kar

jo qabu tujh pe hota mera ai jan

tujhe pahlu mein rakhta dil bana kar

daraya pursish-e-mahshar se nahaq

pasheman hun tujhe qatil bana kar

uthaya hashr mein bhi mujh ko us ne

sawal-e-did ka sail bana kar

ura le chal hawa-e-shauq mujh ko

ghubar rahrau-e-manzil bana kar

nikala arzu-e-dil ko anjum

tamanna-e-dil-e-bismil bana kar