شتابی اپنے دیوانے کو کر بند

شتابی اپنے دیوانے کو کر بند

مسلسل زلف سے کر یا نظر بند

ترا شیدا نہ ٹھہرا جاں سا اک دم

گیا لے کوٹ میں لوہے کے کر بند

جو تجھ پر اور کو ترجیح دے دیکھ

بس اس اندھے کی آنکھیں ہیں مگر بند

تڑپتا بے قراری آہ و زاری

ہوئیں یہ حالتیں کیوں کر سطر بند

ہے شعلہ آگ کا ہر آہ کے ساتھ

یہ دل ہے یا ہے سینے میں شرر بند

پیارے ڈر خدا سے اپنی آنکھیں

ہماری طرف سے اتنی نہ کر بند

تجھے خورشید رو، جی بھر کے دیکھوں

ہوئی جاتی ہے میری آنکھ پر بند

عزیزو مصر دل کی راہ ہے دور

رہ ظلمات میں ہے گا یہ در بند

جو چاہے دو جہاں کا کام لے گا

ہے باندھا جس نے ہمت کا کمر بند

رہو ٹک اظفریؔ اب چشم کھولے

رہیں گی آنکھ پھر شام و سحر بند

shitabi apne diwane ko kar band

musalsal zulf se kar ya nazar band

tira shaida na thahra jan sa ik dam

gaya le kot mein lohe ke kar band

jo tujh par aur ko tarjih de dekh

bas is andhe ki ankhen hain magar band

tarapta be qarari ah-o-zari

huin ye halaten kyun kar satr band

hai shola ag ka har ah ke sath

ye dil hai ya hai sine mein sharar band

pyare dar khuda se apni ankhen

hamari taraf se itni na kar band

tujhe khurshid ru, ji bhar ke dekhun

hui jati hai meri ankh par band

azizo misr dil ki rah hai dur

rah-e-zulmat mein hai ga ye dar band

jo chahe do jahan ka kam lega

hai bandha jis ne himmat ka kamar band

raho tuk azfari ab chashm khole

rahengi ankh phir sham-o-sahar band