شعر کے پردے میں میں نے غم سنایا ہے بہت

شعر کے پردے میں میں نے غم سنایا ہے بہت

مرثیے نے دل کے میرے بھی رلایا ہے بہت

بے سبب آتا نہیں اب دم بہ دم عاشق کو غش

درد کھینچا ہے نہایت رنج اٹھایا ہے بہت

وادی و کہسار میں روتا ہوں ڈاڑھیں مار مار

دلبران شہر نے مجھ کو ستایا ہے بہت

وا نہیں ہوتا کسو سے دل گرفتہ عشق کا

ظاہراً غمگیں اسے رہنا خوش آیا ہے بہت

میرؔ گم گشتہ کا ملنا اتفاقی امر ہے

جب کبھو پایا ہے خواہش مند پایا ہے بہت

sher ke parde mein main ne gham sunaya hai bahut

marsiye ne dil ke mere bhi rulaya hai bahut

be sabab ata nahin ab dam ba dam ashiq ko ghash

dard khincha hai nihayat ranj uthaya hai bahut

wadi-o-kohsar mein rota hun darhen mar mar

dilbaran-e-shahr ne mujh ko sataya hai bahut

wa nahin hota kisu se dil girafta ishq ka

zahiran ghamgin use rahna khush aya hai bahut

mir gum gashta ka milna ittifaqi amar hai

jab kabhu paya hai khwahish mand paya hai bahut