شرارے

خود کو بہلانا تھا آخر خود کو بہلاتا رہا

میں بہ ایں سوز دروں ہنستا رہا گاتا رہا

مجھ کو احساس فریب رنگ و بو ہوتا رہا

میں مگر پھر بھی فریب رنگ و بو کھاتا رہا

میری دنیائے وفا میں کیا سے کیا ہونے لگا

اک دریچہ بند مجھ پر ایک وا ہونے لگا

اک نگار ناز کی پھرنے لگیں آنکھیں مجازؔ

اک بت کافر کا دل درد آشنا ہونے لگا

عین ہنگام طرب روح طرب تھرا گئی

دفعتاً دل کے افق پر اک گھٹا سی چھا گئی

ایک آغوش تمنا کا تقاضا دیکھ کر

ایک دل کی سرد مہری بھی مجھے یاد آ گئی

مجرم سرتابی حسن جواں ہو جائیے

گل فشانی تا کجا شعلہ فشاں ہو جائیے

کھائیے گا اک نگاہ لطف کا کب تک فریب

کوئی افسانہ بنا کر بد گماں ہو جائیے

khud ko bahlana tha akhir khud ko bahlata raha

main ba ain soz-e-darun hansta raha gata raha

mujh ko ehsas-e-fareb-e-rang-o-bu hota raha

main magar phir bhi fareb-e-rang-o-bu khata raha

meri duniya-e-wafa mein kya se kya hone laga

ik daricha band mujh par ek wa hone laga

ik nigar-e-naz ki phirne lagen ankhen majaz

ik but-e-kafir ka dil dard-e-ashna hone laga

ain hangam-e-tarab ruh-e-tarab tharra gai

dafatan dil ke ufuq par ik ghata si chha gai

ek aghosh-e-tamanna ka taqaza dekh kar

ek dil ki sard mehri bhi mujhe yad a gai

mujrim sartabi-e-husn jawan ho jaiye

gul fishani ta kuja shola fishan ho jaiye

khaiyega ik nigah-e-lutf ka kab tak fareb

koi afsana bana kar bad guman ho jaiye