شباب ہوش کہ فی الجملہ یادگار ہوئی

شباب ہوش کہ فی الجملہ یادگار ہوئی

جو عمر صرف تماشائے حسن یار ہوئی

حساب حسرت جرم نظارہ دل سے پوچھ

نظر تو ایک جھلک کی گناہگار ہوئی

بساط عجز میں اک آہ تھی متاع حیات

سو وہ بھی صرف ستم ہائے روزگار ہوئی

بقدر ہستی دل ہے خمار غم بدنام

خزاں خراب بہ اندازۂ بہار ہوئی

نہیں کہ آہ میں تاثیر ہی نہیں لیکن

یہ دل فگار کبھی آسماں فگار ہوئی

کرم ہے راز امید کرم کی ہستی کا

امید تیرے کرم کی امیدوار ہوئی

بلا سے ہجر میں جینے کی انتہا تو ہے

وہ ایک بار ہوئی یا ہزار بار ہوئی

ازل میں خلق ہوئی تھی جو بجلیوں کی روح

تری نگاہ مری جان بے قرار ہوئی

مرے وجود کی حجت مرے عدم کی دلیل

وہ اک نظر تھی جو شاید جگر کے پار ہوئی

بہار نذر تغافل ہوئی خزاں ٹھہری

خزاں شہید تبسم ہوئی بہار ہوئی

امید مرگ پہ فانیؔ نثار کیا کیجے

وہ زندگی کہ ہوئی بھی تو مستعار ہوئی

shabab hosh ke fi aljumla yadgar hui

jo umr sirf-e-tamasha-e-husn-e-yar hui

hisab-e-hasrat jurm-e-nazara dil se puchh

nazar to ek jhalak ki gunahgar hui

bisat-e-ijz mein ik ah thi mata-e-hayat

so wo bhi sirf-e-sitam hae rozgar hui

baqadr-e-hasti-e-dil hai khumar-e-gham badnam

khizan kharab ba andaza-e-bahar hui

nahin ke ah mein tasir hi nahin lekin

ye dil figar kabhi asman figar hui

karam hai raz ummid-e-karam ki hasti ka

umid tere karam ki umidwar hui

bala se hijr mein jine ki intiha to hai

wo ek bar hui ya hazar bar hui

azal mein khalq hui thi jo bijliyon ki ruh

tiri nigah miri jan-e-be qarar hui

mire wajud ki hujjat mire adam ki dalil

wo ik nazar thi jo shayad jigar ke par hui

bahar nazr-e-taghaful hui khizan thahri

khizan shahid-e-tabassum hui bahar hui

umid marg pe fani nisar kya kije

wo zindagi ke hui bhi to mustaar hui